Gohed Redi for Day blo Jehovah

1. Wat nao iumi mas duim for sev lo day blo Jehovah?

LO BIBLE, datfala toktok “day blo Jehovah” hem minim taem wea Jehovah judgem olketa enemy blo hem and sevem pipol blo hem. Samfala taem lo bifor Jehovah bin duim diswan. (Isa. 13:1, 6; Ezek. 13:5; Zeph. 1:8) “Day blo Jehovah” lo taem blo iumi bae start taem gavman attakim Bigfala Babylon and hem bae end lo Armageddon. For iumi sev lo datfala “day,” iumi need for prepare distaem. Jesus teachim iumi hao iumi mas duim samting for redi for datfala “bigfala trabol,” and tu for mas gohed redi for datwan.​—Matt. 24:21; Luke 12:40.

2. Why nao hem gud for iumi lukluk lo buk blo 1 Thessalonica?

² Lo first leta blo aposol Paul for olketa lo Thessalonica, hem iusim samfala tokpiksa for helpem olketa Christian for gohed redi for bigfala day blo Jehovah for judgem pipol. Paul savve day blo Jehovah bae no kam lo datfala taem. (2 Thess. 2:1-3) Nomata olsem, hem encouragem olketa brata blo hem for redi and ting lo datfala day olsem bae hem kam tumoro nao, and iumi tu savve followim kaonsel blo hem. Bae iumi storyim hao hem explainim: (1) hao day blo Jehovah bae kam, (2) hu nao bae no sev lo datfala day, and (3) wanem iumi savve duim for redi mekem iumi sev.

HAO NAO DAY BLO JEHOVAH BAE KAM?

3. Hao nao day blo Jehovah bae kam olsem man for steal lo naet? (Lukim tu piksa.)

³ “Olsem man for steal long naet.” (1 Thess. 5:2) Diswan hem first wan lo thrifala tokpiksa wea Paul iusim for describem hao day blo Jehovah bae kam. Staka taem olketa man for steal savve duim samting kwiktaem and lo naet taem pipol no expectim olketa. Day blo Jehovah tu bae kam kwiktaem and bae mekem staka pipol for seke. Nomata olketa tru Christian tu maet sapraes lo hao olketa samting hia bae happen fast tumas. Bat iumi bae no olsem olketa nogud pipol wea bae distroe.

4. Hao nao day blo Jehovah hem olsem pain wea kasem woman wea redi for bornem pikinini?

⁴ “Olsem taem bigfala pain hem seknomoa kasem woman wea klosap for bornem pikinini.” (1 Thess. 5:3) Wanfala mami wea babule no savve lo barava taem wea baby bae born. Bat hem savve datwan bae happen. Taem hem redi for bornem baby, datfala pain bae start kwiktaem and hem bae no savve stopem. Day blo Jehovah bae hem olsem tu, iumi no savve lo day and hour wea hem bae start. Nomata olsem, iumi sure datfala day bae kam, and datfala taem wea God judgem nogud pipol bae seke nomoa happen and olketa no savve misstim.

5. Hao nao bigfala trabol hem olsem daylaet?

⁵ Olsem daylaet. Lo mek thri tokpiksa, Paul storyim moa olketa man for steal lo naet. Bat lo disfala tokpiksa hem comparem day blo Jehovah witim daylaet. (1 Thess. 5:4) Olketa man wea steal lo naet maet busy tumas lo wat olketa duim and gogo olketa forgetim taem nao. Then seknomoa hem daylaet lo olketa and olketa no savve haed nao. Lo sem wei, bigfala trabol bae showimaot klia olketa wea olsem man for steal wea stap lo darkness, wea gohed for duim olketa samting wea God no hapi lo hem. Iumi no olsem olketa, iumi redi taem iumi rejectim olketa samting wea Jehovah no hapi lo hem and gohed duim “evri samting wea gud and wea raeteous and stret.” (Eph. 5:8-12) Paul iusim nara tufala tokpiksa for describem olketa wea bae no sev.

HU NAO BAE NO SEV LO DAY BLO JEHOVAH?

6. Hao nao staka pipol distaem olketa olsem olketa wea sleep? (1 Thessalonica 5:6, 7)

⁶ “Olketa wea sleep.” (Readim 1 Thessalonica 5:6, 7.) Paul comparem olketa wea bae no sev lo day blo Jehovah witim pipol wea sleep. Olketa no savve lo taem or olketa samting wea gohed raonem olketa. Dastawe, olketa no luksavve lo olketa big samting wea gohed for happen or no laek for duim samting. Distaem staka pipol sleep lo spiritual wei. (Rome 11:8) Olketa no luksavve lo olketa saen wea pruvim iumi stap lo “olketa last day” and hao bigfala trabol klosap for kam. Olketa big samting wea happen lo world maet mekem samfala wea sleep lo spiritual wei for wekap and interest lelebet lo Kingdom message. Nomata olsem, staka wea wekap, sleep bak moa. Nomata samfala wea bilivim datfala judgment day olketa tingse hem farawe yet. (2 Pet. 3:3, 4) Bat evriday hem moa important for iumi followim kaonsel lo Bible for gohed wekap.

7. Hao nao pipol wea God bae distroem, olketa olsem pipol wea drunk?

⁷ “Olketa wea drunk.” Aposol Paul comparem olketa wea God bae distroem witim pipol wea drunk. Pipol wea drunk slow for duim samting followim wanem happen raonem olketa, and no savve mekem gudfala disison. Olsem tu, nogud pipol no savve duim samting followim warning blo God. Olketa chusim laef wea leadim olketa for dae. Iumi olketa Christian kasem encouragement for no olsem pipol wea drunk, bat for gohed garem gudfala tingting. (1 Thess. 5:6) Wanfala Bible scholar sei man wea garem gudfala tingting hem ‘stedy, no panic, luksavve lo samting wea stret, and from datwan, hem savve mekem gudfala disison.’ Why nao iumi need for gohed stedy and no panic? Bikos datwan bae helpem iumi for no involve insaed eni samting saed lo politik or olketa issue insaed community. Pressure for teksaed lo olketa samting olsem bae gohed increase taem day blo Jehovah kakam klosap. Nomata olsem, iumi mas no wari abaotem wat iumi bae duim taem situation olsem kamap. Spirit blo God savve helpem iumi for stedy and no panic, and for mekem gudfala disison.​—Luke 12:11, 12.

WAT NAO IUMI SAVVE DUIM FOR REDI FOR DAY BLO JEHOVAH?

8. Wanem tokpiksa nao 1 Thessalonica 5:8 storyim wea savve helpem iumi for gohed wekap and garem gudfala tingting? (Lukim tu piksa.)

⁸ ‘Werem datfala samting for kavarem chest and datfala helmet.’ Paul comparem iumi witim olketa soldia wea redi and werem full suit for faet. (Readim 1 Thessalonica 5:8.) Wanfala soldia wea on duty shud evritaem redi for faet. Iumi tu olsem. Iumi shud evritaem redi for day blo Jehovah taem iumi werem datfala samting for kavarem chest, wea hem faith and love, and datfala helmet wea hem nao hope. Olketa wei hia savve barava helpem iumi.

9. Hao nao faith blo iumi savve protectim iumi?

⁹ Samting for kavarem chest savve protectim heart blo soldia. Faith and love protectim tokpiksa heart blo iumi. Hem helpem iumi for gohed servem God and followim Jesus. Faith mekem iumi sure Jehovah bae rewardim iumi taem iumi lukaotem hem witim full heart. (Heb. 11:6) Faith bae helpem iumi for gohed loyal lo Leader blo iumi Jesus, nomata iumi feisim eni challenge. Taem iumi lane from example blo olketa distaem wea gohed faithful nomata olketa kasem persecution or hard taem saed lo selen, datwan savve strongim faith blo iumi for deal witim eni challenge. And taem iumi followim example blo olketa wea mekem laef simpol and putim Kingdom first, iumi bae no foldaon lo trap for laekem tumas material samting.b

10. Hao nao love for God and for pipol helpem iumi for gohed preach?

¹⁰ Love tu hem important for helpem man for gohed wekap and garem gudfala tingting. (Matt. 22:37-39) Love for God savve helpem iumi for gohed preach nomata maet iumi kasem hard taem from datwan. (2 Tim. 1:7, 8) From iumi lovem tu olketa wea no worshipim Jehovah iumi gohed preach, kavarem territory blo iumi, and duim tu telephone witnessing and leta raeting. Iumi hope wanday pipol bae change and duim stret samting.​—Ezek. 18:27, 28.

11. Hao nao love for olketa brata and sista savve helpem iumi? (1 Thessalonica 5:11)

¹¹ Iumi lovem tu olketa brata and sista blo iumi. Iumi showimaot love taem iumi “encouragem and strongim” each other. (Readim 1 Thessalonica 5:11.) Olsem olketa soldia wea faet saed bae saed, iumi gohed strongim each other. Samfala taem lo faet, wanfala soldia maet mekem nara soldia lo grup blo hem for garekil, bat hem no min for duim datwan. Olsem tu, iumi bae no min for duim samting for spoelem brata or sista or peim bak nogud samting wea hem duim. (1 Thess. 5:13, 15) Iumi showimaot love tu taem iumi respectim olketa wea lead lo kongregeson. (1 Thess. 5:12) Taem Paul raetem disfala leta, kongregeson lo Thessalonica just start and no kasem wan year yet. Luk olsem, olketa elder lo datfala kongregeson no garem staka experience and maet mekem samfala mistek. Nomata olsem, olketa fit for kasem respect. Taem bigfala trabol hem kakam klosap, maet iumi need for depend lo olketa elder for direction winim eni narataem. Maet bae hem hard for kasem direction from world hedquarter and branch office, so hem important for lovem and respectim olketa elder blo iumi distaem. Nomata wanem happen, iumi mas gohed garem gudfala tingting and no focus lo wik point blo olketa, bat hem gud for focus lo hao Jehovah leadim olketa faithful man hia anda lo direction blo Christ.

12. Hao nao hope hem protectim tingting blo iumi?

¹² Olsem helmet protectim hed blo wanfala soldia, hope wea iumi garem for sev hem protectim tingting blo iumi. Taem hope blo iumi strong, iumi luksavve hao olketa tings lo world hem iusles nomoa. (Phil. 3:8) Hope helpem iumi for stedy and no panic. Wallace and Laurinda wea serve lo Africa experiencem diswan. Insaed thrifala week nomoa, dadi blo Wallace dae and mami blo Laurinda tu dae. Bikos lo COVID-19 pandemic, olketa hard for go bak lo hom for stap witim famili. Wallace sei: “Resurrection hope helpem mi for no ting abaotem olketa last day blo tufala bifor tufala dae, bat hem helpem mi for ting abaotem olketa first day blo tufala lo niu world. Datfala hope helpem mi for stedy taem mi gohed deal witim sorre feeling wea mi garem.”

13. Wat nao iumi savve duim for kasem holy spirit?

¹³ “No blokem waka bilong holy spirit.” (1 Thess. 5:19) Paul sei holy spirit hem waka lo iumi. Taem iumi letem holy spirit blo God for waka lo iumi, bae iumi barava strong for duim waka blo Jehovah and laek for duim wanem hem stret. (Rome 12:11) Wat nao iumi savve duim for kasem holy spirit? Iumi savve prea and askem God for givim lo iumi, studyim Bible, and associate witim organization blo hem wea holy spirit leadim. Taem iumi duim olsem, datwan bae helpem iumi for garem olketa wei blo holy spirit.​—Gal. 5:22, 23.

14. Wat nao iumi mas no duim if iumi laek gohed kasem holy spirit blo God? (Lukim tu piksa.)

¹⁴ Bihaen God givim iumi holy spirit blo hem, iumi mas careful for “no blokem waka bilong holy spirit.” God only givim holy spirit lo olketa wea tingting and wei blo olketa klin. Hem bae no gohed givim holy spirit lo iumi if iumi gohed for ting abaotem and duim samting wea no klin. (1 Thess. 4:7, 8) For iumi gohed kasem holy spirit, iumi mas “no ting daonem olketa profesi.” (1 Thess. 5:20) Lo disfala verse, “olketa profesi” hem minim olketa message wea kam from holy spirit blo God, olsem message abaotem day blo Jehovah and hao iumi stap lo taem wea barava important. Iumi mas no tingse day blo Jehovah hem farawe yet, and Armageddon bae no kam taem iumi laef yet. Bat taem iumi gohed keepim wei blo iumi klin and busy for duim ‘samting wea showimaot iumi faithful’ evriday, iumi showimaot iumi evritaem tingim hao datfala day hem klosap​.—2 Pet. 3:11, 12.

“CHEKIM EVRI SAMTING FOR MEK SURE”

15. Wanem nao iumi savve duim for no bilivim information wea kam from olketa demon? (1 Thessalonica 5:21)

¹⁵ Klosap nao olketa enemy blo God bae talemaot: “Iumi garem peace and stap gud nao!” (1 Thess. 5:3) Information wea kam from olketa demon bae kasem evriwea lo earth and bae hem misleadim staka pipol. (Rev. 16:13, 14) Waswe, bae hem misleadim iumi tu? Iumi bae no bilivim datwan if iumi “chekim evri samting for mek sure [or, “testim”]” if hem tru. (Readim 1 Thessalonica 5:21, lukim olketa study note lo English.) Datfala Greek word wea iumi transleitim “chekim evri samting for mek sure” hem join witim wei for testim olketa metal olsem gold and silver. So iumi need for chekim wanem iumi herem and readim if hem tru. Hem important for olketa lo Thessalonica duim datwan, and hem barava important for iumi especially taem bigfala trabol hem kakam klosap. Winim wei for bilivim evri samting wea olketa narawan talem, iumi shud iusim gudfala tingting and comparem wanem iumi readim and herem witim wanem Bible and organization blo Jehovah talem. Taem iumi duim olsem, iumi bae no bilivim eni information wea kam from olketa demon.​—Prov. 14:15; 1 Tim. 4:1.

16. Wanem hope nao iumi garem, and wat nao iumi laek for duim?

¹⁶ Iumi savve pipol blo God bae sev lo datfala big trabol. Bat iumi each wan no savve wat nao bae happen lo iumi tumoro. (Jas. 4:14) Nomata olsem, if iumi laef thru lo bigfala trabol or dae bifor datwan, iumi bae kasem laef olowe if iumi gohed faithful. Olketa anointed wan bae stap witim Christ lo heven, and olketa nara sheep bae stap lo paradaes lo earth. Iumi evriwan laek for tingim evritaem datfala nambawan hope and gohed redi for day blo Jehovah!