Hapi Taem Iumi Prepare for Memorial
1. Taem bilong Memorial hem chance for iumi duim wanem?
1 Memorial wea bae kamap long Tuesday, March 26, hem nambawan chance for iumi showimaot iumi barava hapi long wanem God duim for sevem iumi. (Isa. 61:10) Wei for hapi olsem bae helpem iumi for prepare gud for datfala day. Wanem nao iumi savve duim mekem iumi tinghae long datfala taem for prepare?
2. Wanem nao mekem iumi laek prepare gud for Memorial?
2 Prepare for Memorial: Disfala Memorial hem simpol celebration bat hem barava important. Nomata hem simpol, iumi mas plan gud firstaem mekem iumi preparem gud evri samting for diswan. (Prov. 21:5) Olketa elder mas markem taem and ples wea Memorial bae kamap. Mas redyim bred and wine. Iumi mas klinim and redyim ples for Memorial. Brata wea bae givim Memorial tok mas redyim gud datfala tok. Olketa brata wea bae pasim bred and wine and olketa attendant mas savve wanem for duim. Maet iumi redyim finis evri samting hia. From iumi tinghae long ransom wea sevem iumi datwan mekem iumi redi gud for disfala spesol hipap.—1 Pet. 1:8, 9.
3. Wanem nao iumi savve duim for redyim heart bilong iumi for Memorial?
3 Redyim Heart: Iumi mas redyim gud tu heart bilong iumi mekem iumi luksavve why Memorial hem barava important. (Ezra 7:10) For helpem iumi long datwan, iumi shud markem taem for duim Memorial Bible reading and for ting raonem olketa samting wea Jesus duim bifor hem dae. Taem iumi ting raonem wei wea Jesus willing for dae for iumi, bae iumi laek for followim example bilong hem.—Gal. 2:20.
4. Wanem gud samting wea iu kasem from ransom nao mekem iu hapi tumas?
4 Dae bilong Christ hem mekhae long rul bilong Jehovah, and hem mekem iumi free from sin and dae. (1 John 2:2) Hem mekem iumi savve fren bak witim God, and mekem iumi for kasem laef olowe. (Col. 1:21, 22) Hem helpem iumi tu for no brekem promis bilong iumi for worshipim Jehovah, and gohed strong for followim Christ. (Matt. 16:24) Taem iu prepare gud and attendim Memorial wea bae kamap, bae iu barava hapi!