Hao, Bible Storyim “Sevenfala Sin wea Man Savve Dae lo Hem”?
Ansa from Bible
Bible no talem stret wanfala list blo “sevenfala sin wea man savve dae lo hem.” Bat, hem teachim dat if man gohed for duim olketa serious sin datwan bae stopem hem for no kasem salvation. For example, Bible refer lo olketa serious sin olsem wei for durong, worshipim idol, spiritism, savve kros tumas, and drunk olsem “olketa samting wea body wea sin hem laekem.” Then hem sei: “Olketa wea duim kaen samting olsem bae no inheritim Kingdom blo God.”—Galatians 5:19-21.a
Hao, Bible listim ‘sevenfala samting wea Lord barava heitim’?
Yes, hem talem. According lo King James Version, Proverbs 6:16 sei: “Sixfala samting nao Lord heitim: yes, sevenfala samting nao hem barava heitim.” Bat, list blo olketa sin wea stap lo Proverbs 6:17-19 hem no olketa sin wea God heitim. Hem describem nomoa olketa difren kaen sin wea man savve duim, includim sin lo tingting, toktok, and akson blo hem.b
Wat nao mining blo datfala expression “sevenfala sin wea man savve dae lo hem”?
Samfala transleison iusim disfala expression lo 1 John 5:16. For example, The New American Bible sei: “Wanfala kaen sin stap wea man savve dae lo hem.” Datfala expression wea olketa transleitim for “sin wea man savve dae lo hem” olketa savve transleitim tu olsem “sin wea savve lead go lo dae.” Wat nao difference between “sin wea savve lead go lo dae” and “sin wea no savve lead go lo dae”?—1 John 5:16.
Bible talem klia dat evri sin savve lead go lo dae. Bat, iumi savve sev from sin and dae thru lo ransom sakrifaes blo Jesus Christ. (Romans 5:12; 6:23) So, wanfala “sin wea savve lead go lo dae” hem sin wea ransom blo Christ no kavarem. Person wea commitim diskaen sin hem laek for continue nomoa witim datwan, hem bae never changem attitude or wei blo hem. And tu, Bible refer lo kaen sin hia olsem sin wea ‘bae God no forgivim.’—Matthew 12:31; Luke 12:10.
a Galatians 5:19-21 listim 15-fala example blo olketa serious sin, bat staka nara serious sin hem stap, bikos Bible sei moa “and olketa kaen samting olsem.” So, reader kasem encouragement for iusim wei for luksavve for identifyim olketa samting wea no stap lo datfala list bat hem “olketa kaen samting olsem.”
b Proverbs 6:16 hem wan example blo wanfala Hebrew idiom, wea olketa talem smol namba firstaem taem olketa markem witim second namba wea hem big. Diskaen expression appear staka taem lo olketa Scriptures.—Job 5:19; Proverbs 30:15, 18, 21.