Iumi Bae Givimaot Kingdom Nius No. 38 Long November!
1. Wanem nao pipol laek savve abaotem olketa wea dae finis, and wanem nao bae iumi iusim long November for helpem pipol for kasem ansa?
1 Nomata wanem biliv nao iumi garem, dae hem enemy bilong iumi evriwan. (1 Cor. 15:26) Staka laek for savve wea nao olketa wea dae finis and sapos olketa savve lukim olketa moa. So, olketa kongregeson evriwea long world bae givimaot Kingdom Nius No. 38, wea garem title, Waswe, Man wea Dae Savve Laef Bak? Disfala campaign bae gohed for wan month and bae hem start long November 1. Bihaen disfala campaign, bae iumi iusim Kingdom Nius No. 38 olsem tract long ministry.
2. Wanem nao insaed long disfala Kingdom Nius No. 38?
2 Wanem Insaed Disfala Kingdom Nius: Taem iu foldim Kingdom Nius No. 38, haosholder bae lukim interesting title wea stap long front and olketa toktok hia: “Waswe, bae iu sei. . . yes? nomoa? mi no savve?” Hem bae lukim insaed disfala Kingdom Nius ansa from Bible for kwestin wea stap long title and gud samting wea hem savve kasem from wanem Bible promisim. Hem bae lukim tu olketa reason why hem savve trustim wanem Bible talem. Bihaen long datfala Kingdom Nius hem garem wanfala interesting kwestin wea hem savve ting raonem and hem garem ples wea hem savve askem moa information.
3. Hao nao bae iumi duim disfala waka for givimaot Kingdom Nius No. 38?
3 Hao for Duim Disfala Waka: Disfala waka for givimaot datfala Kingdom Nius hem semsem witim wei for givimaot invitation pepa for Memorial and distrik convention. Olketa elder bae talem iumi hao for duim full territory followim leta wea olketa kasem wea garem date April 1, 2013. Olketa kongregeson wea no garem staka territory savve helpem nara kongregeson wea stap klosap long olketa wea garem staka territory. Bae hem gud for iu tekem olketa copy bilong Kingdom Nius No. 38 wea iu savve iusim insaed wanfala week nomoa. Long taem bilong disfala campaign, bihaen kongregeson finisim full territory, iu savve givimaot Kingdom Nius No. 38 taem iu duim pablik witnessing. Sapos iumi givimaot evri copy wea iumi garem bifor end long datfala campaign, iumi savve offerim pablikeson wea iumi iusim long datfala month. Long first Saturday long November, iumi bae givimaot Kingdom Nius No. 38 and hem no day for offerim Bible study. Long olketa weekend, sapos hem fitim iumi savve offerim olketa magasin tu. Hem bae gud for plan distaem mekem iumi savve join insaed disfala spesol waka for givimaot Kingdom Nius No. 38.