Preaching Bilong Iumi Showimaot Love for God
1. Wanem nao Jesus duim from hem lovem God?
1 Love mekem Jesus strong for preach. Preaching waka wea Jesus duim barava pruvim love bilong hem for Jehovah. Jesus sei: “For mekem pipol long world savve mi lovem Dadi long heven, mi duim samting wea Dadi talem long mi.” (John 14:31) Iumi olketa disaepol bilong Jesus tu hapi for duim preaching for showimaot iumi barava lovem God.—Matt. 22:37; Eph. 5:1, 2.
2. Long wanem wei nao iumi showimaot iumi lovem Jehovah taem iumi preach?
2 “Mifala Laekem Nem Bilong Iu for Stap Holy”: Iumi showimaot iumi lovem God and iumi help for mekem nem bilong hem for stap holy, taem iumi strong for story evritaem abaotem Jehovah and Kingdom bilong hem long pipol. (Ps. 83:18; Ezek. 36:23; Matt. 6:9) Olsem Jesus, preaching bilong iumi showimaot iumi barava laekem nem bilong Jehovah for stap holy and for evri samting wea hem plan for duim for kamap tru.—Matt. 26:39.
3. Hao nao wei wea iumi lovem Jehovah bae helpem iumi for winim olketa hard taem?
3 Love Strongim Iumi for Winim Olketa Hard Taem: Love bilong iumi for Jehovah savve helpem iumi for winim eni problem. (1 Cor. 13:4, 7) Staka samting happen wea fit for stopem Jesus for duim preaching waka bilong hem. Bat hem winim olketa hard taem wea kasem hem bikos hem lovem Jehovah and laek for duim wanem God laekem. (Mark 3:21; 1 Pet. 2:18-23) Iumi tu kasem olketa hard taem, bat from iumi lovem God, datwan savve helpem iumi for winim olketa hard taem hia. Taem iumi gohed followim gud wanem Christ duim, iumi bae strong and no eni samting bae stopem iumi for duim preaching. From iumi lovem Jehovah, iumi bae gohed for duim preaching waka nomata olketa samting olsem sik, gogo for olo, pipol no interest, famili againstim iumi maet trae for stopem iumi.
4. Wanem nao iumi savve duim for showimaot iumi lovem Jehovah?
4 Love hem barava spesol and preaching waka hem nambawan waka wea iumi savve duim for showimaot iumi lovem God. (1 Cor. 13:13) Distaem iumi barava klosap long taem wea nem bilong Jehovah bae stap holy for olowe and iumi laekem ‘love bilong iumi for kamap big moa.’—Phil. 1:9; Matt. 22:36-38.