Distaem Nao Hem Taem for Preach!
1. Why nao distaem nao hem taem for preach?
1 “Fraet long God and givim glory long hem.” Thru long lead bilong olketa angel, pipol bilong Jehovah talemaot datfala message long “evri nation and tribe and languis and pipol.” Why nao olketa talemaot? “From hour bilong judgment bilong [God] kam finis nao.” Distaem iumi stap insaed “hour bilong judgment,” wea bae lead go long wei for God distroem disfala world. Hem barava important for pipol mas “worshipim Datwan wea mekem heven and earth and sea and evri wata.” Disfala waka for talemaot “gud nius for olowe” hem important winim evri nara waka. Tru nao, distaem nao hem taem for preach!—Rev. 14:6, 7.
2. Wanem nao showimaot olketa servant bilong Jehovah luksavve taem wea iumi stap insaed distaem hem important tumas?
2 Insaed tenfala year wea go pas finis, olketa servant bilong Jehovah iusim samting olsem 12 billion hour for preach abaotem Kingdom and mek disaepol. Staka changem living bilong olketa mekem olketa savve iusim moa taem for duim spiritual harvest waka. (Matt. 9:37, 38) Olsem example, last year, average bilong winim 850,000 pablisa pioneer each month. Evri month olketa regular pioneer mas iusim average bilong 70 hour for preach. Olketa auxiliary pioneer hem 50 hour.
3. Olketa wanem change nao olketa pablisa savve duim for mekem olketa fit for pioneer?
3 Hao for Pioneer: From olketa pioneer luksavve hao “taem wea stap yet hem short,” olketa duim best for garem simpol living. (1 Cor. 7:29, 31) Olketa lukaotem olketa wei for mekem living hem moa simpol mekem olketa no need for iusim staka taem for waka for selen. Olsem example, samfala garem haos wea no big tumas. Olketa narawan salem olketa material samting wea olketa no needim. (Matt. 6:19-21) Plande taem olketa finis for aftarem olketa samting for seleva. Olketa duim olsem mekem olketa savve iusim moa taem long ministry. (Eph. 5:15, 16) Wei for no givap kwiktaem, willing for sakrifaesim samfala samting, and for depend long Jehovah thru long prea, mekem staka pablisa fit for garem schedule wea helpem olketa for pioneer.
4. Olketa wanem samting nao iu savve duim wea bae helpem iu kasem goal for pioneer?
4 Waswe, iu savve pioneer? Bae hem gud sapos iu askem olketa pioneer wea win long diswan for talem hao nao olketa fit for duim. Waka witim olketa long field ministry, and kasem hapi wea olketa garem. Readim and ting raonem olketa article abaotem wei for pioneer long olketa pablikeson bilong iumi. Markem olketa goal wea iu fit for kasem wea bae lead go long wei for iu savve pioneer. Sapos distaem samfala samting stopem iu for pioneer, prea long Jehovah abaotem olketa samting hia and askem hem for helpem iu deal witim datwan.—Prov. 16:3.
5. Hao nao wei for pioneer helpem iumi for kamap moabeta long ministry?
5 Olketa Blessing and Hapi: Pioneer waka mekem iumi kamap moabeta long hao for iusim Word bilong God, wea datwan mekem iumi barava hapi. Wanfala young pioneer sista sei: “For savve hao for iusim Word bilong God long stretfala wei, hem wanfala blessing. Taem iu pioneer, iu iusim Bible evritaem. Taem mi go haos tu haos distaem, mi savve tingim olketa scripture wea fitim each haosholder.”—2 Tim. 2:15.
6. Wanem training nao man kasem taem hem pioneer?
6 Pioneer waka teachim tu olketa important samting wea savve helpem iumi long laef. Hem savve helpem young pipol long hao for iusim gud selen, taem, and hao for fren gud witim nara pipol. Pioneer waka helpem staka for garem spiritual tingting. (Eph. 4:13) And tu, plande taem olketa pioneer garem nambawan privilege for lukim Jehovah helpem and rewardim olketa.—Acts 11:21; Phil. 4:11-13.
7. Hao nao pioneer waka helpem iumi for fren gud witim Jehovah?
7 Wanfala barava nambawan blessing nao hem wei wea pioneer waka helpem iumi for fren gud witim Jehovah. Diswan savve strongim iumi taem iumi kasem olketa hard taem. Wanfala sista wea gohed strong taem hem kasem wanfala barava hard taem, hem sei: “Wei wea mi mekem grow gudfala wei for fren witim Jehovah taem mi pioneer hem helpem mi for gohed strong long olketa hard taem wea mi kasem.” Hem sei moa: “Mi hapi tumas from mi iusim laef bilong mi for servem Jehovah full taem. Diswan helpem mi for duim olketa samting wea mi tingse bae mi no savve duim.” (Acts 20:35) Iumi tu bae kasem olketa nambawan blessing taem iumi duim best long disfala barava important waka for preach.—Prov. 10:22.