Taem Iumi Preach Long Samwan wea Story Long Difren Languis
1. Taem iumi preach long wanfala ples, why nao hem gud for waka tugeta?
1 Long staka ples long world, staka taem olketa Kingdom pablisa savve meetim pipol wea story long languis wea difren long languis wea kongregeson iusim. For helpem pipol olsem, staka branch startim olketa difren languis grup and kongregeson. From olketa pipol wea stap long wanfala ples savve story long olketa difren languis, samfala kongregeson wea iusim olketa difren languis olsem savve preach long datfala ples. Hao nao olketa kongregeson wea iusim difren languis savve waka tugeta for preach long gudfala wei?—1 Cor. 14:33.
2. Taem iumi preach long haos tu haos, hao nao iumi savve waka tugeta witim olketa difren languis grup or kongregeson long ples wea iumi preach?
2 Waka Gud Tugeta: Taem wanfala pablisa duim street witnessing or enitaem witnessing, hem mas no hol bak for story witim evriwan, nomata long pipol wea story long difren languis and for givim literature long languis bilong datfala man. Bat taem pablisa preach long haos tu haos long wanfala ples wea narafala languis grup or kongregeson tu savve duim, hem mas preach nomoa long olketa haos wea story long sem languis wea kongregeson bilong hem iusim. Taem olketa difren languis kongregeson preach long wanfala ples, hem barava important for iumi organize gud and for keepim record bilong olketa wea iusim difren languis. Olketa service overseer from olketa kongregeson mas story gud tugeta and duim evri samting followim gudfala wei. (Prov. 11:14) Bat sapos pablisa meetim samwan wea story long difren languis taem hem preach long haos tu haos and no eni kongregeson wea iusim datfala languis stap klosap, datfala pablisa mas trae for helpem hem.
3. Wanem nao iumi savve duim taem iumi meetim samfala pablisa long difren languis grup or kongregeson wea preach long sem ples iumi preach?
3 Iumi Evriwan Duim Sem Waka: Taem samfala pablisa long olketa difren kongregeson preach long sem ples long sem day, wanem nao olketa savve duim? Love wea iumi garem bae muvim iumi for preach and waka tugeta nomata pipol story long difren languis long ples wea iumi preach. (John 13:34, 35) Dastawe, olketa wea leadim grup showimaot love sapos olketa disaed for wanfala grup savve go long difren ples for preach.—Jas. 3:17, 18.
4. Wanem profesi long Bible nao kamap tru distaem?
4 Bible talem finis hao olketa pipol wea story long difren languis bae herem gud nius. (Rev. 14:6, 7) Taem iumi evriwan waka gud tugeta, diswan bae helpem iumi for no mekem olketa pablisa long tufala difren languis grup or kongregeson for duim sem haos, and datwan bae helpem staka pipol for herem gud nius. Datwan minim tu olketa wea story long difren languis.—Eph. 4:16.