Big Waka Evriwea Long World for Talem Pipol Abaotem “Followim Christ!” Distrik Convention
Narataem Moa Olketa Pablisa Bae Givimaot Spesol Smol Pepa
1 Last year, datfala waka evriwea long world for talem pipol abaotem “Salvation Hem Klosap!” Distrik Convention barava muvim pipol wea interest. Olketa wea acceptim datfala spesol invitation and kam long convention, hem firstaem for olketa enjoyim staka spiritual kaikai witim Olketa Jehovah’s Witness. (Isa. 65:13) Olketa enjoyim wei for kaban witim olketa Christian brata wea garem wan mind and wea showimaot love. (Ps. 133:1) For helpem plande pipol for kam long “Followim Christ!” Distrik Convention, iumi bae duim moa waka for givimaot spesol smol pepa evriwea long world.
2 Samting wea Kamaot From Last Year: Olsem olketa report evriwea long world showimaot, barava gud samting kamaot from wei wea iumi talem pipol abaotem “Salvation Hem Klosap!” Distrik Convention. Long plande ples olketa niuspepa storyim gud samting abaotem diswan. Olsem example, long wanfala taon, wanfala niuspepa story olsem abaotem disfala waka: “Bifor convention hem kamap, olketa Witness trae hard for kasem evriwan long area bilong olketa. Olketa waka plande moa hour, wakabaot long olketa farawe ples, and story kwiktaem witim pipol.” Disfala waka for givimaot smol pepa mekem television, radio, and olketa niuspepa long nara taon barava story abaotem diswan. Thrifala niuspepa storyim gud samting abaotem waka bilong iumi bifor convention hem kamap. Wanfala niusman raetem staka difren article wea iusim winim tufala page insaed Sunday niuspepa. Hem storyim samting wea iumi bilivim, wei wea iumi garem wan mind witim olketa Christian brata bilong iumi, waka for givimaot smol pepa, and abaotem convention. Taem wanfala pablisa givim invitation long wanfala woman, woman hem katem story bilong pablisa hia and hem sei: “Mi just read abaotem datwan nomoa long niuspepa!” Nara haosholder sei olsem: “Mi just read nomoa abaotem iufala, and iu long hia nao! Waswe, datwan hem invitation bilong mi?” Hem sei moa, “Diswan hem barava gudfala samting nao iufala Olketa Jehovah’s Witness duim.”
3 Plande pipol wea interest kam long olketa ples for convention and holem datfala invitation pepa. Samfala pipol wea interest draev from olketa taon wea stap farawe for attendim convention. From iumi waka hard for invaetem narawan, plande moa pipol kam long convention. Olsem example, pipol wea kam long convention long wanfala kantri hem 27 percent winim year bifor.
4 Full Territory: Iu savve start for givimaot smol pepa thrifala week bifor convention bilong iu kamap. Kongregeson shud trae hard for duim full territory. Long olketa kongregeson wea garem bigfala territory, olketa pablisa savve leavim smol pepa long haos bilong pipol wea no stap long lastfala week bifor convention hem kamap, bat iusim gudfala tingting saed long wea nao for putim datwan. Olketa kongregeson shud trae hard for givimaot evri smol pepa and for duim full territory. Sapos eni pepa hia hem leftova, olketa pioneer long kongregeson savve help for givimaot olketa.
5 Wanem for Talem: Maet iu savve sei: “Mifala share long wanfala waka evriwea long world for givimaot disfala invitation pepa for wanfala important samting wea bae kamap. Diswan hem bilong iu. Disfala invitation pepa hem storyim plande samting moa abaotem diswan.” Wei for story lelebet taem nomoa bae mekem moa pipol kasem disfala invitation. Bat sapos haosholder askem olketa kwestin, iusim taem for ansarem olketa. Sapos man showimaot interest, raetem evri samting abaotem datwan and kwiktaem go bak for visitim hem.
6 Hem important tumas for iumi waka hard for followim Christ! (John 3:36) Distrik convention bilong iumi bae helpem evriwan wea attend for duim datwan. Iumi sure diswan bae givim bigfala witness olsem last year from iumi evriwan bae duim big waka for talem pipol abaotem “Followim Christ!” Distrik Convention. So trae hard for invaetem plande pipol for kam. Jehovah bae blessim hard waka bilong iu taem iu share long disfala waka wea kamap evriwea long world.