Olketa Magasin Bilong Iumi Fitim Evri Difren Kaen Pipol
1. Wanem nao datfala wakaman wea faithful and wise duim for followim wanem aposol Paul duim?
1 Datfala wakaman wea faithful and wise iusim olketa magasin bilong iumi for duim sem samting olsem aposol Paul, wea hem changem story for fitim “evri didifren kaen man,” taem hem talemaot gud nius. (1 Cor. 9:22, 23) So for iumi iusim gud Wastaoa and Awake! magasin, hem gud for evritaem tingim olketa magasin hia hem fitim wanem kaen pipol.
2. Awake! magasin hem for wanem kaen pipol?
2 Awake!: Disfala magasin hem for sem kaen pipol wea aposol Paul story long olketa, olsem “olketa man bilong Athens.” (Acts 17:22) Olketa man hia, olketa no Christian, and olketa no savve tumas long olketa Scripture. Semsem tu, kaen pipol wea readim Awake! magasin, olketa savve lelebet long Bible or maet nomoa nao. Maet olketa no savve abaotem teaching bilong olketa Christian, maet olketa no trustim religion, or maet olketa no savve hao Bible savve helpem olketa. Main goal bilong Awake! magasin hem for helpem olketa wea readim for bilivim God hem stap. Nara samting wea Awake! magasin duim hem for helpem pipol garem faith long Bible and helpem olketa wea readim for savve Olketa Jehovah’s Witness olketa difren from olketa nara religion.
3. Wanem kaen pipol nao readim pablik Wastaoa and study Wastaoa?
3 Wastaoa: Kaen pipol wea readim pablik Wastaoa magasin, olketa respectim lelebet God and Bible. Olketa savve lelebet long Bible bat no minim gud olketa teaching bilong hem. Olketa semsem olsem olketa pipol wea Paul story abaotem olsem olketa wea “worshipim God.” (Acts 13:14-16) Study Wastaoa hem for Olketa Jehovah’s Witness. Paul savve pipol wea readim olketa leta bilong hem savve gud long olketa Scripture and garem stretfala savve long truth. (1 Cor. 1:1, 2) Semsem tu, olketa article long study Wastaoa hem for pipol wea kam long olketa meeting and wea savve gud long olketa idea and toktok wea olketa Witness iusim.
4. Why nao hem gud for iumi savve long each magasin wea iumi iusim long preaching waka?
4 Nomata iumi savve offerim Wastaoa and Awake! magasin tugeta, iumi savve story insaed wanfala nomoa taem iumi preach. Dastawe hem gud for markem goal for readim and savve gud long tufala magasin hia. Datwan bae helpem iu for storyim long pipol wea iu meetim, olketa samting long magasin wea olketa interest long hem.