Study Seleva and Famili Bible Study Hem Important Tumas!
1. Governing Body trae hard for duim wanem for iumi distaem, and why nao olsem?
1 Olsem long first century, Governing body hem trae hard for lukaftarem pipol bilong Jehovah. (Acts 15:6, 28) From datfala big trabol hem klosap tumas, hem barava important for evri pablisa strongim go moa wei wea olketa fren witim Jehovah. Wanem nao bae iu duim long taem wea bifor iu iusim for go long Kongregeson buk study? Evriwan savve iusim taem hia for duim famili worship. Taem iumi iusim gudfala taem hia, diswan bae helpem iumi for studyim gud go moa toktok bilong God and kasem gudfala samting from olketa teaching.—Ps. 1:1-3; Rom. 11:33, 34.
2. Wanem nao iumi savve duim long naet for famili study bilong iumi?
2 Naet for Famili Study: Olketa famili hed garem waka wea kam from Jehovah for garem gudfala famili Bible study evritaem. (Deut. 6:6, 7) Olketa brata and sista wea no marit and wea no garem eni waka for lukaftarem famili, savve iusim taem hia for duim study seleva and for study gud long Bible. Hem important tumas for iumi evriwan ‘baem bak taem’ for duim study seleva and for ting raonem wanem iumi studyim, mekem iumi fit for gohed fren gud witim Jehovah long olketa ‘day wea nogud tumas.’—Eph. 5:15, 16.
3, 4. Wanem nao iumi savve iusim for duim study, and wanem nao iumi trae for duim?
3 Wanem for Iusim: Watch Tower Publications Index or Watchtower Library long CD-ROM savve helpem iu faendem samting for studyim wea evriwan savve enjoyim. Famili savve lukluk long olketa story long Wastaoa wea savve kamap evritaem, olsem: “Wanem Nao Bae Mekem Famili Stap Gud?,” “Lanem Pikinini Bilong Iu,” and “For Young Pipol.” Awake! tu garem olketa “Young Pipol Ask” story and staka naesfala story abaotem wanem Jehovah wakem.
4 Taem famili no hariap for readim Bible tugeta, datwan bae helpem evriwan long famili for tingim and followim wanem olketa lanem abaotem toktok bilong God. (Heb. 4:12) Samfala taem maet iu lukim wanfala video wea organization hem wakem and story raonem. Iu savve chusim staka difren samting for studyim and hao for duim. Iu savve askem famili tu wanem nao olketa laek studyim and hao olketa laek for duim.
5. Why nao wei for study seleva and famili Bible study hem important tumas distaem?
5 Why Hem Important Distaem: Taem iumi strongim wei wea iumi fren witim Jehovah, datwan bae helpem iumi for “stand strong and lukim wei wea Jehovah bae sevem [iumi].” (Ex. 14:13) Olketa mami and dadi needim savve bilong God for leadim olketa pikinini ‘midolwan long wanfala nogud and olobaot genereson.’ (Phil. 2:15) Olketa pikinini needim help for no followim olketa nogud wei long olketa skul distaem. (Prov. 22:3, 6) Olketa wea marit mas strongim wei wea olketa fren witim Jehovah, datfala “rope wea garem thrifala string.” (Eccl. 4:12) Iumi mas iusim gudfala taem wea iumi garem for strongim iumiseleva long “holy faith”!—Jude 20.