‘Mifala Laekem Nem Bilong God for Holy’
1. Wanem nao theme for circuit assembly program for 2012 service year, and hem kam from wea?
1 Hem wanfala privilege for iumi garem nem bilong Ruler bilong Universe, Jehovah! God seleva nao givim nem bilong hem for iumi, and start long year 1931 iumi garem disfala nem Olketa Jehovah’s Witness wea no eni nara pipol garem. (Isa. 43:10) Jesus barava tinghae long nem bilong Dadi bilong hem, dastawe hem storyim datwan firstaem long prea bilong hem. (Matt. 6:9) Theme for circuit assembly program for 2012 service year hem kam from datfala prea. Theme nao hem, “Mifala Laekem Nem Bilong God for Holy.”
2. Olketa wanem tok nao bae iumi herem long assembly?
2 Wanem Iumi Bae Herem: Long disfala tok long Saturday “Talemaot Nem Bilong God Long Wei for Duim Full-Taem Service,” iumi bae herem hao nao full-taem service savve mekem iumi barava hapi. Iumi bae herem tu tok wea garem fofala part, “Keakea for No Spoelem Nem Bilong Jehovah.” Olketa tok hia bae helpem iumi for stap klia long fofala trap wea savve spoelem wei wea iumi fren witim Jehovah. Long disfala tok, “Why Iumi Laekem Nem Bilong God for Holy,” iumi bae herem ansa bilong tufala kwestin hia, Wanem nao bae helpem iumi strong for preach long pipol wea luk olsem olketa no interest? and Wanem nao bae helpem iumi for duim gud ministry bilong iumi? Long Sunday iumi bae herem wanfala tok wea garem fofala part wea showimaot hao iumi savve mekhae long nem bilong God. Hem nao long wanem iu tingim, talem, olketa disison bilong iu, and wei bilong iu. Olketa niu wan wea kam bae interest long disfala pablik tok, “Jehovah Bae Mekhae Long Nambawan Nem Bilong Hem Long Armageddon.”
3. Wanem privilege nao iumi garem, and hao nao disfala program bae helpem iumi?
3 Klosap nao Jehovah bae duim samting for mekhae long nem bilong Hem. (Ezek. 36:23) Bat distaem, iumi garem nambawan privilege for duim olketa samting wea mekhae long nem bilong Jehovah. Mifala savve disfala circuit assembly program bae helpem iumi evriwan for duim gud waka bilong iumi olsem pipol wea garem nem bilong God.