Spesol Waka for Givimaot Tract Long October 20–November 16!
1 Wanfala spesol waka bae kamap for givimaot wanfala niu tract pepa, Waswe, Iu Laek for Savve Long Tru Samting? Diswan bae start long Monday, October 20, and bae iumi gohed for duim disfala waka for fofala week. Iumi laekem disfala spesol waka wea kamap evriwea long earth for helpem staka moa for luksavve long olketa tru teaching long Bible.—John 17:17.
2 Disfala tract storyim long simpol wei olketa ansa from Bible long sixfala important kwestin olsem: “Waswe, God tingim iumi tu?” “Waswe, olketa war and wei for safa bae finis?” “Man wea dae finis hem hao?” “Waswe, man wea dae finis savve laef bak?” “Hao nao mi savve prea for God herem mi?” and “Hao nao mi savve barava hapi?” Olketa nara religion wea sei olketa Christian nating givim eni gud ansa for olketa kwestin hia. Plande wea no Christian, olketa tu tingim olketa kwestin hia, bat maet olketa no savve hao Bible nomoa garem evri ansa. Dastawe, disfala message wea iumi bae talemaot fit for mekem staka pipol interest.
3 Duim Full Territory: Goal bilong iumi hem for duim full territory bilong iumi. Sapos territory bilong iu hem big tumas, olketa elder savve talem iu for putim tract long haos wea no eni man stap long hem. Iumi mas givim tract tu long olketa neiba bilong iumi, olketa relative, olketa wea iumi skul witim or waka witim, and long eniwan wea iumi savve story witim evritaem. Maet iu savve mekem plan for auxiliary pioneer long October or November. Iu savve storyim long olketa elder sapos eni pikinini or Bible study bilong iu gohed gud and fit for kamap pablisa for duim disfala spesol waka witim iumi.
4 Wanem for Talem: For kasem staka pipol, hem gud for mekem story bilong iumi short nomoa. Iu savve askem haosholder wanfala long sixfala kwestin long kava and then showim hem ansa long tract. Diswan bae helpem pablisa for changem story bilong hem fitim olketa long datfala territory. Sapos eniwan showimaot interest, raetem nem bilong hem mekem iu savve go bak long hem. Long Saturday and Sunday iu savve offerim olketa niu magasin witim tract. Bihaen waka for givimaot tract hem finis long November 16, bae iumi offerim Wanem Bible Teachim buk. Sapos samfala tract no finis iumi savve gohed offerim olsem olketa nara tract wea iumi garem.
5 Startim Bible Study: Olketa wakem disfala niu tract for helpem iumi startim olketa Bible study. Taem iumi go bak long man wea showimaot interest, askem hem wanem trufala ansa from Bible nao comfortim hem. Iumi savve showim bihaen long tract wea storyim Bible study, and givim hem wanfala Wanem Bible Teachim buk. Sapos hem fitim, iumi savve storyim tu-thri paragraf long chapter wea storyim moa samting wea hem interest long hem.
6 Jehovah hem lukluk for olketa wea bae worshipim hem “long spirit and truth.” (John 4:23) Hem gud for iumi evriwan duim disfala spesol waka for helpem pipol kasem trufala savve abaotem Bible!