Virgin Mary—Wat Nao Bible Talem Abaotem Hem?
Ansa from Bible
Bible sei dat Mary, mami blo Jesus, garem spesol privilege for bornem Jesus taem hem still wanfala virgin. Bible profesi abaotem disfala mirakol lo buk blo Isaiah and story abaotem fulfillment blo hem lo Gospel blo Matthew and Luke.
Lo profesi abaotem wei wea Messiah bae born, Isaiah sei: “Lukim! Wanfala young woman bae hem babule and bornem wanfala son.” (Isaiah 7:14) Holy spirit helpem Gospel raeta Matthew for connectim profesi blo Isaiah lo Mary wea hem babule witim Jesus. Afta Matthew storyim dat Mary hem babule lo mirakol wei, hem sei: “Evri samting hia hem happen for mekem toktok blo Jehovah wea profet blo hem talem hem kamap tru, wea sei: ‘Lukim! Datfala virgina bae hem babule and bornem wanfala son, and olketa bae nemim hem lo Immanuel,’ wea minim, ‘God Stap Witim Iumi.’”—Matthew 1:22, 23.
Gospel raeta Luke tu storyim wei wea Mary babule lo mirakol wei. Hem sei God sendem angel Gabriel “lo wanfala virgin wea nem blo hem Mary, wea hem engage for maritim Joseph wea hem from laen blo David.” (Luke 1:26, 27) Mary confirmim dat hem wanfala virgin. Afta Mary savve dat hem bae kamap mami blo Jesus, datfala Messiah, hem sei: “Hao nao diswan bae hem happen? No enitaem mi sleep witim eni man.”—Luke 1:34.
Hao nao wanfala virgin savve bornem pikinini?
God iusim holy spirit wea hem paoa blo hem for mekem Mary pregnant. (Matthew 1:18) Angel sei lo Mary: “Holy spirit bae kam lo iu and paoa blo Most Hae bae protectim iu. Dastawe datfala pikinini wea born bae hem holy and olketa bae kolem hem Son blo God.”b (Luke 1:35) God duim mirakol for transfarem laef blo Son blo hem and putim insaed bele blo Mary, and Jesus born olsem wanfala pikinini.
Why nao Jesus born lo datfala virgin?
God iusim datfala virgin for bornem Jesus for hem garem perfect body mekem hem savve sevem iumi olketa man from sin and dae. (John 3:16; Hebrews 10:5) God transfarem laef blo Jesus go insaed bele blo Mary. Then, holy spirit blo God protectim datfala baby wea grow insaed bele blo Mary mekem hem no garem sin.—Luke 1:35.
Taem Jesus born hem wanfala perfect human, olsem Adam wea hem perfect man bifor hem sin. Bible sei olsem abaotem Jesus: “No enitaem hem duim sin.” (1 Peter 2:22) From Jesus hem perfect, hem fit for peim datfala ransom for mekem iumi olketa man free from sin and dae.—1 Corinthians 15:21, 22; 1 Timothy 2:5, 6.
Hao, Mary hem virgin for full laef blo hem?
Bible no teachim dat Mary hem virgin for full laef blo hem. Bat, hem storyim dat Mary garem olketa nara pikinini.—Matthew 12:46; Mark 6:3; Luke 2:7; John 7:5.
Bible teachim dat Jesus garem olketa sibling
Wei wea Jesus born lo wanfala virgin hem “Immaculate Conception”?
Nomoa. According lo New Catholic Encyclopedia, datfala doctrine blo Immaculate Conception “hem biliv wea sei Virgin Mary hem free from ORIGINAL SIN start taem hem insaed bele blo mami blo hem. Evri narawan olketa inheritim sin taem olketa born . . . Bat Mary kasem spesol BLESSING, hem no garem sin.”c
Bat, no eni ples lo Bible hem teachim dat Mary hem free from original sin. (Psalm 51:5; Romans 5:12) Mary duim samting wea showim dat hem wanfala sinner taem hem givim sakrifaes followim datfala Law blo Moses wea olketa mami mas duim for kasem forgiveness for sin blo olketa. (Leviticus 12:2-8; Luke 2:21-24) New Catholic Encyclopedia sei: “Immaculate Conception hem no teaching from Bible . . . [Hem] teaching blo Church nomoa.”
Hao nao iumi shud ting lo Mary?
Mary setim gud example blo faith, wei for obey, hambol, and deep love for God. Hem wanfala lo olketa faithful wan wea iumi laek for imitatim.—Hebrews 6:12.
Bat, nomata Mary kasem spesol privilege for kamap mami blo Jesus, Bible no teachim dat iumi shud worshipim or prea lo hem. Jesus no givim spesol honor lo mami blo hem, and hem no talem olketa disaepol blo hem for duim datwan tu. Olketa Gospel and wanfala verse lo Acts nomoa story abaotem Mary, nara 22-fala buk lo Niu Testament no mentionim Mary.—Acts 1:14.
No eni verse lo Bible storyim dat olketa Christian lo bifor givim spesol honor or worshipim hem. Bat, Bible teachim olketa Christian for worshipim God nomoa.—Matthew 4:10.
a Datfala Hebrew word wea olketa transleitim “young woman” lo profesi blo Isaiah hem ʽal·mahʹ, wea savve refer lo virgin gele or woman wea no virgin. Bat, thru lo lead blo holy spirit, Matthew iusim datfala specific Greek word par·theʹnos, wea minim “virgin.”
b Samfala man taem olketa herem datfala term “Son blo God,” olketa tingse God hem duim sex witim wanfala woman. Bat, Bible no teachim disfala idea. Instead, Bible kolem Jesus “ Son blo God” and “firstborn lo evri samting wea God creatim” bikos hem nao first and only wan wea God seleva creatim. (Colossians 1:13-15) And tu, Bible refer lo first man, Adam, “son blo God.” (Luke 3:38) Diswan hem bikos God nao creatim Adam.
c Second Edition, Volume 7, page 331.