Mi Nating Hapi Nomoa lo Laef blo Mi—Hao, Religion, God, or Bible Savve Help?

Ansa from Bible

Yes. Bible hem wanfala ancient buk wea fulap lo wisdom, givim ansa for olketa important kwestin and savve helpem iu for feel beta and hapi. Lukim samfala kwestin wea Bible ansarem.

1. Eni Creator stap? Bible sei dat God “creatim evri samting.” (Revelation 4:11) From hem Creator blo iumi, God savve lo wat iumi needim for feel gud and hapi lo laef.

2. Hao, God kea abaotem mi? Bible no sei God hem stap farawe from iumi olketa man, bat Bible sei: “Hem nating stap farawe from each wan lo iumi.” (Acts 17:27) Hem interest lo wat happen lo iu and laek for helpem iu for succeed lo laef.—Isaiah 48:17, 18; 1 Peter 5:7.

3. Hao nao wei for savve lo God hem helpem mi for feel beta? God creatim iumi lo wei wea iumi “needim God,” wea hem nao for laek tumas for understandim mining and purpose lo laef. (Matthew 5:3) Spiritual need blo iumi hem includim tu desire for savve lo Creator blo iumi and for fren witim hem. God bae hapi tumas if iu traem best for laek savve lo hem, bikos Bible sei: “Kam klosap lo God and bae hem kam klosap lo iufala.”—James 4:8.

Staka million pipol faendem dat for buildim frenship witim God hem impruvim laef blo olketa and showim olketa hao for hapi lo laef blo olketa. Nomata for savve lo God bae no mekem iu free from problem, wisdom blo hem wea stap lo Bible savve helpem iu for

• Garem hapi famili laef.

• Stap gud witim olketa narawan.

• Deal witim olketa problem olsem depression, stress abaotem selen, and sik.

Staka religion wea iusim Bible no really followim wat hem teachim. Bat, tru religion, wea followim wat Bible really taem, bae helpem iu for savve lo God.