Followim Jehovah Taem Iu Trainim Pikinini

“Waswe, evri parents no stretem pikinini bilong olketa?”—HEBREWS 12:7, Contemporary English Version.

1, 2. Why nao parents faendem hard for trainim pikinini bilong olketa distaem?

WANFALA survey wea olketa duim long Japan tu-thri year go finis showimaot haf long olketa full-grown pipol wea olketa askem sei parents story lelebet taem nomoa witim pikinini bilong olketa, and parents followim tumas pikinini bilong olketa. Long nara survey long datfala kantri, klosap 25 percent long olketa wea insaed sei olketa no savve hao for story witim olketa pikinini. Diswan hem no samting wea kasem olketa kantri long Asia nomoa. The Toronto Star niuspepa hem sei: “Planti parents long Canada talem hao olketa no sure hao for kamap gud parents.” Long evri ples, parents faendem hard for trainim pikinini bilong olketa.

² Why nao parents faendem hard for trainim pikinini bilong olketa? Wanfala main reason hem bikos iumi stap insaed “olketa last day,” olketa “nogud taem wea hard for deal witim.” (2 Timothy 3:1) For join witim diswan, “evri feeling insaed long heart bilong man hem nogud start long taem hem young,” hem nao samting wea Bible talem. (Genesis 8:21) And olketa young wan nao barava insaed danger long attak bilong Satan, bikos olsem “wanfala lion wea singaot strong” hem attakim olketa wea no garem savve. (1 Peter 5:8) Olketa Christian parents wea garem goal for trainim pikinini bilong olketa “long discipline and wei for stretem tingting wea kam from Jehovah,” olketa feisim planti hard samting. (Ephesians 6:4) Hao nao parents savve helpem pikinini bilong olketa for growap olsem mature pipol wea worshipim Jehovah, wea fit for luksavve long “stret samting and rong samting”?—Hebrews 5:14.

3. Why nao training and wei for stretem pikinini wea parents duim hem important for pikinini growap long gudfala wei?

³ Wise King Solomon sei “krangge fasin hem stap insaed long heart bilong wanfala boy.” (Proverbs 13:1; 22:15) For aotem krangge fasin olsem from heart bilong olketa, parents need for stretem olketa young wan long loving wei. Nomata olsem, planti taem olketa young wan no acceptim wei for stretem olketa olsem. Tru nao, planti taem olketa againstim kaonsel nomata hu nao givim. Dastawe parents mas lane for “trainim wanfala boy fitim wei for hem followim.” (Proverbs 22:6) Taem olketa pikinini followim kaen discipline olsem, datwan savve minim laef for olketa. (Proverbs 4:13) Hem important tumas for parents savve wanem nao insaed wei for trainim olketa young wan bilong olketa!

Discipline—Wanem Hem Minim

4. Wanem nao main mining bilong datfala word “discipline” insaed Bible?

⁴ From olketa fraet nogud nara pipol accusim olketa for spoelem pikinini—long body, toktok, or feeling—samfala parents hol bak for stretem pikinini bilong olketa. Iumi no need for fraetem olketa samting olsem. Datfala word “discipline” wea Bible iusim no minim for spoelem man or raf. Greek word for “discipline” hem minim instruction, education, wei for stretem and, samfala taem, strong bat loving wei for panis.

5. Why nao hem gud for ting raonem wei wea Jehovah deal witim pipol bilong hem?

⁵ Long wei for givim discipline olsem, Jehovah God showimaot perfect example. Taem hem markem Jehovah olsem wanfala dadi long earth, aposol Paul raet olsem: “Waswe, evri parents no stretem pikinini bilong olketa? . . . Olketa dadi long earth stretem iumi for lelebet taem, and olketa duim followim wanem olketa tingim hem best samting. Bat God stretem iumi for helpem iumi, bikos hem laekem iumi for holy.” (Hebrew 12:7-10, Contemporary English Version) Tru nao, goal bilong Jehovah for givim discipline long pipol bilong hem, hem for mekem olketa kamap holy, or klin. Iumi savve lanem planti samting abaotem wei for disciplinem pikinini taem iumi lukluk long wei wea Jehovah trainim pipol bilong hem.—Deuteronomy 32:4; Matthew 7:11; Ephesians 5:1.

Love—Paoa wea Muvim Man

6. Why nao maet hem hard for parents for followim love bilong Jehovah?

⁶ Aposol John sei: “God hem love.” Dastawe, love nao evritaem muvim Jehovah for givim training. (1 John 4:8; Proverbs 3:11, 12) Waswe, datwan minim parents wea garem love for pikinini bilong olketa bae faendem hem isi for followim Jehovah long diswan? No evritaem. Love bilong God hem followim olketa principle. And wanfala Greek savveman sei kaen love olsem “no evritaem followim feeling wea man born witim.” Feeling bilong God no blindim hem. Hem evritaem tingim samting wea best for pipol bilong hem.—Isaiah 30:20; 48:17.

7, 8. (a) Wanem example bilong love wea followim principle nao Jehovah showimaot taem hem deal witim pipol bilong hem? (b) Hao nao parents savve followim Jehovah for helpem pikinini for mekem grow savve for followim olketa Bible principle?

⁷ Tingim love wea Jehovah showimaot taem hem deal witim olketa Israelite. Moses iusim wanfala naesfala story for storyim love bilong Jehovah for datfala young nation bilong Israel: “Olsem wei wea eagle hem sekem nest bilong hem, flae ovarem olketa baby bilong hem, openem aot wing bilong hem, tekem olketa, karem olketa long wing bilong hem, Jehovah nomoa go ahed for leadim [Jacob].” (Deuteronomy 32:9, 11, 12) For teachim olketa pikinini bilong hem for flae, mami eagle hem “sekem nest bilong hem,” muvim wing bilong hem ap and daon for encouragem olketa young wan bilong hem for flae. Taem wanfala young wan hem flae aot from nest, wea planti taem stap long wanfala hae ples, datfala mami hem “flae ovarem” datfala young wan. Sapos hem luk olsem maet datfala pikinini hitim graon, mami hia go andanit and karem hem “long wing bilong hem.” Long loving wei, Jehovah lukaftarem niufala nation bilong Israel long sem wei. Hem givim Law bilong Moses long olketa. (Psalm 78:5-7) Then God lukluk gud long datfala nation, hem stanbae for helpem olketa taem pipol bilong hem kasem hard taem.

⁸ Hao nao Christian parents savve followim love bilong Jehovah? Firstaem olketa mas teachim olketa principle and mark wea stap insaed Word bilong God long pikinini bilong olketa. (Deuteronomy 6:4-9) Goal hem for helpem olketa young wan hia for lane for disaedem samting followim olketa Bible principle. Taem olketa duim diswan, hem olsem olketa loving parents flae ovarem young wan bilong olketa and lukluk long hao nao olketa hia followim olketa principle wea olketa lanem. Taem olketa pikinini hia kamap moa olo and isisi kasem moa freedom, olketa parents hia wea kea stanbae for “daeva daon” and ‘karem young wan bilong olketa long wing bilong olketa’ long enitaem wea danger stap. Wanem kaen danger?

9. Wanem danger nao loving parents mas barava lukluk for hem? Givim example.

⁹ Jehovah God warnim olketa Israelite long samting wea bae kamaot from wei for kaban witim nogud pipol. (Numbers 25:1-18; Ezra 10:10-14) Wei for kaban witim rong pipol hem wanfala big danger tu distaem. (1 Corinthians 15:33) Christian parents shud followim Jehovah long diswan. Wanfala girl wea 15 year wea nem bilong hem Lisa start for laekem wanfala boy wea no garem sem mark olsem famili bilong hem saed long fasin and spiritual samting. “Stretawe parents bilong mi luksavve fasin bilong mi hem change and talemaot olketa wari long diswan,” Lisa hem sei. “Samfala taem tufala stretem mi, and olketa narataem tufala encouragem mi witim love.” Tufala sidaon witim Lisa and lisin long patient wei, and helpem hem for deal witim samting wea tufala luksavve hem really problem—feeling for wantem olketa wea sem age for acceptim hem.a

Keepim Open Wei for Story Tugeta

10. Wanem nao olketa wei wea Jehovah showimaot gud example for story tugeta witim olketa Israelite?

¹⁰ For win long wei for trainim pikinini, parents mas trae hard for keepim open wei for story tugeta witim young wan bilong olketa. Jehovah, nomata hem savve evribit long wanem nao insaed heart bilong iumi, hem encouragem iumi for story witim hem. (1 Chronicles 28:9) Bihaen hem givim Law long olketa Israelite, Jehovah markem olketa Levite for teachim olketa, and hem sendem olketa profet for story gud and stretem olketa. Hem willing tu for herem prea bilong olketa.—2 Chronicles 17:7-9; Psalm 65:2; Isaiah 1:1-3, 18-20; Jeremiah 25:4; Galatians 3:22-24.

11. (a) Hao nao parents savve encouragem wei for story gud tugeta witim pikinini bilong olketa? (b) Why nao hem important for parents lisin gud taem olketa story witim pikinini?

¹¹ Hao nao parents savve followim Jehovah taem olketa story witim pikinini bilong olketa? First samting, tufala mas markem taem for datwan. Hem gud sapos parents no talem toktok wea mekfani long pikinini, olsem, “Hem nomoa? Mi ting hem important samting”; “Datwan hem krangge samting”; “So wanem nao iu ting shud happen? Iu pikinini nomoa.” (Proverbs 12:18) For encouragem pikinini for feel free for story, wise parents trae hard for lisin gud. Parents wea no laek lisin long pikinini taem pikinini smol maet faendem taem pikinini big bae hem no laek lisin long olketa. Jehovah hem evritaem willing for lisin long pipol bilong hem. Hem openem ear bilong hem long olketa wea hambol for tan long hem long prea.—Psalm 91:15; Jeremiah 29:12; Luke 11:9-13.

12. Wanem kaen fasin saed long parents nao savve mekem hem moa isi for pikinini story witim olketa?

¹² Tingim tu hao samfala fasin bilong God mekem hem isi for pipol free for story witim hem. Olsem example, King David bilong Israel bifor duim bigfala sin taem hem duim adultery witim Bath-sheba. From hem man wea no perfect, David duim olketa nara bigfala sin long laef bilong hem. Nomata olsem, hem nating fail for go long Jehovah and askem Jehovah for forgivim and repruvim hem. Iumi sure loving-kaeness and mercy bilong God mekem hem isi for David for go bak long Jehovah. (Psalm 103:8) Taem olketa showimaot fasin bilong God olsem fasin for kea and mercy, parents help long wei for keepim open wei for story tugeta nomata taem pikinini duim rong samting.—Psalm 103:13; Malachi 3:17.

Mas Balance

13. Wanem nao insaed wei for balance?

¹³ Taem olketa lisin long pikinini, parents mas balance and showimaot “wisdom from antap.” (James 3:17) “Letem evri man lukim balance fasin bilong iufala,” aposol Paul hem raet olsem. (Philippians 4:5) Wanem nao hem minim for balance? Wanfala mining bilong Greek word wea olketa transleitim “balance” hem “no ova tumas for followim law.” Taem olketa saportim olketa mark bilong fasin and spiritual samting, hao nao parents savve balance?

14. Hao nao Jehovah showimaot wei for balance taem hem deal witim Lot?

¹⁴ Jehovah showimaot nambawan example long wei for balance. (Psalm 10:17) Taem hem encouragem Lot and famili bilong hem for lusim taon bilong Sodom wea redy for distroe, Lot “go ahed for delay.” Bihaen, taem angel bilong Jehovah askem hem for ranawe go long olketa maunten, Lot sei: “Mi no fit for ranawe go long olketa maunten . . . Plis, taon bilong [Zoar] hem klosap for ranawe go long there and hem smol samting nomoa. Waswe, plis, mi savve ranawe go long there—waswe, hem no smol samting nomoa?” Wanem nao Jehovah duim? Hem sei: “Mi bae tingim iu tu long diswan, long wei for no distroem datfala taon wea iu talem.” (Genesis 19:16-21, 30) Jehovah hem willing for followim samting wea Lot askem. Tru nao, parents need for followim olketa mark wea Jehovah God putim insaed Word bilong hem, Bible. Nomata olsem, maet tufala fit for followim samting wea young wan laekem sapos datwan no againstim olketa Bible principle.

15, 16. Wanem leson nao parents savve lanem from tokpiksa long Isaiah 28:24, 25?

¹⁵ Insaed wei for balance hem minim for redyim heart bilong olketa pikinini mekem olketa redy for acceptim kaonsel. Long wei for givim wanfala example, Isaiah markem Jehovah witim wanfala farmer and sei: “Waswe, hem full day nao man for hou hem hou mekem hem plantim seed, for mekem graon soft and smoothim? Waswe, taem hem smoothim graon, hem no torowem blak cumin, and putim wheat, millet, and barley long ples wea hem markem, and spelt olsem spialaen bilong hem?”—Isaiah 28:24, 25.

¹⁶ Jehovah hem “hou mekem hem plantim seed” and hem “mekem graon soft and smoothim.” Diswan mekem hem savve redyim heart bilong pipol bilong hem bifor hem disciplinem olketa. Taem olketa stretem pikinini, hao nao parents ‘houm’ heart bilong pikinini bilong tufala? Wanfala dadi followim Jehovah taem hem stretem boy bilong hem wea foa year. Taem son bilong hem hitim wanfala boy wea neiba, long patient wei dadi lisin long olketa excuse bilong son bilong hem. Then, hem ‘houm’ heart bilong son hia taem hem talem wanfala story abaotem wanfala smol boy wea wanfala raf boy barava spoelem. Taem hem herem datfala story, hem muvim boy hia for sei datfala raf boy mas kasem panis. Kaen wei for ‘hou’ olsem hem redyim heart bilong datfala boy and mekem hem isi for lukim hao wei for hitim boy wea neiba hem raf fasin and hem rong.—2 Samuel 12:1-14.

17. Wanem leson for parents long wei for givim discipline nao stap long Isaiah 28:26-29?

¹⁷ Then Isaiah markem moa discipline bilong Jehovah witim narafala waka long farm—wei for smasem wheat. Wanfala farmer iusim difren tul for fitim strong bilong skin bilong seed. Hem bae iusim wanfala thin stik for blak cumin wea soft and wanfala hevi stik for cumin, bat wanfala hevi hammer or wheel for seed wea moa hard. Nomata olsem, hem bae no smasem olketa hard seed for pisis evribit. Olsem tu, taem Jehovah laek for aotem eni nogud samting long pipol bilong hem, hem markem wei wea hem deal witim olketa followim need and samting wea happen. No enitaem hem raf or spoelem olketa. (Isaiah 28:26-29) Samfala pikinini savve lisin taem parents luk nomoa long olketa, and olketa no needim eni samting moa. Olketa narawan maet needim reminder evritaem, and samfala moa needim discipline wea moa strong. Parents wea balance bae givim discipline fitim need bilong each pikinini.

Mekem Pikinini Enjoyim Famili Study

18. Hao nao parents savve markem taem for famili Bible study evritaem?

¹⁸ Wanfala best wei for givim instruction long pikinini bilong iu hem for duim famili Bible study evritaem and text evriday. Famili study hem givim barava gud samting sapos hem evritaem. Sapos hem olabaot or samting wea man seknomoa long hem, bae hem no kamap evritaem. So parents mas ‘baem taem’ for datfala study. (Ephesians 5:15-17) Wei for chusim wanfala taem wea fitim evriwan savve olsem wanfala challenge. Wanfala dadi faendemaot hao taem olketa pikinini kamap moa big, difren schedule bilong olketa mekem hem moa hard for full famili stap tugeta. Nomata olsem, famili evritaem stap tugeta long olketa naet bilong kongregeson meeting. So datfala dadi arrangem for duim famili study long wanfala naet olsem. Datfala arrangement hem barava gud. Distaem thrifala pikinini hia baptaes servant bilong Jehovah.

19. Hao nao parents savve followim Jehovah taem olketa duim famili study?

¹⁹ Nomata olsem, hem no inaf for just storyim samfala information from Bible long study. Jehovah teachim olketa Israelite thru long olketa priest wea go bak wea “explainim and givim mining” long datfala Law, “helpem pipol luksavve taem olketa read.” (Nehemiah 8:8) Wanfala dadi wea win for helpem evri sevenfala pikinini bilong hem for lovem Jehovah hem evritaem go insaed rum bilong hem bifor famili study for prepare, changem datfala information for fitim need bilong each pikinini. Hem mekem olketa pikinini enjoyim study hia. Wanfala son bilong hem wea big finis sei: “Mifala evritaem enjoyim study. Sapos mifala plei ball aotsaed taem olketa singaotem mifala for famili study, stretawe mifala leavim ball and ran insaed for study. Hem wanfala evening wea mifala enjoyim tumas long full week.”

20. Wanem problem wea savve kamap long wei for trainim pikinini nao bae iumi storyim long next article?

²⁰ Man wea raetem psalm hem sei: “Lukim! Olketa son nao present wea kam from Jehovah; frut bilong bele hem wanfala reward.” (Psalms 127:3) Wei for trainim olketa pikinini needim taem and hard waka, bat for duim diswan long stret wei savve minim laef olowe for olketa young wan bilong iumi. Datwan bae wanfala nambawan reward! So, iumi want for followim Jehovah taem iumi trainim olketa pikinini bilong iumi. Nomata olsem, wei wea parents garem responsibility for “trainim [olketa pikinini] long discipline and wei for stretem tingting wea kam from Jehovah,” hem no minim olketa bae win. (Ephesians 6:4) Nomata hem kasem best kea, pikinini savve kamap bighed and stop for servem Jehovah. Sapos olsem wanem nao bae tufala duim? Datwan nao bae iumi storyim long next article.

[Footnote]

[Piksa long page 12]

Wanem Nao Ansa Bilong Iu?

• Hao nao parents savve followim love bilong Jehovah wea Deuteronomy 32:11, 12 storyim?

• Wanem nao iu lanem from wei wea Jehovah story witim olketa Israelite?

• Wanem nao wei wea Jehovah openem ear long samting wea Lot askem, hem teachim iumi?

• Wanem leson long wei for stretem olketa pikinini nao iu lanem from Isaiah 28:24-29?

[Piksa long page 9]

Moses storyim wei wea Jehovah trainim pipol bilong hem, hem olsem wei wea eagle duim long pikinini bilong hem

[Olketa Piksa long page 10]

Parents need for givim taem for pikinini bilong olketa

[Piksa long page 12]

“Hem wanfala evening wea mifala enjoyim tumas long full week”