Instruction for Olketa Skul Overseer

LONG each kongregeson, wanfala elder kasem appointment olsem Theocratic Ministry Skul overseer. Sapos iu kasem disfala responsibility, wei wea iu showimaot interest long datfala skul and hao each student muv ahed savve affectim wei wea datfala skul win long area bilong iu.

Wanfala important part long assignment bilong iu hem for conductim Theocratic Ministry Skul evri week long kongregeson bilong iu. Tingim evritaem hao nara pipol stap tu, no olketa student wea garem assignment nomoa. Conductim skul long wei for givim olketa gudfala reminder wea muvim full kongregeson for duim samting wea join witim samfala goal bilong skul wea disfala buk storyim long page 5 go kasem 8.

Showimaot interest long evri student, nomata olketa kasem assignment for read, for givim tok wea olsem demonstration, or for givim tok. Helpem olketa for no ting long datwan olsem assignment nomoa, bat olsem chance for muv ahed long service bilong olketa for Jehovah. Main samting wea savve mekem olketa muv ahed hem wei wea olketa seleva trae hard. Bat hem important tu for iu showimaot kaenfala interest, helpem olketa for minim why nao wanfala point kaonsel hem important, and explainim hao for followim datfala kaonsel. For duim datwan, lisin gud long each tok mekem iu savve givim gudfala advaes.

Mek sure iu startim and finisim skul long barava taem. Kamap gud example long diswan long wei for no ovataem long olketa koment bilong iu. Sapos wanfala student hem ovataem, iu or assistant bilong iu shud givim wanfala saen. Datfala student shud finisim sentence bilong hem and go daon from platform. Sapos nara part long program hem ovataem, katem koment bilong iuseleva and then story witim datfala brata bihaen long meeting.

Taem iu stap, iu nao shud conductim datfala skul. Sapos samfala taem iu bae no stap, nara elder wea body of elders markem finis shud lukaftarem skul. Sapos iu needim help for preparem olketa schedule, for raetem and givim aot olketa assignment pepa, or for faendem olketa volunteer for changem narawan, wanfala ministerial servant wea body of elders markem savve help witim olketa samting hia.

Olketa Student wea Savve Joinim Skul. Encouragem evri pablisa for joinim skul. Olketa narawan wea kaban evritaem witim kongregeson savve join tu sapos olketa agree witim olketa teaching bilong Bible and live followim olketa Christian principle. Taem samwan sei hem laek for joinim skul, praisem hem. Sapos hem no wanfala pablisa yet, from iu nao skul overseer iu shud storyim olketa mark for joinim skul witim hem and Bible study conductor bilong hem tu (or witim dadi or mami wea biliv). Olketa mark hia semsem witim olketa mark for man wea laek kamap pablisa wea no baptaes. Olketa stap long Organize for Duim Ministry Bilong Yumi page 97 go kasem 99. Keepim stretfala list bilong evriwan wea join insaed skul.

Wei for Iusim Kaonsel Pepa. Kaonsel pepa for each student hem insaed buk bilong hemseleva, long page 79 go kasem 81. Olsem kala hem showaot, student savve waka long eni point kaonsel from 1 go kasem 17 taem hem kasem assignment for read. For tok wea olsem demonstration, student savve waka long eni point kaonsel bat no namba 7, 52, and 53. For wanfala tok, student savve waka long eni point kaonsel bat no namba 7, 18, and 30.

Taem hem assignim nextfala point kaonsel, skul overseer shud mek sure hem iusim pencil for putim date anda long “Assignment Date” long spes wea stap for datfala point kaonsel long pepa insaed buk bilong student. Bihaen meeting wea student duim tok bilong hem, askem hem sapos hem duim olketa exercise wea stap long end bilong chapter wea storyim datfala point kaonsel. Sapos hem duim, putim wanfala mark long box long datfala kaonsel pepa. Sapos iu laekem hem for go ahed waka long datfala sem point kaonsel, no putim eni nara mark long kaonsel pepa; no raetem eniting long spes wea sei “Date Iu Kamap Gud Long Hem.” Only taem wea iu raetem date long there hem taem hem redy for waka long nara point. And tu, long page 82 long buk bilong student, long left saed long setting wea hem iusim, iu shud putim date bilong datfala tok. Spes hem stap long kaonsel pepa and list bilong olketa setting for iusim each wan tufala taem. Olketa student mas tekem kam buk long skul.

Assignim wanfala point kaonsel each taem. Planti taem, best wei nao hem for waka long olketa point kaonsel followim order long list. Bat sapos samfala student savve tumas, maet iu encouragem olketa for studyim and waka long samfala leson seleva. Long wei olsem iu savve helpem olketa for waka long olketa point wea iu tingse bae barava helpem olketa for kamap moabeta olsem olketa speaker and teacher.

Nomata sapos wanfala student hem join insaed long skul for planti year finis, hem savve kasem gud samting sapos hem studyim and waka long each leson. For helpem olketa student wea garem spesol need, iu savve chusim samfala point kaonsel for olketa waka long hem winim wei for hem followim order bilong datfala list.

Givim Kaonsel. Taem iu givim kaonsel, mekius long olketa example and principle long Bible. Olketa student shud feel olsem kaonsel wea olketa kasem and wei wea iu givim hem followim olketa hae principle long Word bilong God.

Tingim evritaem hao iu wanfala wea ‘waka witim’ olketa brata and sista bilong iu. (2 Cor. 1:24) Olsem olketa, iu need for go ahed for kamap moabeta olsem wanfala speaker and teacher. Studyim seleva disfala buk Kasem Gud Samting From Theocratic Ministry Skul Education, followim kaonsel bilong hem, and kamap gudfala example for olketa narawan duim sem samting.

Taem iu duim olsem, markem olsem goal bilong iu for helpem olketa student for read long gudfala wei, for kamap olketa speaker wea fit, and olketa gudfala teacher. For kasem datwan, trae for provaedem eni help wea olketa student needim for minim olketa difren point kaonsel, why nao olketa important, and hao for kamap gud long olketa. Olketa wakem disfala buk long wei for helpem iu duim olsem. Nomata olsem, bae iu need for duim moa samting winim wei for readim nomoa olketa word long disfala buk. Storyim idea wea olketa word hia talem and hao for followim datwan.

Sapos wanfala student hem barava duim gud wanfala point, praisem hem. Talem lelebet toktok abaotem why nao hem gudfala or why nao samting hem duim hem important. Sapos hem savve kamap moabeta taem hem waka moa long wanfala samting, mek sure hem minim reason for datwan. Storyim hao for duim. Talem klia and long kaenfala wei.

Luksavve hao for planti pipol, for givim tok long wanfala grup hem barava hard samting. Sapos student hem feel olsem hem fail, maet hem no laek trae moa. Followim example bilong Jesus, wea no pisisim wanfala “plant wea garekil” or aotem wanfala “lamp wea klosap for dae.” (Matt. 12:20) Tingim feeling bilong datfala student. Taem iu givim kaonsel, tingim sapos datfala student hem niu or hem pablisa wea garem savve. Loving and trufala praise savve strongim pipol for go ahed duim best bilong olketa.

Deal witim each student long wei wea showimaot respect. Romans 12:10 talem iumi: “Iufala mas lead for showimaot honor long narawan.” Datwan hem advaes wea barava fitim man wea givim kaonsel long Theocratic Ministry Skul! Sapos student hem moa olo winim iu, iu mas careful for followim direction long 1 Timothy 5:1, 2. Bat, nomata wanem nao age bilong wanfala man, taem iu kaonselem hem long kaenfala wei for mekem samfala change long wei wea hem duim samting, bae hem moa willing for acceptim.—Prov. 25:11.

Taem iu givim kaonsel, strongim goal bilong datfala training long student. Goal hem no for kasem praise for gudfala tok and then muv ahed long nextfala point kaonsel. Goal hem no for kamap speaker and teacher wea olketa narawan tinghae long hem. (Prov. 25:27) Iumi laek for iusim toktok bilong iumi for praisem Jehovah and for helpem narawan for savve long hem and lovem hem. Training wea iumi kasem hem for redyim iumi for duim gud datfala waka wea Matthew 24:14 and 28:19, 20 storyim. Olketa brata wea baptaes finis wea kasem mark maet gogo kasem invitation for share for lukaftarem “sheep bilong God” olsem olketa pablik speaker and teacher.—1 Pet. 5:2, 3.

Encouragem olketa student for readim nextfala point kaonsel long buk insaed tu-thri day bihaen olketa kasem tok assignment. Encouragem olketa for iusim samting olketa lanem taem olketa preparem olketa part for skul, taem olketa story evriday, taem olketa koment long olketa meeting, and long field service.

Assignim Olketa Tok. Olketa student shud kasem tok assignment thrifala week bifor date bilong tok. Evri tok assignment mas long assignment pepa.

Olketa elder nao shud kasem olketa part for givim instruction long kongregeson, best wan nao olketa wea savve duim long gudfala wei, and eni ministerial servant wea hem gudfala teacher.

For disaedem wanem tok assignment hem fitim brata or sista, followim olketa instruction wea stap long skul schedule. Sapos tu-thri brata nomoa bat planti sista join insaed skul, mek sure olketa brata kasem planti chance for givim olketa tok, no olketa Bible reading nomoa.

Tingim living bilong man wanwan taem iu assignim olketa tok. Sapos iu savve duim, maet hem moabeta for no assignim wanfala elder or ministerial servant for givim tok long skul long sem naet wea hem garem part long Service Meeting or sem week wea hem mas givim pablik tok long kongregeson. Sapos iu savve duim, maet hem moabeta for no givim tok assignment long sista long sem naet wea wanfala young pikinini bilong hem wea hem mas helpem, hem garem tok tu. For olketa young wan or student wea no baptaes, mek sure datfala subject hem fitim hem. Chek for mek sure assignment hem fitim point kaonsel wea student waka long hem.

For assignment bilong olketa sista, student seleva bae chusim setting wea hem laek iusim followim instruction long page 78 and 82. Iu shud markem wanfala assistant for hem, bat hem savve iusim winim wanfala sapos hem laekem. Sapos wanfala student hem ask for wanfala assistant wea maet barava fitim setting bilong hem, iu savve letem hem.

Olketa Extra Class. Sapos winim 50 student joinim skul, maet iu ting for nara class kamap for olketa student tok. For fitim need, iusim disfala arrangement for evri student tok or for last tufala nomoa.

Evri extra skul mas garem man wea kasem mark for givim kaonsel, best wan nao wanfala elder. Sapos need hem kamap, wanfala ministerial servant wea kasem mark savve changem hem. Body of elders nao mas appruvim olketa man hia for givim kaonsel. Skul overseer mas waka klos witim olketa extra man for givim kaonsel, mekem student kasem moa help wea hem maet needim witim point kaonsel for next tok bilong hem, nomata wanem class nao hem givim tok long hem.

Spesol Reading Class. Sapos body of elders disaed samfala long kongregeson needim help for readim languis wea kongregeson iusim, iu savve arrangem diswan long sem taem olsem Theocratic Ministry Skul. Disfala class maet teachim olketa main samting for man savve read and raet, or goal bilong hem maet for helpem olketa student kamap moabeta long wei for read.

Olketa class olsem no need for kamap long semtaem wea olketa student givim tok long Theocratic Ministry Skul. For givim gudfala help maet needim moa taem winim datwan. Olketa elder savve disaed wanem nao fitim and wanem taem for givim datfala instruction. For fitim need, olketa savve mekem arrangement for instruction olsem wanfala grup or for man wanwan.

Diswan needim wanfala teacher wea savve. Hem bae moabeta for wanfala brata wea savve gud long datfala languis and wea savve read gud for kasem datfala assignment. Sapos no eni brata stap for iusim, olketa elder savve askem wanfala sista for help wea fit and wea hem gudfala example. Hem mas kavarem hed bilong hem taem hem teachim datfala class.—1 Cor. 11:3-10; 1 Tim. 2:11, 12.

Datfala buk Work Hard for Read And Raet hem stap long planti languis. Purpose bilong hem for teachim olketa main samting for read and raet. Datfala class savve iusim samfala nara samting for teach tu, wea bae depend long savve bilong olketa wea join insaed. Taem olketa student kamap gud, olketa shud join insaed main Theocratic Ministry Skul program.

Olsem overseer bilong Theocratic Ministry Skul, iu savve duim planti samting for helpem kongregeson. Prepare long gudfala wei, and olsem kaonsel long Romans 12:6-8 talem, lukaftarem gud assignment bilong iu olsem wanfala spesol responsibility from God.