Rememberim and Tinghae Long Ransom
1, 2. Why nao iumi mas rememberim and tinghae long datfala ransom?
1 For obeyim toktok bilong Jesus, olketa Christian evriwea long world bae rememberim dae bilong Jesus Christ long Saturday, March 22, 2008 bihaen sun go daon. (Luke 22:19; 1 Cor. 11:23-26) Iumi laek for duim diswan from samting wea Jesus duim 1,975 year wea go pas finis wea iumi barava tinghae long hem. From Jesus barava faithful go kasem taem hem dae long post wea man safa long hem, diswan hem mekhae long nem bilong Dadi bilong hem and diswan givim ansa long laea toktok bilong Satan.—Job 1:11; Prov. 27:11.
2 Datfala niu covenant hem kamap tru from blood bilong Jesus. Diswan mekem wei for God adoptim olketa man for kamap olketa son bilong hem and for olketa rul witim Christ long Kingdom bilong hem long heven. (Jer. 31:31-34; Mark 14:24) And tu, bigfala love bilong God for olketa man hem barava showaot taem hem givim Son bilong hem wea hem lovem tumas for dae, olsem Jesus seleva hem storyim go long Nicodemus.—John 3:16.
3. Olketa wea kam long Memorial bae kasem wanem gudfala samting?
3 Askem Olketa Narawan for Kam: Long January Kingdom Ministry Bilong Iumi hem storyim idea for iumi mekem wanfala list bilong olketa wea iumi laek askem olketa for kam long Memorial. Waswe, iu askem finis olketa hia for kam? Waswe, iu redyim samfala samting mekem iu savve givimaot pepa for askem pipol for kam long Memorial wea bae start long March 1? Olketa wea kam long Memorial bae herem toktok from Bible wea savve strongim faith bilong olketa long datfala ransom, wea datwan lead go long laef olowe.—Rom. 10:17.
4. Why nao iumi mas no kam leit long Memorial?
4 Evriwan wea fit mas plan for no kam leit long Memorial mekem olketa savve story witim pipol wea kam from olketa kasem datfala spesol pepa. From plande pipol bae hipap long Memorial, iumi mas lukluk for olketa niu wan and olketa wea samfala taem nomoa kam long olketa meeting.
5. Hao nao iu savve redyim tingting bilong iu for taem bilong Memorial?
5 Redyim Tingting Bilong Iu: Lukluk Long Olketa Scripture Evriday—2008 and Kalenda for 2008 hem garem schedule for spesol Bible reading for Memorial wea bae start long March 17. Taem iu ting raonem olketa big samting wea happen long olketa lastfala day long laef bilong Jesus long earth, diswan bae helpem iu for redyim tingting bilong iu for datfala taem bilong Memorial. (Ezra 7:10) Wei for prea and ting raonem olketa story hia long Bible bae mekem iu barava tinghae long love bilong Jehovah and Son bilong hem wea tufala nao givim datfala ransom.—Ps. 143:5.
6. Hao nao wei for tinghae long datfala ransom savve helpem iumi?
6 From taem bilong Memorial hem klosap, iumi savve redyim iumiseleva and olketa narawan for disfala spesol taem. Wei for rememberim and tinghae long datfala ransom bae strongim wei wea iumi fren witim Jehovah and Son bilong hem. (2 Cor. 5:14, 15) Diswan bae helpem iumi for followim tufala long wei for showimaot bigfala love for olketa narawan.—1 John 4:11.