“Iufala Mas Faithful and Gohed Strong”

1-2. Hao nao olketa Christian maet olsem wanfala tol building? (1 Corinth 15:58)

LO 1978, olketa buildim wanfala barava tol building wea 60 story hae lo Tokyo, Japan. From earthquake savve happen olowe lo datfala city, maet pipol ting, ‘Hao datfala building bae strong tu?’ Datfala building barava strong. Why nao olsem? Olketa engineer designim for barava strong and flexible for followim movement blo earthquake. Hao nao olketa Christian olsem datfala tol building?

² Olketa Christian olsem datfala building wea strong and flexible. Olketa need for gohed strong for obeyim olketa law and standard blo Jehovah. (Readim 1 Corinth 15:58.) Olketa “willing for obey” and no eniwan bae changem disison blo olketa. Bat lo semtaem, olketa ‘no forcem tingting bilong olketa,’ bat olketa mas flexible fitim each situation or if need kamap. (Jas. 3:17) Olketa Christian wea lane for garem balance tingting bae no strict tumas or ova tumas for acceptim nomoa eni samting. Lo disfala article, bae iumi storyim wanem iumi savve duim for gohed strong for faithful. Iumi bae storyim tu faevfala samting wea Satan iusim for spoelem disison blo iumi for gohed faithful and lanem wat iumi savve duim for againstim hem.

WAT NAO IUMI SAVVE DUIM FOR GOHED FAITHFUL?

3. Olketa wanem law nao Jehovah givim lo Acts 15:28, 29?

³ From Jehovah hem highest person for givim law, hem evritaem storyim klia olketa law wea hem givim lo pipol blo hem. (Isa. 33:22) For example, governing body lo first century storyim thrifala samting wea olketa Christian mas stand strong lo hem: (1) Iumi mas worshipim nomoa Jehovah and rejectim wei for worshipim idol, (2) respectim hao blood hem holy, and (3) followim hae standard blo Bible abaotem sex. (Readim Acts 15:28, 29.) Hao nao olketa Christian distaem savve gohed stand strong lo thrifala samting hia?

4. Hao nao iumi savve worshipim Jehovah nomoa? (Revelation 4:11)

⁴ Iumi mas worshipim nomoa Jehovah and rejectim wei for worshipim idol. Jehovah givim komand lo olketa Israelite for worshipim hem nomoa. (Deut. 5:6-10) And taem Devil temptim Jesus, Jesus talem stret iumi mas worshipim nomoa Jehovah. (Matt. 4:8-10) Dastawe iumi no worshipim olketa idol. And tu, iumi no treatim eniwan olsem idol blo iumi, olsem olketa leader lo religion, politik, famous pipol lo sports and entertainment. And tu, iumi no mekhae lo olketa olsem olketa god. Iumi stand for Jehovah and worshipim hem nomoa bikos hem nao “wakem evri samting.”​—Readim Revelation 4:11.

5. Why nao iumi obeyim law blo Jehovah abaotem hao laef and blood hem holy?

⁵ Iumi obeyim law blo Jehovah abaotem hao laef and blood hem holy. Why? Bikos Jehovah sei blood hem representim laef, and laef hem spesol present from hem. (Lev. 17:14) Lo firstaem wea Jehovah letem man for kaikaim animal, hem talem for mas no kaikaim blood. (Gen. 9:4) Hem repeatim sem komand taem hem givim Law blo Moses lo olketa Israelite. (Lev. 17:10) And hem givim direction lo governing body lo first century for talem evri Christian for mas “stap klia long blood.” (Acts 15:28, 29) Iumi faithful for obeyim datfala komand taem iumi disaedem wanem kaen medical treatment for acceptim.b

6. Wat nao iumi mas duim for obeyim hae standard blo Jehovah abaotem sex?

⁶ Iumi barava obeyim hae standard blo Jehovah abaotem sex. (Heb. 13:4) Aposol Paul iusim interesting tokpiksa taem hem sei iumi mas “killim dae feeling” for laek durong, diswan minim iumi mas barava waka hard for aotem eni feeling for laek durong. Iumi no laek for lukim or duim eni samting wea savve lead go for durong. (Col. 3:5; Job 31:1) Taem iumi kasem temptation, iumi mas kwiktaem rejectim eni tingting or akson wea savve spoelem frenship blo iumi witim God.

7. Wat nao iumi shud disaed for duim, and why nao olsem?

⁷ Jehovah expectim iumi for ‘barava laek for obeyim hem.’ (Rome 6:17) Evritaem, wat hem talem hem for gud blo iumi, and hard for iumi changem olketa law blo hem. (Isa. 48:17, 18; 1 Cor. 6:9, 10) Iumi duim best for mekem Jehovah hapi and showim sem attitude olsem man wea raetem psalm, wea sei: “Mi bin promis finis fo obeim olketa lo blong yu, go-go kasem taem mi dae.” (Sams 119:112, SIPB) Bat Satan bae trae for spoelem disison blo iumi for gohed faithful. Olketa wanem samting nao hem iusim?

WAT NAO SATAN IUSIM FOR TRAE SPOELEM DISISON BLO IUMI?

8. Hao nao Satan iusim persecution for trae spoelem disison blo iumi for gohed faithful?

⁸ Persecution. Satan iusim violence and pressure from olketa narawan for trae spoelem disison blo iumi for gohed faithful. Aim blo Satan hem for “kaikaim” iumi, wea minim for spoelem frenship blo iumi witim Jehovah. (1 Pet. 5:8) Lo first century pipol threatenim, whipim, and killim dae olketa Christian bikos olketa disaed strong for gohed faithful. (Acts 5:27, 28, 40; 7:54-60) Distaem tu Satan gohed for persecutim pipol blo Jehovah. Diswan showaot klia lo hao olketa killim nogud olketa brata and sista lo Russia and olketa nara kantri. And pipol persecutim olketa brata and sista lo staka difren wei.

9. Storyim example wea showimaot iumi need for careful lo olketa pressure wea maet iumi no kwiktaem for luksavve.

⁹ Olketa pressure wea man no kwiktaem for luksavve. Nara samting wea Satan iusim tu hem “olketa kleva trik.” (Eph. 6:11) Tingim wat happen lo Brata Bob wea admit lo hospital for kasem big operation. Hem talem olketa doctor nomata wat hem happen, hem bae no acceptim blood transfusion. Doctor wea bae duim operation agree and respectim disison blo Bob. Bat lo naet bifor datfala operation, nara doctor go lukim Bob bihaen famili blo Bob go bak lo haos. Hem talem Bob olketa doctor maet no iusim blood, bat bae olketa keepim redi incase olketa needim. Maet datfala doctor tingse Bob bae changem mind blo hem taem famili no stap. Bat Bob gohed disaed strong for faithful and sei nomata wat hem happen, hem bae no acceptim blood.

10. Why nao hem danger for followim tingting blo pipol lo world? (1 Corinth 3:19, 20)

¹⁰ Tingting blo pipol. If iumi garem tingting olsem pipol lo world, maet gogo iumi ignorem Jehovah and no followim olketa standard blo hem. (Readim 1 Corinth 3:19, 20.) Staka taem “wisdom bilong world” hem isi tumas for influencim pipol. Tingting blo pipol lo Pergamum and Thyatira influencim samfala Christian lo there for durong and for worshipim idol. Jesus givim strong kaonsel lo tufala kongregeson hia bikos olketa acceptim nomoa wei for durong. (Rev. 2:14, 20) Distaem pipol lo world trae for influencim iumi for acceptim olketa rong idea. Olketa famili member and olketa narawan maet trae for convincim iumi for followim feeling blo iumi and for brekem olketa law blo Jehovah. For example, olketa maet sei olketa standard lo Bible hem aot of date, and hem olraet nomoa for duim eni samting iumi laekem.

11. Taem iumi disaed strong for gohed faithful, wat nao iumi mas avoidim?

¹¹ Samfala taem maet iumi tingse direction wea iumi kasem from Jehovah no klia. Maet iumi ting for duim tu samting wea winim wanem “olketa raetem finis.” (1 Cor. 4:6) Olketa leader blo religion lo taem blo Jesus nao guilty lo diswan. Olketa addim own rul blo olketa seleva witim Law, and datwan mekem hem hard tumas for ordinary pipol. (Matt. 23:4) Jehovah iusim Bible and organization blo hem for givim iumi klia direction. So iumi shud no addim moa eni instruction lo datwan. (Prov. 3:5-7) Dastawe, iumi mas no duim olketa samting wea winim wanem olketa raetem finis lo Bible or mekem olketa rul for olketa brata and sista abaotem olketa personal samting.

12. Hao nao Satan iusim olketa idea blo man for misleadim pipol?

¹² Information wea savve misleadim pipol. Satan iusim “tingting bilong man” and “olketa iusles samting bilong disfala world” for misleadim and divaedem pipol. (Col. 2:8) Lo first century, diswan includim olketa teaching wea base lo idea blo man, teaching blo olketa Jew wea no base lo olketa scripture, and teaching wea sei olketa Christian mas keepim Law blo Moses. Olketa information hia misleadim pipol bikos hem mekem pipol for no laek lisin lo tru wisdom wea kam from Jehovah. Distaem Satan iusim media and social network for spredim olketa laea story wea no garem pruv and olketa false report wea olketa leader blo politik nao promotim. Lo taem blo COVID-19 pandemic iumi herem staka false information olsem.c Olketa Jehovah’s Witness wea lisin lo direction wea kam from organization blo Jehovah, olketa no wari olsem pipol wea lisin lo olketa false information.​—Matt. 24:45.

13. Why nao iumi mas careful lo olketa samting wea savve distractim iumi?

¹³ Olketa samting wea savve distractim man. Iumi mas gohed focus lo “olketa samting wea barava important.” (Phil. 1:9, 10) Olketa samting wea distractim iumi savve weistim staka taem and energy blo iumi. Olketa normal samting olsem kaikai, drink, entertainment, and waka for selen savve distractim iumi if iumi allowim olketa samting hia for kamap main samting lo laef blo iumi. (Luke 21:34, 35) And tu, evriday iumi herem and read abaotem olketa protest and debate blo politik. Iumi mas mek sure olketa debate hia no distractim iumi. Nogud iumi start for sapotim wanfala grup lo mind and heart blo iumi. Aim blo Satan for iusim evri samting hia, hem for spoelem disison blo iumi for duim stret samting. Distaem bae iumi storyim hao for againstim Satan and for gohed strong for faithful.

WAT NAO IUMI SAVVE DUIM FOR GOHED STRONG?

14. Wat nao wanfala samting wea savve helpem iumi for gohed strong for saed witim Jehovah?

¹⁴ Ting abaotem why iu dedicate and baptaes. Iu duim olsem bikos iu laek for saed witim Jehovah. Tingim bak wat nao convincim iu dat iu faendem truth nao. Iu lanem truth abaotem Jehovah, and datwan mekem iu respectim and lovem Dadi blo iu lo heven. Iu start for garem faith and datwan mekem iu repent. Iu lusim olketa nogud wei blo iu and duim wanem God laekem. Iu hapi tumas taem iu luksavve God forgivim iu. (Ps. 32:1, 2) Iu attendim olketa Christian meeting and start for storyim lo olketa narawan olketa naes samting wea iu lanem. From iu dedicate and baptaes finis, distaem iu gohed wakabaot lo road for laef and disaed strong for no lusim datfala road.​—Matt. 7:13, 14.

15. Why nao hem important for studyim Bible and ting raonem?

¹⁵ Studyim Bible and ting raonem. Tree wea rut blo hem go deep insaed graon savve stand strong. Iumi tu savve stand strong if iumi garem strong faith lo toktok blo Jehovah insaed Bible. Wanfala tree wea gohed for grow, olketa rut blo hem go deep insaed graon and spred go moa. Taem iumi studyim Bible and ting raonem, iumi strongim faith blo iumi and sure olketa wei blo God hem best. (Col. 2:6, 7) Ting raonem hao olketa instruction, advaes, and protection blo Jehovah helpem pipol blo hem bifor. For example, Ezekiel barava concentrate taem angel measurem gud temple wea hem lukim lo vision. Datfala vision strongim Ezekiel, and iumi tu lanem olketa important leson lo hao for obeyim olketa standard blo Jehovah for tru worship.d (Ezek. 40:1-4; 43:10-12) Iumi tu savve kasem gud samting taem iumi spendem taem for studyim and ting raonem olketa deep teaching lo Bible.

16. From Bob garem heart wea faithful, hao nao datwan protectim hem? (Sams 112:7, SIPB)

¹⁶ Gohed garem heart wea faithful. King David talem strongfala love blo hem for Jehovah taem hem singsing olsem: “Mi garem heart wea faithful, O God.” (Ps. 57:7) Iumi tu savve garem heart olsem from iumi barava trustim Jehovah. (Readim Sams 112:7, SIPB.) Tingim hao diswan helpem Bob wea iumi storyim finis. Taem doctor talem hem olketa bae keepim samfala blood redi incase olketa needim, Bob talem stret if olketa bae givim hem blood, hem bae lusim hospital semtaem. Bihaen Bob sei: “Mi barava sure lo wat bae mi duim, and mi no wari.”

17. Wat nao iumi savve lanem from experience blo Bob? (Lukim tu piksa.)

¹⁷ Bob gohed faithful bikos hem disaed longtaem finis for stand strong bifor hem go lo hospital. First samting, hem laekem tumas for mekem Jehovah hapi. Mek-tu, hem studyim gud wat Bible and olketa pablikeson blo iumi talem abaotem hao laef and blood hem holy. Mek-thri, hem barava sure hem bae kasem gud samting if hem followim direction blo Jehovah. Iumi tu savve garem heart wea faithful nomata wanem hard taem nao iumi kasem.

18. Wat nao iumi lanem from example blo Barak abaotem wei for trustim Jehovah? (Lukim piksa lo front page.)

¹⁸ Trustim Jehovah. Tingim hao Barak winim olketa enemy bikos hem trustim direction blo Jehovah. Nomata pipol lo Israel no garem eni shield or spia, Jehovah talem Barak for go faetem datfala Canaanite army wea garem evri weapon for faet, wea Sisera komanda lo hem. (Judg. 5:8) Profet Deborah talem Barak for go daon lo ples wea level for faetem Sisera and 900 chariot blo hem. Nomata Barak savve bae hem hard tumas for faet againstim olketa fast chariot lo level ples olsem, hem gohed for obey. Taem olketa soldia go daon from Maunt Tabor, Jehovah mekem hevi rain for foldaon. Olketa chariot blo Sisera stuck insaed mud, and Jehovah helpem Barak for win. (Judg. 4:1-7, 10, 13-16) So Jehovah bae helpem iumi tu for win, if iumi trustim hem and direction wea iumi kasem from organization blo hem.​—Deut. 31:6.

DISAED STRONG FOR GOHED FAITHFUL

19. Why nao iumi disaed strong for gohed faithful?

¹⁹ Iumi need for faet strong for gohed faithful taem iumi stap lo disfala nogud world. (1 Tim. 6:11, 12; 2 Pet. 3:17) Iumi laek disaed strong for gohed faithful nomata iumi feisim persecution, pressure wea man no kwiktaem for luksavve, tingting blo pipol, information wea savve misleadim pipol, and samting wea savve distractim man. (Eph. 4:14) Iumi laek for gohed strong tu for faithful lo worship blo iumi for Jehovah and evritaem obeyim olketa komand blo hem. Bat lo semtaem iumi need for flexible tu. Lo next article, iumi bae storyim hao Jehovah and Jesus showim perfect example lo wei for flexible.