LAEF BILONG CHRISTIAN
Waka Tugeta for Preach Long Pipol wea Iusim Olketa Difren Languis
Long Pentecost 33 C.E., “olketa Jew wea lotu gud” and wea “kam from evri kantri long world” kam long Jerusalem. Luk olsem olketa Jew hia savve long Hebrew or Greek languis. So why nao Jehovah mekem wei for olketa herem gud nius long languis bilong olketa seleva? Bikos staka taem pipol savve interest long Kingdom message taem olketa herem long languis bilong olketa seleva. (Ac 2:5, 8) Distaem, maet tu-thri kongregeson wea iusim olketa difren languis savve preach long pipol wea stap insaed sem territory. Hao nao olketa kongregeson hia savve waka gud tugeta for mek sure olketa preach long evriwan long territory bat no duim sem territory evritaem or long sem taem witim nara kongregeson, wea datwan savve mekem olketa haosholder feel nogud?
Story Tugeta (Provebs 15:22): Olketa service overseer shud story tugeta and disaedem best wei for olketa kongregeson hia duim preaching waka. Sapos territory bilong kongregeson wea preach long difren languis hem smol, maet olketa no laekem kongregeson bilong iu for preach long haos bilong pipol wea iusim datfala languis. Bat, sapos territory hem big, maet datfala kongregeson laekem kongregeson bilong iu for preach long evri haos and talem olketa taem iu faendem samwan long datfala languis wea interest. (od-E 93 par. 37) Or maet olketa askem kongregeson bilong iu for lukaotem pipol wea story long languis bilong olketa and givim address bilong pipol hia long olketa. (km 7/12 5, box) Tingim, nomata pipol stap tugeta long wanfala haos, maet samfala iusim wanfala languis and olketa narawan iusim difren languis. Tingim tu, eni arrangement for duim territory shud followim olketa law wea protectim information bilong pipol.
Waka Gud Tugeta (Eph 4:16): Mek sure iu followim gud eni direction wea service overseer talem. Waswe, iu study witim samwan wea maet laek for study long languis wea difren from languis bilong kongregeson bilong iu? Maet hem gohed gud long spiritual wei sapos iu arrange for hem study witim samwan long kongregeson or grup wea iusim languis bilong hem.
Prepare (Provebs 15:28; 16:1): Sapos iu meetim samwan long territory wea iusim difren languis, duim best bilong iu for storyim gud nius long hem. Hem gud for ting raonem firstaem wanem languis nao difren pipol long territory iusim, then daonlodim Bible or olketa video long languis hia long mobile or tablet bilong iu. Iu savve iusim JW Language app for lane hao for startim story long samfala languis.