Wat Nao Bible Talem Abaotem Interracial Marit?
Ansa from Bible
God appruvim marit between man and woman from difren race, bikos lo tingting blo hem evri race hem equal. Bible sei: “God treatim evriwan semsem nomoa . . . , nomata wat race nao olketa garem.”—Acts 10:34, 35, Good News Translation.
Lukim samfala nara Bible principle wea storyim hao evri race hem equal and marit.
Evri man from evri difren race kam from laen blo wanfala man nomoa
Evri human being kam from laen blo first man, Adam, and waef blo hem, Eve, wea Bible kolem hem “mami blo evriwan wea laef.” (Genesis 3:20) Dastawe, Bible sei olsem abaotem God: “Hem wakem olketa man from evri nation aot lo wanfala man nomoa.” (Acts 17:26) Nomata wat nao race blo olketa, evri human being olketa part lo wanfala famili nomoa. Wat if, lo ples iu stap, pipol prejudice bikos lo race or status?
Pipol wea wise “lukaotem advaes”
Nomata interracial marit hem barava acceptable lo God, no evri pipol garem sem tingting olsem hem. (Isaiah 55:8, 9) If iu ting for maritim samwan from nara race, iu and datfala person wea iu laek for maritim shud discussim olketa kwestin hia:
Hao nao bae iu deal witim pressure wea iu maet kasem from community or famili blo iu?
Hao nao bae iu helpem pikinini blo iu for deal witim prejudice?
“Lukaotem advaes” diswan savve helpem iu for mekem marit blo iu successful.—Proverbs 13:10; 21:5.