Main Samting Long Laef Bilong Iumi
1. Wanem nao Jesus duim wea showimaot preaching waka hem important long hem?
1 Main samting long laef bilong Jesus hem preaching waka. Hem barava waka hard, hem wakabaot long staka farawe ples long Palestine for preach long olketa wea hem meetim. Hem no laek for kasem staka material samting, mekem hem garem taem for hem duim preaching waka. (Matt. 8:20) Taem pipol askem hem for healim sik bilong olketa, hem sei: “Mi mas talemaot gud nius abaotem kingdom bilong God long olketa nara taon tu, bikos hem nao why God sendem mi kam.”—Luke 4:43.
2. Why nao Jesus barava tinghae long preaching waka?
2 Why nao Jesus barava tinghae long preaching waka? Main samting wea Jesus tingim nao, hem for nem bilong Jehovah stap holy. (Matt. 6:9) Hem lovem Dadi bilong hem long heven and hem laek for duim wanem God laekem and for obeyim evri samting wea God talem hem for duim. (John 14:31) And tu, hem barava kea for pipol and laek for helpem olketa.—Matt. 9:36, 37.
3. Wanem nao iumi savve duim for showimaot iumi tinghae long preaching waka?
3 Followim Jesus: Hem no isi for gohed followim tingting wea Jesus garem abaotem preaching waka, bikos disfala world mekem iumi for iusim staka taem bilong iumi and mekem iumi tingim staka difren samting. (Matt. 24:37-39; Luke 21:34) Dastawe, iumi mas duim olketa samting wea barava important, wea minim iumi markem taem for prepare and duim preaching waka evritaem. (Phil. 1:10) Iumi mas trae hard for gohed satisfae long lelebet samting wea iumi garem and no mekius long disfala world.—1 Cor. 7:31.
4. Why nao hem wise distaem for gohed tingim important samting long laef?
4 Evritaem, taem lelebet taem nomoa stap, man wea wise savve tingim olketa important samting firstaem. Example nao, sapos hem savve wanfala cyclone bae kam, hem bae iusim taem and strong bilong hem for redyim famili bilong hem for stap sev and warnim olketa narawan. Olketa nara samting wea no important tumas bae weit firstaem. Lelebet taem nomoa stap bifor Armageddon hem kam. (Zeph. 1:14-16; 1 Cor. 7:29) So for iumi and olketa wea lisin long iumi for stap sev, iumi mas lukluk gud evritaem long iuseleva and wei bilong iu for teach, insaed and aotsaed long kongregeson. (1 Tim. 4:16) Tru tumas, preaching waka shud kamap main samting long laef bilong iumi sapos iumi laek kasem laef!