Spesol Waka for Askem Pipol Kam Long Memorial Bae Start Long March 17
1. Wanem kaen spesol waka nao bae start long March 17?
1 Taem iumi go long Memorial evri year, datwan showimaot iumi tinghae long dae bilong Jesus. (1 Cor. 11:26) Iumi laekem olketa narawan tu for kam hipap witim iumi and for herem hao Jehovah givim ransom wea hem wanfala nambawan present. (John 3:16) Spesol waka for askem pipol kam long Memorial disfala year bae start long Saturday, March 17. Waswe, iu luk forward for busy long disfala spesol waka?
2. Taem iu givimaot Memorial pepa, wanem nao iu savve talem?
2 Wanem Iumi Savve Talem: Mekem story bilong iu short nomoa. Maet iu sei: “Hello. Mifala laek for givim disfala pepa long famili bilong iu for askem iufala kam long wanfala important hipap wea bae kamap evriwea long world long April 5. Wanfala free Bible tok bae explainim gud samting wea kamaot from dae bilong Jesus and wanem hem duim distaem. Iu savve lukim long disfala pepa ples and taem for datfala hipap.” Taem iu givimaot Memorial pepa long olketa weekend, offerim olketa magasin sapos hem fitim.
3. For staka pipol kam long Memorial, wanem nao iumi savve duim?
3 Askem Staka Pipol for Kam: Goal bilong iumi hem for askem staka pipol for kam. Mek sure iu askem olketa Bible student, return visit, relative, waka fren, skul fren, and olketa nara fren bilong iu. Olketa elder bae talem iumi hao for duim full territory. Gud samting nao kamaot from iumi duim disfala spesol waka for askem pipol for kam long Memorial evri year. Last year taem wanfala woman kam long Memorial, wanfala attendant sei bae hem lukaotem pablisa wea askem datfala woman for kam. Bat woman hia sei, hem no savve long eniwan, bikos hem kasem nomoa datfala pepa from samwan wea kam raon long olketa haos long datfala day.
4. Why nao hem gud for iumi busy long disfala spesol waka?
4 Maet samwan wea attendim Memorial hem wanfala wea iu givim pepa long hem. Nomata olketa kam or nomoa, from iu busy long disfala waka hem wanfala witness long pipol. Olketa pepa wea iu givimaot bae storyim hao Jesus hem wanfala King distaem. And tu, waka wea iu duim bae showim pipol long territory, olketa narawan long kongregeson, and main wan nao Jehovah, hao iu barava tinghae long datfala ransom, wea hem wanfala nambawan present.—Col. 3:15.