Why Nao Iufala Preach Long Pipol wea Garem Lotu Finis?

Wanem mifala faendem nao, staka pipol interest for storyim olketa Bible subject nomata olketa garem lotu bilong olketa finis. Mifala respectim raet bilong pipol for garem difren biliv from mifala, and mifala no forcem pipol for acceptim message bilong mifala tu.

Taem mifala storyim Bible, mifala trae for followim advaes long Bible for “hambol” and “showimaot bigfala respect” for pipol wea mifala story witim. (1 Peter 3:15) Mifala savve, samfala pipol bae no acceptim message wea mifala tekem kam. (Matthew 10:14) Bat mifala bae no savve sapos olketa bae acceptim message or nomoa sapos mifala no trae firstaem for story witim olketa. Mifala luksavve tu, living bilong pipol savve change.

Maet day wea mifala visitim samwan hem busy tumas and no savve story, bat maet long narafala day bae hem no busy and bae hem willing for story. Maet wanfala man hem barava kasem hard taem or wanfala big problem kamap wea mekem hem interest for herem message from Bible. So dastawe mifala no just visitim pipol wanfala taem nomoa bat gohed for visitim olketa.