Waka for Givimaot Memorial Pepa Bae Start Long April 2
1. Wanem taem nao iumi bae start for givimaot Memorial pepa, and wanem gud samting nao savve kamaot from datfala waka?
1 Start long April 2 go kasem April 17, iumi bae givimaot Memorial pepa for invaetem pipol for kam long wanfala barava important hipap long year, wea hem nao Memorial abaotem dae bilong Christ. Long olketa year wea go pas, staka pipol wea interest and kasem Memorial pepa, olketa kam long datfala hipap. Olsem example, long day bilong Memorial, wanfala woman hem ring kam long branch and hem sei olsem: “Mi just kasem haos, and mi lukim wanfala pepa andanit door. Mi laek for kam, bat mi no sure long wanem taem.” Brata hem explainim hao woman hia savve lukim long datfala pepa, taem wea Memorial bae start. Then woman hia finisim story and sei, “Mi bae kam long datfala hipap tunaet!”
2. Wanem nao iumi savve talem taem iumi givimaot Memorial pepa?
2 Hao for Duim Datfala Waka: From iumi no garem staka taem for duim evri territory, hem gud for no story tumas. Maet iumi sei olsem: “Hello. Mifala laek for givim disfala pepa long famili bilong iu for invaetem iufala kam long wanfala important hipap wea bae kamap evriwea long world long Sunday, April 17. [Givim Memorial pepa long haosholder.] Long kalenda bilong iumi distaem, hem nao barava day wea Jesus hem dae. Wanfala free Bible tok bae kamap wea bae explainim hao iumi savve kasem gudfala samting from dae bilong Christ. Iu savve lukim long disfala pepa ples and taem for datfala hipap.”
3. Hao nao iumi savve askem staka pipol for kam long Memorial?
3 Sapos kongregeson garem bigfala territory, maet olketa elder talem iu for leavim datfala pepa long olketa haos wea no eniwan stap. Mek sure iu askem olketa return visit, relative, waka fren, skul fren, and olketa nara fren bilong iu. Taem iu givimaot Memorial pepa long olketa weekend, offerim olketa magasin sapos hem fitim. Waswe, iu savve auxiliary pioneer long April and duim moa long disfala waka for givimaot Memorial pepa?
4. Why nao iumi laekem olketa wea interest for kam long Memorial?
4 Pipol wea interest for kam long Memorial bae kasem barava gud samting! Olketa bae herem hao Jehovah showimaot bigfala love long wei wea hem givim Son bilong hem for dae for iumi. (John 3:16) Olketa bae lanem hao Kingdom bilong God bae helpem olketa man. (Isa. 65:21-23) And tu, olketa bae garem chance for story witim olketa attendant and ask for wanfala Bible study for olketa lane go moa. Mifala prea hao staka pipol wea interest for lane abaotem Jehovah bae acceptim pepa and kam joinim iumi long Memorial!