Givimaot Memorial Pepa Evriwea Long World!
1. Wanem spesol waka nao bae kamap evriwea long world bifor Memorial?
1 “Gohed for duim diswan for showimaot iufala tingim mi.” (Luke 22:19) For obeyim komand bilong Jesus, olketa wea worshipim Jehovah witim olketa narawan wea interest, bae rememberim dae bilong Jesus long March 30, 2010. Start long March 13 go kasem March 30, iumi bae givimaot wanfala spesol pepa evriwea long world for askem pipol for kam long Memorial.
2. Hao nao for offerim Memorial pepa?
2 Hao for Offerim Memorial Pepa: Iu savve givim Memorial pepa long haosholder and showim hem piksa long kava, and sei: “Long March 30, bihaen sun go daon staka million pipol evriwea long world bae hipap for rememberim dae bilong Jesus. Mi laek givim disfala pepa for iu and famili bilong iu, for iufala savve kam long Memorial. Iu savve talem olketa fren bilong iu for kam tu.” Talem ples and taem wea disfala hipap bae kamap. Sapos hem fitim, iu savve readim Luke 22:19 for showim samting Bible talem. Tingim, from iumi no garem staka taem for givimaot pepa, trae for no story longtaem.
3. Hu nao iumi savve askem for kam long Memorial?
3 Sapos kongregeson bilong iu garem big territory, maet olketa elder savve talem iu for leavim olketa pepa long haos wea no eniwan stap. Sapos hem fitim, iu savve offerim olketa magasin tu taem iu givimaot datfala pepa. Iu savve askem olketa return visit, Bible study, man wea iu waka witim, skulfren, relative, neiba, and olketa narawan wea iu savve long olketa.
4. Wanem nao iumi savve duim for showimaot iumi tinghae long ransom wea Jehovah givim?
4 Redi for Duim Disfala Waka: Long taem bilong Memorial, hem gudfala taem for duim moa long preaching waka. Maet iu savve plan for auxiliary pioneer! Waswe, iu garem pikinini or Bible study wea gohed gud? Sapos olsem, story witim olketa elder for savve sapos hem fit for kamap pablisa wea no baptaes for joinim disfala spesol waka. Taem iumi tinghae long love wea Jehovah showimaot long wei for givim disfala ransom, diswan bae mekem iumi for kam long Memorial and askem staka moa for hipap witim iumi.—John 3:16.