OLKETA KWESTIN WEA YOUNG PIPOL GAREM
Hao Nao Bible Savve Helpem Mi?—Part 1: Savve Gud lo Bible blo Iu
“Mi trae for readim Bible, bat mi hol bak bikos hem long tumas!”—Briana, 15.
Hao, iu feel olsem tu? Disfala article savve helpem iu!
Why nao hem gud for readim Bible?
Hao, for readim Bible hem boring lo iu? Sapos olsem, mifala minim iu. Maet lo tingting blo iu, Bible hem buk wea garem staka thousand page wea fulap lo olketa smol raeting and no eni piksa insaed, and hem no interesting olsem TV and olketa video lo Internet!
Bat tingim diswan: Sapos iu faendem wanfala big old box wea olketa expensive samting stap insaed, bae iu laek for faendaot wat nao insaed, iaman?
Bible hem olsem datfala box. Hem fulap witim olketa best advaes wea bae helpem iu for
Mekem olketa gud disison
Stap gud witim parents blo iu
Faendem olketa gud fren
Deal witim stress
Hao nao wanfala old buk olsem savve helpem iumi distaem? Hem bikos “evri toktok insaed long olketa Holy Raeting hem kam from God.” (2 Timothy 3:16) So advaes insaed lo Bible hem kam from God wea barava wise winim eniwan lo universe.
Bible hem olsem wanfala box wea garem olketa expensive samting. Hem garem olketa best advaes
Hao nao mi shud duim Bible reading?
Wanfala wei, hem for read from start go kasem end. Datwan bae helpem iu for garem idea lo message wea stap lo Bible. Staka difren wei stap for readim Bible. Lukim tufala example hia:
Iu savve readim 66 Bible buk followim order lo hao olketa stap insaed Bible, start from Genesis go kasem Revelation.
Iu savve readim Bible followim taem wea olketa samting wea Bible storyim hem happen.
Idea: Appendix 4 lo Tul for Studyim Bible brochure hem garem list lo olketa main samting wea happen lo laef blo Jesus lo earth, followim taem wea olketa samting hia happen.
Mek-tu wei, hem for chusim wanfala story lo Bible wea storyim olketa samting wea semsem witim hard taem wea iu kasem. Example nao:
Hao, iu laek garem olketa fren wea iu savve trustim? Readim story blo Jonathan and David. (Fas Samuel, chapter 18-20) Then iusim datfala worksheet “How to Find Loyal Friends” for lanem samting from datfala story wea savve helpem iu.
Hao, iu no laek for foldaon taem iu kasem temptation? Readim story blo Joseph abaotem hao hem no foldaon taem hem kasem temptation. (Jenesis, chapter 39) Then iusim tufala worksheet hia: “How to Resist Temptation . . . Joseph—Part 1” and “Falsely Accused! Joseph—Part 2” for lanem samting from datfala story wea savve helpem iu.
Hao, iu laek for savve hao prea savve helpem iu? Readim story blo Nehemiah. (Nehemaea, chapter 2) Then iusim worksheet “God Ansarem Prea Bilong Hem” for lanem samting from datfala story wea savve helpem iu.
Idea: Taem iu readim Bible, mek sure ples hem kwaet mekem iu savve concentrate.
Mek thri wei, hem for chusim wanfala story or psalm, then readim and ting raonem hao hem fitim iu. Bihaen iu readim, ting raonem olketa kwestin hia:
Why nao Jehovah putim disfala story lo Bible?
Wat nao mi lanem abaotem wei blo Jehovah and hao hem duim olketa samting from datfala story?
Hao nao mi savve followim wat mi lanem from disfala story?
Idea: Garem aim! Raetem date wea iu laek startim Bible-reading program blo iu. Iu savve iusim schedule for Bible reading wea stap lo jw.org.