Hao, Bible Teachim ‘If Man Biliv lo Jesus, Hem Sev Olowe Nao’?
Ansa From Bible
Nomoa, Bible no teachim datfala doctrine wea sei ‘if man biliv lo Jesus, hem sev olowe nao.’ Man wea God sevem from hem biliv lo Jesus Christ, savve lusim faith and laef blo hem. Bible sei for maintainim faith man mas waka hard, hem mas “faet strong” for no lusim faith blo hem. (Jude 3, 5) Olketa Christian lo first century wea acceptim Christ finis kasem encouragement for: “gohed traem best blo [olketa] for kasem laef witim wei for fraet and seksek.”—Philippians 2:12.
Olketa scripture lo Bible wea no appruvim teaching wea sei ‘if man biliv lo Jesus, hem sev olowe nao’
Bible givim warning hao olketa wea duim serious sin bae no enter insaed God blo Kingdom. (1 Corinthians 6:9-11; Galatians 5:19-21) If man bae sev for olowe, kaen warning olsem bae no garem mining. Bat, Bible showim klia samwan wea bin kasem salvation savve foldaon moa for duim serious sin. For example, lo Hebrews 10:26 hem sei: “Sapos iumi gohed for duim sin nomata iumi lanem finis stretfala knowledge abaotem truth, and iumi nating sorre lo datwan, no eni sakrifaes moa hem stap for olketa sin hia.”—Hebrews 6:4-6; 2 Peter 2:20-22.
Jesus talem why hem important for maintainim faith taem hem iusim wanfala illustration wea storyim hem nao olsem vine blo grape, and olketa follower blo hem nao olsem olketa branch lo datfala vine. Firstaem samfala lo olketa showim faith lo hem thru lo olketa frut or akson blo olketa, bat gogo bihaen olketa fail for showim faith lo hem and “[olketa] olsem wanfala branch wea olketa katemaot,” and God bae no sevem olketa. (John 15:1-6) Aposol Paul iusim sem illustration hia tu wea sei olketa Christian wea no maintainim faith blo olketa, “hem bae katemaot.”—Romans 11:17-22.
Olketa Christian kasem komand for ‘gohed lukaot.’ (Matthew 24:42; 25:13) Olketa wea sleep lo spiritual wei, whether for duim “evri samting wea pipol duim lo darkness” or no duim gud evri waka wea Jesus askem olketa for duim, lusim chance blo olketa for sev.—Romans 13:11-13; Revelation 3:1-3.
Staka scripture lo Bible showim dat olketa wea bin sev mas continue for faithful go kasem end. (Matthew 24:13; Hebrews 10:36; 12:2, 3; Revelation 2:10) Olketa Christian lo first century talem dat olketa hapi taem olketa herem olketa nara Christian tu garem strong faith and no givap. (1 Thessalonians 1:2, 3; 3 John 3, 4) Hao, iu tingse hem reasonable for Bible sei hem important for faithful and no givap, bat lo semtaem olketa wea no gohed faithful bae sev nomoa?
Only taem aposol Paul redi for dae nao hem savve bae hem sev. (2 Timothy 4:6-8) Bat bifor datwan, hem luksavve bae hem no kasem salvation if hem duim nomoa olketa samting wea body laekem. Hem sei olsem: “Mi disciplinem body blo mi and leadim olsem wanfala slave, mekem taem mi preach lo olketa narawan, mi no duim eni samting wea maet mekem God no hapi lo mi.”—1 Corinthians 9:27; Philippians 3:12-14.