Wanem for Talem Abaotem Olketa Magasin

Wastaoa January-March

“Staka famili distaem faendem laef hem no isi. Wanem nao iu tingim sapos evriwan long famili trae for followim wei bilong Jesus? [Readim Matthew 20:28. Weit for hem ansa.] Disfala article storyim faevfala leson wea olketa famili savve lanem from example bilong Jesus.” Showim story wea start long page 10.

Awake! January

Readim Acts 17:31a and sei olsem: “Staka pipol fraet taem olketa herem story abaotem Judgment Day. Wanem nao tingting bilong iu abaotem diswan? [Weit for hem ansa.] Bible teachim hao long Judgment Day, staka gud samting bae kamap long earth and disfala article hem story abaotem datwan.” Showim article wea start long page 10.

The Watchtower February 1

“Staka pipol tingse bae olketa go long heven taem olketa dae. Waswe, iu ting olsem tu? [Weit for hem ansa.] Lukim gud samting wea Bible storyim wea staka gud pipol bae kasem. [Readim Psalm 37:29.] Disfala magasin storyim samting wea Bible talem abaotem olketa wea bae go long heven and samting wea bae olketa duim.”

Awake! February

“Wei for divorce hem kamap big distaem. Iu tingse staka hasband and waef ting raonem evri samting bifor olketa disaed for divorce? [Weit for hem ansa. Then readim Proverbs 14:15.] Disfala magasin storyim fofala samting wea hasband and waef shud ting raonem bifor olketa disaed for divorce.”