Kasem Gud Samting From Meeting for Field Service
1 Olketa gudfala meeting for field service savve encouragem and givim gudfala instruction long iumi bifor iumi go long ministry. Hem helpem iumi for share long grup witnessing mekem iumi savve waka witim olketa nara pablisa for kasem training and sapot. (Prov. 27:17; Eccl. 4:9, 10) Wanem nao iumi savve duim for kasem gud samting from olketa meeting hia?
2 Brata wea Leadim Grup: Plande taem organization bilong Jehovah no markem information for iumi storyim long olketa meeting hia. Dastawe sapos iu bae conductim disfala meeting iu mas prepare gud. Diswan hem no minim iu mas evritaem readim text for datfala day, bat iu savve storyim datwan sapos datfala text hem story abaotem ministry. Tingim samting wea savve helpem olketa wea go aot witnessing long datfala day. Olsem example, maet iu savve storyim or duim wanfala demonstration long hao for offerim wanfala buk. Maet iu savve reviewim eni point long Hao for Startim and Go Ahed for Story Abaotem Bible buklet, Ministry Skul buk, or wanfala part long Service Meeting wea kamap no longtaem go nomoa. Long olketa narafala taem, maet iu savve storyim hao for deal witim wanfala problem wea kamap long territory bilong iu. Or sapos plande pablisa bae duim olketa return visit, iu savve storyim hao for mekem grow interest bilong olketa man and startim olketa Bible study. Nomata wanem nao iu story abaotem long datfala taem, story witim feeling for encouragem evriwan.
3 Nomata sapos iu savve samfala bae kam leit, startim meeting long stretfala taem. Iusim gudfala tingting taem iu divaedem grup, and givim territory for olketa wea needim. Meeting for field service shud gohed for samting olsem 10 go kasem 15 minute or short moa sapos hem kamap bihaen wanfala meeting bilong kongregeson. Bifor meeting for field service hem finis, evriwan mas savve hu nao bae olketa waka witim and wea nao territory for duim. Mas prea for finisim meeting.
4 Evriwan Savve Help: Olsem olketa meeting bilong kongregeson, iumi savve showim respect long Jehovah and tingim olketa narawan taem iumi kam long stretfala taem. Share insaed long story. Maet iu savve letem conductor for markem hu nao iu bae waka witim, or iu maet mekem arrangement bilong iuseleva firstaem and chusim hu nao iu laek for waka witim. Sapos iu duim olsem, trae for ‘showimaot love long evriwan’ taem iu waka witim samfala difren pablisa, and no evritaem waka witim olketa wea iu savve gud long olketa nomoa. (2 Cor. 6:11-13) Bihaen meeting hem finis, no changem arrangement, bat go stret long territory.
5 Main goal bilong olketa meeting for field service hem semsem olsem olketa meeting bilong kongregeson. Iumi garem olketa meeting hia for “tingim and muvim each other for showimaot love and duim gudfala waka.” (Heb. 10:24, 25) Sapos iumi trae for kasem gud samting from olketa meeting hia, bae iumi savve kasem help for gohed long ministry bilong iumi wea hem wanfala barava “gudfala waka”!
[Olketa Kwestin]
1. Hao nao olketa meeting for field service savve helpem iumi?
2. Wanem nao samfala samting wea conductor savve story abaotem?
3. Hao long nao meeting for field service, and wanem nao brata wea leadim grup mas arrangem insaed long datfala taem.
4. Wanem nao bae helpem evriwan for kasem gud samting from olketa meeting bilong field service?
5. Wanem nao main goal bilong olketa meeting for field service?