Hu or Wat Nao Datfala Word blo God?

Ansa from Bible

Staka taem Bible iusim expression “datfala word blo God” for refer lo wanfala divine message or nara kaen message olsem wea kam from God. (Luke 11:28) Lo tu-thri verse lo Bible, “Datfala Word blo God” or “datfala Word” hem refer lo wanfala personal title.​—Revelation 19:13; John 1:​14.

Wanfala divine message. Staka taem, taem olketa profet talemaot olketa message olketa savve talem datwan hem toktok wea kam from God. For example, Jeremiah introducem prophetic message blo hem witim toktok “mi kasem disfala toktok from Jehovah.” (Jeremiah 1:​4, 11, 13; 2:1) Bifor profet Samuel talem lo Saul dat God chusim hem nao for king, hem tok olsem: “Iu standap lo hia witim mi firstaem mekem mi talem iu toktok blo God.”​—1 Samuel 9:​27.

Wanfala personal title. Lo Bible “Datfala Word” hem savve refer tu lo title wea Jesus Christ garem, taem hem wanfala spirit lo heven and taem hem wanfala man lo earth. Lukim samfala reason why iumi sei olsem:

• Datfala Word hem stap finis bifor God creatim evri nara samting. “Lo start datfala Word hem stap, . . . Word hia hem stap witim God lo start kam nao.” (John 1:​1, 2) Jesus nao “hem firstborn lo evri samting wea God creatim . . . Hem stap firstaem lo evri samting.”​—Colossians 1:​13-​15, 17.

• Datfala Word kam lo earth olsem wanfala human being. “So datfala Word hem kamap man and hem stap witim mifala.” (John 1:​14) Christ Jesus “lusim evri samting wea hem garem and hem kamap wanfala slave and kamap wanfala human being.”​—Philippians 2:​5-7.

• Datfala Word hem Son blo God. Afta aposol John talem toktok “datfala Word hem kamap man,” hem sei moa: “Mifala lukim taem hem kasem glory, hem glory wea wanfala dadi givim lo spesol son blo hem.” (John 1:​14) And John raet olsem tu: “Jesus hem Son blo God.”​—1 John 4:​15.

• Datfala Word garem olketa quality olsem wanfala god. “Datfala Word hem wanfala god,” or “hem divine.” (John 1:1; An American Translation) Jesus “hem showimaot glory blo God and hem barava olsem God nao.”​—Hebrews 1:​2, 3.

• Datfala Word rul olsem king. Bible sei lo hed blo datfala Word blo God hem garem ‘staka hedband wea king savve werem.’ (Revelation 19:12, 13; footnote) And nara title for datfala Word tu hem “King blo olketa king and Lord blo olketa lord.” (Revelation 19:16) Jesus nao hem “King blo olketa wea rul olsem king and Lord blo olketa wea rul olsem lord.”​—1 Timothy 6:​14, 15.

• Datfala Word hem spokesman blo God. Datfala title “Word” showimaot klia dat hem samwan wea God iusim for conveyim olketa information and instruction blo hem. Jesus talem hem nao duim disfala waka, taem hem sei: “Dadi wea sendem mi kam nao talem mi wanem for talem and wanem for teachim. . . . So mi talem nomoa samting wea Dadi lo heven talem lo mi.”​—John 12:49, 50.