Waswe, Iu Tinghae?
Memorial Hem Chance for Showimaot Datwan
1. Memorial givim iumi chance for duim wanem?
1 Memorial wea bae kamap long April 14 givim iumi chance for showimaot iumi tinghae long gud samting Jehovah duim for iumi. Story long Luke 17:11-18 mekem iumi luksavve Jehovah and Jesus laekem pipol for showimaot olketa tinghae. Taem Jesus healim tenfala man hia wea garem leprosy, wanfala nomoa talem thankiu. Long future, from Jesus hem dae for iumi, datwan bae finisim evrikaen sik, and pipol savve laef olowe! Long datfala taem bae iumi thankiu long Jehovah evriday for olketa blessing olsem. Bat hao nao iumi savve showimaot iumi tinghae long olketa samting wea Jehovah duim distaem?
2. Wanem nao bae mekem iumi tinghae long ransom?
2 Tinghae Firstaem: For tinghae long samting, man mas ting raonem datwan firstaem. Wanfala schedule for Memorial Bible reading hem stap long tu-thri difren ples, olsem long appendix B12 insaed long revised New World Translation. Hem bae stap tu long kalenda and Lukluk Long Olketa Scripture Evriday. Hem bae gud sapos famili bilong iumi duim disfala Bible reading tugeta. Wei for duim olsem bae helpem iumi for tinghae long ransom bilong Jesus. And tu, datwan bae mekem iumi laek for duim samting wea Jehovah hapi long hem.—2 Cor. 5:14, 15; 1 John 4:11.
3. Wanem nao iumi savve duim for showimaot iumi tinghae long ransom long March, April, and May?
3 Showimaot Iumi Tinghae: For showimaot iumi tinghae, iumi mas duim samting. (Col. 3:15) Datfala man wea Jesus healim go lukaotem hem for sei thankiu. Masbi hem storyim tu long olketa narawan hao Jesus duim datfala mirakol. (Luke 6:45) Iumi savve showimaot iumi tinghae long ransom taem iumi waka hard for invaetem pipol for kam long Memorial. Nara wei for showimaot iumi tinghae hem for auxiliary pioneer or duim moa samting long ministry long March, April, and May. And long evening bilong Memorial, iumi savve welkamim olketa wea kam long Memorial and ansarem eni kwestin bilong olketa.
4. Hao nao iumi savve showimaot iumi tinghae long Memorial bilong disfala year?
4 Waswe, diswan nao lastfala Memorial wea iumi bae attendim? (1 Cor. 11:26) Iumi no savve. Bat iumi savve sapos datfala Memorial go pas and iumi no duim samting for showimaot iumi tinghae long datwan, iumi lusim nao datfala chance. Iumi no laek for duim datwan. Bat iumi laekem toktok bilong iumi and samting wea stap long heart bilong iumi for mekem Jehovah hapi bikos hem nao givim kam Jesus wea dae for iumi.—Ps. 19:14.