“Kam Klos Long God, and Hem Bae Kam Klos Long Iufala”
Bifor and Bihaen—Olketa Bible Principle Helpem Hem Change
TAEM hem young man, hem fasin bilong Adrian for raf taem hem kros and for keepim kros. Kros kwiktaem bilong hem gogo mekem hem raf olabaot tumas. Hem savve drink, smoke and garem olabaot living. Adrian bilong wanfala sekson wea olketa kolem punk and hem garem tattoo wea showimaot hem againstim eniwan wea garem paoa. Taem hem storyim olketa year wea hem garem living olsem, hem sei: “Mi katem hair followim stael bilong punk, iusim strongfala glue for mekem hem standap, and samfala taem iusim dye for mekem hem red or nara kala.” Adrian putim earring tu long nose bilong hem.
Adrian stap witim samfala nara young wan wea garem bighed fasin long wanfala oldfala haos. Long there olketa drink and iusim olketa drug. Adrian hem sei: “Mi iusim datfala drug wea olketa kolem speed witim Valium and eni nara drug wea hem isi for mi kasem. Taem mi no garem eni drug or glue for smelem for mekem mi drunk, mi aotem petrol from trak bilong nara pipol and iusim datwan.” Adrian garem living olsem wanfala raf criminal and hem tok strong long pipol and kamap raf fogud. Pipol no klosap long hem. Long semtaem, nogud fasin bilong hem mekem pipol wea garem semkaen fasin olsem hem laek kaban witim hem.
Gogo, Adrian luksavve hao “olketa fren” bilong hem kaban witim hem for kasem samting for olketa seleva nomoa. And tu, hem luksavve hao “no eni gud samting kamaot from fasin for kros and raf.” From hem no hapi and feel olsem laef no garem purpose hem lusim olketa fren hia. Taem hem faendem wanfala Wastaoa magasin long ples wea building waka go ahed, hem laekem datfala message from Bible and diswan lead go long wei wea hem studyim Bible witim Olketa Jehovah’s Witness. Adrian willing for acceptim datfala invitation: “Kam klos long God, and hem bae kam klos long iufala.” (James 4:8) From diswan, no longtaem bihaen Adrian luksavve hao hem need for live followim olketa principle wea stap long Holy Bible.
Taem hem start for savve gud long Bible diswan affectim conscience bilong Adrian and changem gogo long laef bilong hem. Hem helpem hem for daonem feeling for kamap kros kwiktaem and for mekem grow fasin for kontrolem seleva. Paoa bilong Word bilong God barava changem fasin bilong Adrian.—Hebrews 4:12.
Bat, hao nao Bible savve changem man long bigfala wei olsem? Savve long olketa Scripture bae helpem iumi for “werem niufala fasin.” (Ephesians 4:24) Tru nao, fasin bilong iumi change taem iumi followim stretfala savve wea stap long Bible. Bat hao nao datfala savve bae fit for changem pipol?
First samting, Bible showimaot klia olketa nogud fasin wea iumi mas lusim. (Proverbs 6:16-19) Mek-tu, Bible encouragem iumi for showimaot olketa fasin wea kam from holy spirit bilong God. Hem nao “love, hapi, peace, long-safaring, kaenfala fasin, gudfala fasin, faith, kwaet fasin, and fasin for kontrolem seleva.”—Galatians 5:22, 23.
Taem Adrian minim go moa samting wea God askem, diswan helpem hem for lukluk gud long hemseleva and luksavve long olketa fasin wea hem mas mekem grow and olketa fasin wea hem mas lusim. (James 1:22-25) Bat datwan hem start nomoa. Adrian needim moa samting witim datfala savve—samting for muvim hem for mekem hem want for change.
Adrian lanem hao datfala niufala fasin hem kamap “fitim image bilong Datwan wea creatim.” (Colossians 3:10) Hem start for luksavve hao fasin bilong wanfala Christian mas olsem fasin bilong God. (Ephesians 5:1) From hem studyim Bible, Adrian lanem hao Jehovah deal witim olketa man and hem lukim gudfala fasin bilong God, olsem love bilong hem, kaenfala fasin, gudfala fasin, mercy, and raeteous fasin. Savve olsem muvim Adrian for lovem God and for trae hard for kamap man wea Jehovah appruvim.—Matthew 22:37.
Isisi and witim help bilong holy spirit bilong God, Adrian fit for changem fasin bilong hem and lusim wei for raf fogud and kros kwiktaem. Distaem, hem and waef bilong hem busy for helpem nara pipol for iusim savve bilong Bible for changem laef bilong olketa. Adrian hem sei: “No olsem olketa fren bilong mi bifor wea planti long olketa dae finis, mi stap laef and mi enjoyim hapi famili living.” Diswan pruvim hao Bible garem paoa for mekem laef bilong pipol change and kamap moabeta.
[Blurb long page 25]
“No eni gud samting kamaot from fasin for kros and raf”
[Box long page 25]
Olketa Bible Principle wea Help
Long daon hem samfala Bible principle wea helpem planti pipol wea raf and fulap witim kros for change and kamap pipol wea keepim peace:
“Keepim peace witim evri man. Iufala no pei bak, iufala wea mi lovem, bat mekwe for datfala kros.” (Romans 12:18, 19) Letem God disaed wanem taem and hu nao hem mas pei bak long hem. From hem savve long evri samting, hem nomoa savve duim datwan, and wei wea hem pei bak bae followim perfect justice.
“Iufala savve kros, bat no sin; no letem sun go daon taem iufala kros yet, and no givim eni chance long Devil.” (Ephesians 4:26, 27) Maet wanfala man garem gudfala reason for feel kros samfala taem. Sapos diswan hem happen, hem mas no go ahed for “kros.” Why nao olsem? Bikos diswan savve muvim hem for duim wicked samting, wea minim hem “givim eni chance long Devil,” wea bae Jehovah God no appruvim hem.
“Let go long kros and lusim bigfala kros; No kamap hot witim kros gogo iu duim nogud samting.” (Psalm 37:8) Sapos iumi no kontrolem feeling bilong iumi bae iumi no kontrolem samting wea iumi duim tu. Sapos wanfala man no daonem feeling for kros, bae hem talem or duim samting wea bae spoelem evri narawan.