Long Olketa wea Readim Disfala Magasin

MIFALA hapi for talem iufala hao start long disfala magasin samfala change bae kamap long Wastaoa. Mifala laek for explainim olketa change hia, bat firstaem, mifala laek for storyim olketa samting wea bae no change.

Nem bilong disfala magasin, Wastaoa wea Talemaot Kingdom Bilong Jehovah, bae no change. So Wastaoa magasin bae gohed for honorim Jehovah olsem tru God and storyim datfala gud nius abaotem Kingdom for givim comfort long iumi. Olketa article long page 5 go kasem 9 long disfala magasin storyim wanem nao datfala Kingdom and long wanem taem nao bae hem kam. And tu, Wastaoa magasin bae gohed for helpem pipol garem strongfala faith long Jesus Christ, sapotim truth wea insaed Bible, and explainim hao olketa samting wea happen long world fulfillim olketa profesi insaed Bible, wea hem nao disfala magasin long English duim for winim wan handred year finis.

So wanem samting nao bae difren long disfala magasin? Samfala niu samting wea interesting tumas bae kamap insaed long Wastaoa magasin wea garem date namba 1 long each month.a

Samfala article bae kamap wea bae encouragem pipol for tingting gud raonem samting. Article wea garem title, “Waswe, Iu Savve Finis?” bae storyim interesting information wea helpem iumi minim gud go moa samfala story insaed long Bible. Datfala article “Fren Gud Witim God” bae storyim samting wea iumi savve lanem abaotem Jehovah from samfala story long Bible. Article wea garem title, “Samfala Ask Olsem” bae ansarem olketa kwestin wea staka pipol garem abaotem olketa samting long Bible. Olsem example, plande pipol laek savve, “Waswe, Kingdom bilong God hem long heart bilong iu?” Bae iu kasem ansa for datwan long page 13.

Plande article insaed long magasin hem for helpem olketa famili. Article wea garem title, “Wanem Nao Bae Mekem Famili Stap Gud?,” bae story abaotem olketa difren kaen problem wea olketa famili savve kasem and hao olketa principle insaed long Bible savve help for stretem olketa problem olsem. “Lanem Pikinini Bilong Iu” hem wanfala article wea olketa dadi and mami shud readim witim olketa pikinini bilong olketa. Samfala magasin bae garem article, “For Young Pipol.” Diswan bae garem wanfala Bible study project wea fitim olketa young wan.

Samfala nara article savve kamap samfala taem. Datfala article, “Followim Faith Bilong Olketa,” bae encouragem iumi for followim example bilong samwan insaed long Bible. Olsem example, long page 18 go kasem page 21 long disfala magasin, bae iu readim wanfala nambawan story abaotem profet Elijah and lane hao iumi savve followim faith bilong hem. Article wea garem title, “Wanfala Leta From . . . ” hem wanfala report from olketa missionary and olketa narawan from olketa difren ples long world. “Samting Iumi Lanem From Jesus” bae storyim olketa main teaching insaed Bible long simpol wei.

Mifala sure plande pipol wea respectim Bible and wea laek for savve long really samting wea Bible teachim bae interest for gohed readim Wastaoa magasin. Mifala hope disfala magasin bae satisfaem wei wea iu laekem tumas for savve long olketa tru samting insaed Bible.

OLKETA WEA PABLISIM

[Footnote]