Waswe, Iu Regular Pioneer Bifor?
1. Wanem privilege nao staka pablisa enjoyim bifor, bat wanem nao samfala duim distaem?
1 Long olketa year wea go pas, staka thousand pablisa nao enjoyim privilege long full taem service for “talemaot gud nius.” (Acts 5:42) Bat samfala long olketa hia no gohed for pioneer distaem bikos long samfala reason. Sapos iu regular pioneer bifor, waswe, iu enitaem lukluk gud long living bilong iu for tingim sapos iu fit for pioneer moa?
2. Why nao olketa pablisa wea pioneer bifor shud lukluk gud moa long living bilong olketa?
2 Living Hem Change: Maet samting wea mekem iu for no gohed pioneer bifor hem nomoa nao. Olsem example, sapos iu no gohed for pioneer bikos hem hard for iu kasem 90 hour for wanfala month, waswe, iu savve pioneer moa bikos distaem hem 70 hour? Waswe, distaem iu no need for duim staka waka for selen or waka saed long famili, wea mekem iu stop long pioneer waka? Wanfala sista wea hem no gohed for pioneer bikos saed long health, hem start for pioneer moa nomata hem 89 year. For wanfala full year hem no gogo long hospital, and hem tingse from datwan bae hem fit for pioneer moa!
3. Wanem nao olketa long famili savve duim for helpem samwan long famili for pioneer?
3 Maet iu no pioneer bifor, bat samwan long famili no gohed for pioneer, bikos hem mas lukaftarem samwan long famili, olsem dadi or mami wea olo. (1 Tim. 5:4, 8) Sapos olsem, waswe, iu or olketa narawan long famili savve helpem olketa for pioneer moa? Hem gud for famili storyim tugeta olketa samting hia! (Prov. 15:22) Taem famili waka tugeta for mekem samwan long famili savve pioneer, hem barava gud samting.
4. Waswe sapos iu no fit for pioneer distaem?
4 No feel nogud sapos living bilong iu distaem mekem hard for iu pioneer moa. Jehovah hem tinghae long wei iu laek for pioneer. (2 Cor. 8:12) Iusim savve wea iu kasem taem iu pioneer bifor, long ministry bilong iu distaem. Prea abaotem wei wea iu laek for pioneer, and redi for olketa chance wea kamap mekem iu changem living bilong iu. (1 John 5:14) Maet gogo, Jehovah bae givim iu “chance for duim staka waka” mekem iu gohed moa for enjoyim regular pioneer waka!—1 Cor. 16:9.