2015 Theocratic Ministry Skul Helpem Iumi for Kamap Gud Long Wei for Teach

¹ David wea raetem psalm hem sei: “Jehovah, iu nao strongfala ples bilong mi for haed and iu nao sevem mi. Mi laekem toktok bilong mi and samting wea stap long heart bilong mi for mas mekem iu hapi.” (Ps. 19:14) Iumi tu laekem toktok bilong iumi for mekem Jehovah hapi bikos iumi tinghae tumas long privilege bilong iumi for talem tru samting insaed long kongregeson and long ministry. Theocratic Ministry Skul hem wanfala wei wea Jehovah trainim iumi for duim ministry. Evriwea long world, disfala training hem savve kamap evri week long winim 111,000 kongregeson. Disfala skul helpem olketa brata and sista evriwea long world wea garem difren living for kamap gud long wei for preachim disfala gud nius. Olketa lane for teach long wei for story gud witim pipol, tok kaen long olketa, and no fraet for preach.—Acts 19:8; Col. 4:6.

² Taem wea olketa markem for olketa main point from Bible reading and Tok No. 1 hem change. Iumi bae storyim tufala change hia and instruction long hao for duim olketa nara tok long skul long olketa paragraf long daon.

³ Olketa Main Point From Bible Reading: Brata wea kasem assignment for duim diswan bae garem tufala minute for story raonem wanfala point from Bible reading for datfala week wea audience bae interest long hem and wea savve helpem kongregeson. Taem brata hem prepare gud firstaem, hem savve storyim wanfala point wea savve encouragem kongregeson insaed long taem wea olketa markem. Then olketa long kongregeson garem sixfala minute for givim koment wea no winim 30 second for storyim interesting point wea olketa lanem from Bible reading for datfala week. Iumi mas prepare gud and waka hard for givim olketa gudfala koment insaed 30 second, and wei for duim olsem hem gudfala training for iumi. Datwan givim taem tu for olketa narawan storyim wanem olketa lanem from research bilong olketa.

⁴ Tok No. 1: Taem wea olketa markem for Bible reading hem change tu. Hem no winim thrifala minute and bae hem no staka verse. Olketa brata wea kasem datfala assignment shud practicem datfala reading staka taem long wei for read big, and traem best for talem olketa word long stretfala wei, mekem hem isi for audience minim wanem olketa readim. Pipol bilong Jehovah shud waka hard for read gud, bikos reading hem wanfala important samting long worship bilong iumi. Iumi hapi tumas staka long olketa pikinini bilong iumi olketa savve read gud! Olketa dadi and mami wea waka hard for helpem pikinini for read gud fit for kasem praise.

⁵ Tok No. 2: Wanfala sista nao bae duim disfala assignment and taem wea olketa markem hem faevfala minute. Hem shud iusim theme wea hem kasem.

⁶ Tok No. 3: Wanfala brata or sista nao savve duim disfala assignment and taem wea olketa markem hem faevfala minute. Sapos wanfala sista nao kasem disfala assignment, hem shud duim olsem Tok No. 2. Sapos wanfala brata nao kasem disfala assignment, hem bae duim olsem hem givim wanfala tok for audience. Hem bae story raonem datfala subject and chusim olketa scripture wea fitim.

⁷ Kaonsel: Bihaen tok bilong student, skul overseer bae iusim tufala minute for praisem and givim kaonsel from Kasem Gud Samting From Theocratic Ministry Skul Education wea bae helpem student. Taem skul overseer introducem tok bilong student bae hem no talem point kaonsel wea datfala student hem waka long hem. Bihaen student hem givim tok, skul overseer shud praisem hem, talem point kaonsel wea datfala student hem waka long hem and talem gud samting wea hem duim or explainim long kaenfala wei why nao datfala student shud waka moa long datfala point.

⁸ Kaonsel pepa bilong student hem stap long page 79 go kasem 81 long Ministry Skul buk bilong hem. Bihaen student hem duim assignment bilong hem, skul overseer savve raetem date insaed buk bilong datfala student and askem hem sapos hem duim exercise wea stap for datfala point kaonsel. Sapos olsem, skul overseer bae tickim box. Stretawe bihaen meeting or long narataem wea fitim, skul overseer bae praisem datfala student and maet hem givim samfala idea tu wea bae helpem hem. Datfala student shud tinghae long help wea hem kasem bikos datwan bae helpem hem for gohed gud long spiritual wei.—1 Tim. 4:15.

⁹ Sapos wanfala student hem ovataem, skul overseer or assistant bilong hem shud givim wanfala saen mekem datfala student savve hem kasem taem nao for finis. Datfala student shud finisim sentence bilong hem and go daon from stage.—Lukim Ministry Skul buk, p. 282, par. 4.

¹⁰ Evriwan wea kasem mark savve joinim Theocratic Ministry Skul. (Lukim Ministry Skul buk, p. 282, par. 6.) Training wea pipol bilong Jehovah kasem from disfala skul hem helpem olketa for showimaot respect, love, and no fraet for preach and teachim datfala gud nius abaotem Kingdom. Tru nao, Jehovah barava hapi for kasem praise from evriwan wea kasem gud samting from theocratic education!—Ps. 148:12, 13; Isa. 50:4.