Showimaot Iumi Tinghae Long Nambawan Present wea God Givim
1. Why nao iumi barava thankiu long Jehovah?
1 Dae bilong Jesus nao hem nambawan present wea winim ‘evri gud samting’ wea Jehovah givim. (Jas. 1:17) Datwan mekem iumi for kasem staka blessing, and for God forgivim iumi. (Eph. 1:7) And iumi evritaem tinghae long diswan. Long taem bilong Memorial, hem gud for iumi ting raonem disfala nambawan present.
2. Wanem nao famili and iuseleva savve duim for gohed tinghae long dae bilong Jesus?
2 Helpem Famili for Gohed Tinghae: Hem gud for markem taem for story raonem dae bilong Jesus taem iufala duim Famili Worship long olketa week bifor Memorial, wea bae kamap long March 30. Diswan bae helpem famili bilong iufala for gohed tinghae long dae bilong Jesus. And tu, hem gud for famili duim spesol Memorial Bible reading. Ting raonem gud samting wea iu kasem from dae bilong Jesus and hao hem affectim tingting bilong iu abaotem Jehovah, iuseleva, olketa narawan, and abaotem future bilong iu.—Ps. 77:12.
3. Hao nao iumi savve showimaot iumi tinghae?
3 Olketa Wei for Showimaot Iumi Tinghae: Wei wea iumi tinghae long dae bilong Jesus, bae mekem iumi laek for talem pipol abaotem Jehovah and abaotem love wea hem garem for sendem kam Son bilong hem. (Ps. 145:2-7) Long month bilong March, April, and May, samfala famili showimaot olketa tinghae, taem olketa markem eniwan long famili for duim auxiliary pioneer. Sapos hem no isi, waswe, iu savve ‘markem taem’ for duim samfala samting moa long ministry? (Eph. 5:16) Nara samting tu, wei for showimaot iumi tinghae savve mekem iumi for helpem olketa narawan for kam long Memorial. (Rev. 22:17) So start for raetem nem bilong olketa wea iu laek invaetem, olsem olketa return visit, Bible study, relative, pipol wea iu waka witim, and olketa neiba, and duim best bilong iu for givimaot spesol Memorial pepa.
4. Wanem gud samting nao iumi savve duim long taem bilong Memorial?
4 Long taem bilong Memorial, hem nara chance for showimaot long Jehovah iumi tinghae long present wea hem givim for iumi. Hem gud for iumi iusim gud disfala taem for gohed showimaot iumi tinghae long dae bilong Jesus, and olketa ‘nambawan samting wea Christ duim wea tingting bilong iumi no savve kasem.’—Eph. 3:8.