Olketa Grup for Field Service
1. Why nao iumi laek followim gudfala plan taem iumi go preach?
1 Jesus showim nambawan example for lukaftarem waka for preach abaotem Kingdom long barava gudfala wei. Distaem tu, olketa wea lukaftarem waka for talemaot Kingdom bilong God evriwea long world, barava laek for followim example bilong Jesus. For duim olsem, olketa kongregeson evriwea long world garem grup for field service wea olketa brata and sista savve hipap tugeta bifor olketa go preach.—Matt. 24:45-47; 25:21; Luke 10:1-7.
2. Wanem nao olketa wea leadim grup mas duim taem olketa hipap for go preach?
2 Gudfala Plan: Olketa grup for field service hem for helpem olketa wea bae go long preaching waka for kasem gudfala idea, strong, and direction taem olketa go preach. Storyim lelebet text for datfala day sapos hem fitim for iusim long preaching. Samfala taem olketa savve storyim samfala idea from Kingdom Ministry Bilong Iumi, Reasoning buk, or Ministry Skul buk for redyim olketa wea kam for preaching long datfala day. Iufala savve duim wanfala short demonstration long buk for offerim. Bifor prea, evriwan mas savve firstaem hu nao olketa bae waka witim and territory wea olketa bae preach long hem. Hem gud sapos evriwan go stret long territory bihaen grup hipap. Meeting for field service shud no winim 15 minute.
3. Hu nao mas planim olketa grup for field service?
3 Hao Nao Olketa Grup Organize? Hem waka bilong service overseer for planim gud olketa grup for field service. Hem waka bilong olketa grup overseer or assistant bilong olketa for sapotim field service grup bilong olketa long olketa weekend. Samfala elder and ministerial servant maet fit for go preach witim grup long week day. Olketa grup overseer savve waka tugeta witim service overseer for mek sure olketa garem inaf territory for grup savve preach long haos tu haos long olketa weekend. Service overseer nao lukaftarem waka for mekem plan for olketa wea bae leadim grup long field service insaed long week.
4-6. (a) Long wanem wei nao olketa meeting for field service helpem kongregeson for finisim gud territory? (b) Wanem nao hem gud for tingim taem olketa disaedem olketa grup for field service?
4 Wanem Taem and Ples Nao Olketa Grup Hia Savve Hipap for Field Service? Winim wei for full kongregeson hipap tugeta long wanfala ples nomoa, hem gud for markem samfala difren ples for olketa grup hipap, maet long haos bilong samfala brata for fitim evriwan wea stap long datfala territory. Iumi savve iusim Kingdom Hall tu. Staka kongregeson iusim Kingdom Hall for hipap for grup for field service bihaen pablik tok and Wastaoa study long Sunday. For olketa brata and sista no weistim taem for go long ples for preach, trae hipap klosap long ples for preach. Maet hem gud for reviewim olketa ples for hipap mekem iumi duim gud territory and no missim eni haos.
5 Hem gud for markem olketa gudfala taem for hipap for field service insaed long week for fitim territory. Olketa kwestin hia savve helpem olketa elder for markem ples and taem for grup hipap for preaching wea fitim evriwan.
6 Wanem territory nao iumi mas duim moa? Wanem nao gudfala taem for preach from haos tu haos? Waswe, kongregeson savve markem taem long evening for preach long haos tu haos or for duim return visit? Putim evri field service arrangement bilong kongregeson long notice board. Evri pablisa wea talemaot Kingdom barava laek for duim gud territory bilong olketa and talem sem toktok olsem aposol Paul wea sei: “Bat distaem mi no garem territory wea mi no kasem yet long olketa area hia.”—Rom. 15:23.
7. Wanem nao brata wea leadim grup mas duim?
7 Leadim Olketa Grup for Field Service: Brata wea olketa markem for lukaftarem grup mas showimaot respect for disfala theocratic waka long wei wea hem prepare gud. Hem mas start long barava taem, grup for field service mas short nomoa and for helpem olketa wea hipap, hem shud 10 go kasem 15 minute nomoa. Bifor grup hem start brata wea leadim grup mas savve firstaem wea nao olketa bae preach. Grup no need for weitim olketa wea kam leit bat hem gud for talem eniwan wea nao grup hem go for preach, mekem olketa savve. Hem gud for evriwan go stret long territory bihaen grup hem finis. Olketa grup for field service wea olketa brata redyim gud firstaem savve helpem olketa wea go preach long datfala day.—Prov. 11:14.
8. Long wanem wei nao olketa wea go long grup for field service savve sapotim brata wea leadim olketa?
8 Taem Iumi Go Long Olketa Grup for Field Service: Wei for waka tugeta hem barava important. (Heb. 13:17) Sapos hem fitim, brata wea lukaftarem grup savve markem brata or sista for go witim eniwan wea needim samwan for waka witim. Hem gud sapos olketa pablisa wea savve gud for kam, mekem olketa savve waka witim olketa niu wan and olketa pablisa wea no savve tumas. Sapos olketa willing for waka witim olketa difren brata and sista wea niu or no savve tumas, maet gudfala samting savve kamaot from diswan. (Prov. 27:17; Rom. 15:1, 2) Evriwan mas trae for kam long stretfala taem wea grup hipap. Wei wea iumi tinghae long disfala theocratic wei and tingim olketa brata and sista, savve mekem iumi for changem samfala samting for fitim diswan.—2 Cor. 6:3, 4; Phil. 2:4.
9. Wanem nao samfala gud wei wea olketa pioneer savve showimaot olketa sapotim grup for field service?
9 Sapot Bilong Olketa Pioneer: Wei wea olketa pioneer sapotim grup for field service savve strongim evriwan. Tru tumas, olketa pioneer garem staka waka for duim. Nomata olketa garem Bible study and return visit, olketa garem tu waka for lukaftarem famili bilong olketa and waka for selen. Nomata kongregeson markem grup for preach evriday, diswan no minim olketa pioneer mas evri day go long grup for preaching. Bat hem gud sapos olketa pioneer markem samfala day long week for go joinim grup for preach. From olketa grup for field service hem savve trainim olketa narawan long kongregeson, spiritual savve and experience bilong olketa pioneer savve barava helpem olketa narawan. Wei wea olketa evritaem go aot long preaching waka, hem helpem olketa for kamap gud long wei for preach. Olketa savve helpem narawan. Wei wea olketa strong for preach and joinim grup for field service, hem gudfala example for olketa narawan followim. Olketa brata tinghae long wei wea olketa pioneer duim part bilong olketa long meeting olsem.
10. Why nao hem gud for olketa Kingdom pablisa barava sapotim disfala wei for preach?
10 Olsem Jesus and olketa disaepol bilong hem duim, iumi tu duim bigfala waka for preach abaotem Kingdom taem iumi preach from haos tu haos. Olketa grup for field service hem for helpem and strongim iumi for duim gud disfala waka. Evri pablisa wea talemaot gud nius mas traem best bilong olketa for sapotim disfala wei for preach. (Acts 5:42; 20:20) Hem gud for iumi evriwan mas barava sapotim diswan. Taem iumi duim olsem, iumi savve Jehovah bae barava blessim iumi and datwan bae mekem Jesus Christ wea hem leadim iumi for hapi taem iumi preachim gud nius abaotem Kingdom bilong God.—Matt. 25:34-40; 28:19, 20.