LAEF BLO CHRISTIAN

Waswe, Iu Redi for Taem wea Selen Bae Hard?

Iumi no sapraes taem olketa samting wea happen lo world hem kosim wei wea selen hem kamap hard evriwea. Why nao olsem? Bikos iumi barava stap insaed olketa last day and Bible warnim iumi for no “trustim riches bilong [disfala world] wea savve lus enitaem.” (1Ti 6:17; 2Ti 3:1) Wat nao iumi savve lanem from example blo King Jehoshaphat abaotem wei for redi for taem wea selen bae hard?

Jehoshaphat hem trustim Jehovah taem olketa enemy nation againstim hem. (2Ch 20:9-12) And tu, hem duim samting for redyim full nation, taem hem wakem olketa samting for protectim taon and redyim olketa army. (2Ch 17:1, 2, 12, 13) Olsem Jehoshaphat, iumi tu savve trustim Jehovah and duim samting mekem iumi savve deal witim olketa hard samting.

WAT NAO IUMI SAVVE DUIM FOR REDI FOR TAEM WEA SELEN BAE HARD?

Redi gud lo spiritual wei: Satisfae witim wanem iu garem, and strongim wei wea iu trustim hao Jehovah savve provaedem wanem iu needim evriday. (Mt 6:26; 1Ti 6:8) Disaed strong for gohed followim olketa Bible principle and hapi nomoa witim wat iu garem. (Ro 2:21) Ting raonem hao nao bae iu kasem spiritual kaikai if electricity or Internet hem no waka. Keepim samfala hard-copy blo pablikeson wea iu chusim and if fitim, daonlodim firstaem olketa pablikeson.

Redyim olketa physical samting: Bifor problem saed lo selen hem kamap, hem gud for no garem kaon or spendem selen lo olketa samting wea no important. (Pr 22:7) Sapos fitim, keepim lelebet kaikai wea no savve nogud kwiktaem and olketa nara samting wea iu needim. Samfala savve plantim lelebet kaikai mekem olketa savve sevem selen.

WATCHIM VIDEO WASWE, IU REDI FOR TAEM BLO DISASTER? AND THEN ANSAREM OLKETA KWESTIN HIA:

Wanfala piksa from video “Waswe, Iu Redi For Taem Blo Disaster?” Piksa wea showim wanfala Bible, emergency basket and wanfala smartphone, and olketa wea waka lo construction.

Wat nao each wan lo iumi savve duim mekem iumi redi for taem blo disaster?

Ansa blo Iu

Wanfala piksa from video “Waswe, Iu Redi For Taem Blo Disaster?” Olketa brata help lo relief waka taem olketa buildim and karem olketa material from wanfala trak.

Hao nao iumi savve redi for helpem olketa narawan?

Ansa blo Iu