Showimaot Iumi Tinghae
Memorial Bae Kamap Long April 17
1. Hao nao feeling bilong man wea raetem psalm barava fitim taem bilong Memorial?
1 From man wea raetem psalm tinghae long wei wea Jehovah showimaot mercy and sevem pipol, hem ask: “Wanem nao mi savve givim long Jehovah for evri gudfala samting wea hem givim long mi?” (Ps. 116:12) Distaem, olketa wea worshipim God garem staka reason for showimaot olketa tinghae. Staka handred year bihaen man hia raetem datfala scripture long psalm, Jehovah givim nambawan present long olketa man, hem nao ransom bilong Jesus. Taem iumi redyim tingting bilong iumi for rememberim dae bilong Jesus long April 17, iumi garem olketa gudfala reason for showimaot iumi tinghae.—Col. 3:15.
2. Wanem nao samfala reason why iumi tinghae long datfala ransom?
2 Olketa Blessing From Ransom: From ransom bilong Jesus, iumi savve kasem: “forgiveness for sin bilong iumi.” (Col. 1:13, 14) Diswan mekem iumi for worshipim Jehovah witim klinfala konsens. (Heb. 9:13, 14) Iumi savve feel free for story witim Jehovah long prea. (Heb. 4:14-16) Olketa wea showimaot faith long datfala ransom garem nambawan hope for laef olowe!—John 3:16.
3. Hao nao iumi savve showimaot long Jehovah iumi tinghae long datfala ransom?
3 Showimaot Iumi Tinghae: Wanfala wei for showimaot iumi barava tinghae hem for duim Memorial Bible reading each day and ting raonem. Wanfala article long Wastaoa for April-June 2011 wea garem title “Waswe, Iu Redi for Datfala Barava Important Day Long Year?” hem for helpem iumi duim diswan. Taem iumi prea, iumi savve talem Jehovah iumi barava tinghae long datfala ransom. (1 Thess. 5:17, 18) Iumi showimaot iumi tinghae, taem iumi kam long Memorial, bikos iumi obeyim komand bilong Jesus. (1 Cor. 11:24, 25) And tu, iumi savve followim bigfala love bilong Jehovah taem iumi invaetem staka pipol for kam joinim iumi long Memorial.—Isa. 55:1-3.
4. Wanem nao iumi shud disaed strong for duim?
4 Pipol bilong Jehovah wea tinghae long Memorial, bae no tingim datfala hipap olsem nara meeting nomoa. Hem important winim eni nara meeting long year! Taem Memorial hem klosap, hem bae gud for iumi disaed strong, olsem man wea raetem psalm wea sei: “Blessim Jehovah, O soul bilong mi, and no forgetim evriting wea hem duim.”—Ps. 103:2.