Iusim Gud Nius Brochure for Teachim Pipol
1. Hao nao olketa laekem iumi for iusim datfala Gud Nius brochure?
1 Long Kingdom Ministry Bilong Iumi for July, iumi storyim hao datfala brochure, Gud Nius From God! hem wanfala important tul for teachim pipol. Disfala brochure garem olketa scripture wea haosholder savve readim long Bible bilong hem for lanem samting wea Bible teachim. Iumi garem staka pablikeson wea haosholder savve readim and minim gud, bat disfala brochure olketa wakem for man mas studyim witim narawan. So, taem iumi offerim disfala brochure, iumi laek for showim haosholder hao for studyim disfala brochure bikos datwan bae helpem hem for luksavve hem gud samting for iusim Bible for lane abaotem gud nius.—Matt. 13:44.
2. Hao nao iumi savve iusim Gud Nius brochure taem iumi meetim samwan wea interest?
2 Taem Iumi Meetim Samwan wea Interest: Maet iu savve sei: “Mi kam for story witim iu bikos staka pipol warim wanem bae happen long disfala world long future. Waswe, iu tingse bae olketa samting kamap gud? [Weit for hem ansa.] Bible hem storyim gud nius wea helpem iumi for garem hope. Lukim samfala kwestin hia wea ansa bilong olketa stap insaed long Bible.” Givim datfala brochure long haosholder, and askem hem for chusim wanfala kwestin long bak kava. Then iusim firstfala paragraf bilong datfala leson for showim hem hao iumi duim Bible study. Nara samting iu savve traem hem for iuseleva chusim wanfala leson wea iu laek storyim and askem haosholder wanfala kwestin wea join witim datfala leson. Then showim hem hao datfala brochure bae helpem hem for savve wanem Bible talem abaotem datfala kwestin. Samfala pablisa savve pleim wanfala video long jw.org, taem hem join witim wanem olketa storyim.
3. Explainim hao iumi savve iusim Gud Nius brochure for conductim Bible study.
3 Hao for Conductim Bible Study: (1) Readim kwestin wea stap long blak raeting for helpem haosholder for tingim main point. (2) Readim paragraf wea stap andanit long datfala kwestin. (3) Readim olketa scripture wea olketa raetem long italic raeting, and askem olketa kwestin wea bae helpem haosholder for luksavve hao olketa scripture hia ansarem datfala kwestin. (4) Sapos narafala paragraf join witim datfala kwestin, duim sem samting wea point 2 and 3 storyim. Sapos wanfala video hem join witim datfala kwestin bat iu no pleim yet datfala video long hem, iu savve duim datwan. (5) Then askem haosholder datfala kwestin wea stap long blak raeting for mek sure hem minim wanem iutufala storyim.
4. Wanem nao bae helpem iumi for savve gud hao for iusim datfala brochure?
4 Hem important for savve gud long datfala brochure. Iu savve iusim long enitaem wea fitim. Bifor iu go long Bible study, ting abaotem datfala student and hao iu bae explainim wanem iutufala bae studyim and hao iu bae helpem hem for minim olketa scripture long datfala leson. (Prov. 15:28; Acts 17:2, 3) Bihaen iu iusim datfala brochure for teachim samfala pipol abaotem truth, gogo bae iu start for laekem tumas for iusim datfala brochure evritaem!