Man No Savve Evribit Wei wea Jehovah Hem Nambawan
“Jehovah hem nambawan and barava fit for kasem praise, and wei wea hem nambawan hem samting wea man no savve evribit.”—PSALM 145:3.
1, 2. David hem wanem kaen man, and wanem nao tingting bilong hem abaotem hemseleva and Jehovah?
MAN wea raetem Psalm 145 hem man long history wea staka savve long hem. Taem hem young, hem feisim and killim dae wanfala maeti soldia. Taem hem king wea faet, disfala man wea raetem psalm winim staka enemy. Nem bilong hem David, and hem mek-tu king bilong Israel bifor. Nomata bihaen hem dae pipol rememberim hem, and kam kasem distaem planti million pipol savve abaotem David.
2 Nomata David duim staka nambawan samting, hem garem hambol tingting abaotem hemseleva. Hem sing olsem abaotem Jehovah: “Taem mi luk go ap long skae bilong iu, olketa samting wea iu wakem, moon and olketa star wea iu wakem, why nao iu tingim man wea savve dae, and lukaftarem son bilong man long earth?” (Psalm 8:3, 4) Winim wei for tinghae long hemseleva, David givim praise long Jehovah for wei wea Hem sevem laef bilong hem from olketa enemy and hem sei olsem abaotem God: “Iu bae givim shield bilong salvation bilong iu, and hambol fasin bilong iu nao mekem mi nambawan.” (2 Samuel 22:1, 2, 36) Jehovah showimaot hambol fasin taem hem showim mercy long olketa wea sin, and David tinghae long kaenfala fasin bilong God wea man no fit for kasem.
‘Mi Bae Praisem God Datfala King’
3. (a) Wanem nao tingting bilong David abaotem hu nao king bilong Israel? (b) For hao long nao David laek for praisem Jehovah?
3 Nomata David hem king wea God appointim, hem ting long Jehovah olsem really King bilong Israel. David sei: “Bilong iu nao kingdom, O Jehovah, Datwan wea liftim iuseleva hae olsem hed ovarem evri samting.” (1 Chronicles 29:11) And David barava respectim God olsem Ruler! Hem sing: “Mi bae praisem iu, O God and King bilong mi, and mi bae blessim nem bilong iu for olowe. Long full day mi bae blessim iu, and mi bae praisem nem bilong iu go kasem taem olketa no markem, and for olowe.” (Psalm 145:1, 2) David laek tumas for praisem Jehovah God for full day and for olowe.
4. Psalm 145 showimaot olketa wanem laea toktok?
4 Psalm 145 hem nambawan ansa for Satan, wea sei God hem selfish ruler wea holem bak freedom from olketa wea hem wakem. (Genesis 3:1-5) Disfala psalm hem showimaot tu wei wea Satan hem laea taem hem sei pipol wea obeyim God duim olsem for kasem gud samting nomoa, no from olketa lovem God. (Job 1:9-11; 2:4, 5) Olsem David, olketa tru Christian distaem givim ansa long olketa laea toktok bilong Devil. Olketa hol strong long hope bilong olketa for laef olowe anda long Kingdom rul bikos olketa laek for praisem Jehovah for olowe. Planti million duim diswan taem olketa showimaot faith long ransom bilong Jesus and taem love muvim olketa for obey for servem Jehovah olsem olketa worshiper wea dedicate and baptaes.—Romans 5:8; 1 John 5:3.
5, 6. Olketa wanem chance nao stap for blessim and praisem Jehovah?
5 Tingim staka chance wea iumi olketa servant bilong Jehovah garem for blessim and praisem hem. Iumi savve duim olsem long prea taem samting iumi readim insaed Word bilong hem Bible, barava muvim feeling bilong iumi. Iumi savve praisem and thankiu long God taem wei wea hem deal witim pipol muvim iumi or taem iumi tinghae long wanfala nambawan creation bilong hem. Iumi blessim Jehovah God tu taem iumi storyim olketa purpose bilong hem witim olketa narawan long taem bilong olketa Christian meeting or taem iumi wanwan story. Tru nao, evri “gudfala waka” wea iumi duim saed long Kingdom bilong God givim praise long Jehovah.—Matthew 5:16.
6 Olketa example bilong olketa gudfala waka wea kamap no longtaem go nomoa hem construction bilong staka ples for worship wea pipol bilong Jehovah duim long olketa barava poor kantri. Staka long olketa hia kamap witim help bilong olketa donation from olketa brata long olketa nara kantri. Samfala Christian givim help thru long wei for volunteer for go long olketa ples olsem for share long construction bilong olketa Kingdom Hall. Bat important waka wea winim eni narawan nao hem for praisem Jehovah thru long waka for preachim gud nius abaotem Kingdom bilong hem. (Matthew 24:14) Olsem olketa nextfala verse bilong Psalm 145 showimaot, David tinghae long rul bilong God and praisem wei wea Hem king. (Psalm 145:11, 12) Waswe, iu tinghae olsem long loving wei wea God hem rul? And waswe, iu evritaem story long pipol abaotem Kingdom bilong hem?
Olketa Example Bilong Wei wea God Hem Nambawan
7. Talem wanfala main reason for praisem Jehovah.
7 Psalm 145:3 givim wanfala main reason for praisem Jehovah. David sing olsem: “Jehovah hem nambawan and barava fit for kasem praise, and wei wea hem nambawan hem samting wea man no savve evribit.” Wei wea Jehovah hem nambawan no garem spialaen. Man no fit for savve evribit, minim evribit, or measurem. Bat for sure iumi savve kasem gud samting distaem taem iumi ting raonem olketa example bilong wei wea man no fit for savve evribit long wei wea Jehovah hem nambawan.
8. Wanem nao universe showimaot abaotem wei wea Jehovah hem nambawan and paoa bilong Hem?
8 Trae for tingim wanfala taem wea iu stap farawe from laet bilong taon area and iu luk ap long klia skae long naet. Waswe, iu sapraes long staka star long bigfala dark skae? Waswe, diswan no muvim iu for laek praisem Jehovah for wei wea hem nambawan for creatim evri star? Bat, samting iu lukim hem sismol haf nomoa long evri star bilong galaxy wea stap raonem earth. And tu, olketa sei winim wan handred billion galaxy nao stap, wea thrifala nomoa eye savve lukim. Tru nao, olketa staka star and galaxy bilong disfala maeti universe pruvim nambawan paoa bilong Jehovah for creatim samting and hao man no savve minim evribit wei wea Hem nambawan.—Isaiah 40:26.
9, 10. (a) Olketa wanem samting abaotem wei wea Jehovah hem nambawan nao showaot thru long Jesus Christ? (b) Hao nao resurrection bilong Jesus shud affectim faith bilong iumi?
9 Tingim olketa nara point saed long wei wea Jehovah hem nambawan—olketa wea join witim Jesus Christ. Wei wea God hem nambawan hem showaot taem hem creatim Son bilong hem and iusim hem for longfala taem olsem “nambawan wakman” bilong Hem. (Proverbs 8:22-31) Nambawan love bilong Jehovah hem showaot taem hem givim only-born son bilong hem olsem ransom sakrifaes for olketa man. (Matthew 20:28; John 3:16; 1 John 2:1, 2) Man hard for minim datfala spirit body wea garem glory and no savve dae, wea Jehovah wakem for Jesus bihaen hem resurrect.—1 Peter 3:18.
10 Resurrection bilong Jesus hem showimaot tu staka samting abaotem olketa nambawan wei bilong Jehovah wea man hard for minim. Iumi sure God mekem Jesus rememberim olketa samting hem duim saed long creation wea man savve lukim and no savve lukim. (Colossians 1:15, 16) Insaed diswan hem olketa nara spirit creature, universe, earth, and evri physical laef long earth bilong iumi. Witim wei for mekem Son bilong hem rememberim full history bilong evriting wea happen long heven and earth bifor hem kamap man, Jehovah mekem hem rememberim tu evriting wea hem duim taem hem perfect man long earth. Tru nao, nambawan wei bilong Jehovah wea man no savve minim evribit hem showaot from resurrection bilong Jesus. Datfala nambawan samting wea hem duim hem showim iumi hao resurrection fit for happen. Hem shud strongim faith bilong iumi hao God savve mekem staka million wea dae finis, wea hem rememberim olketa, for laef bak moa.—John 5:28, 29; Acts 17:31.
Olketa Nambawan Waka and Mirakol
11. Wanem nambawan waka nao Jehovah start for duim long Pentecost 33 C.E.?
11 Start kam from resurrection bilong Jesus, Jehovah duim olketa nara nambawan waka. (Psalm 40:5) Long Pentecost 33 C.E., Jehovah startim wanfala niu nation, “datfala Israel bilong God,” wea insaed hem olketa disaepol bilong Christ wea holy spirit anointim. (Galatians 6:16) Long maeti wei, disfala niu spiritual nation hem grow long world bilong datfala taem. Nomata apostate fasin, wea kamap bihaen olketa aposol bilong Jesus dae, hem lead go long wei wea Christendom hem kamap, Jehovah go ahed for duim olketa nambawan waka for mek sure olketa purpose bilong hem fulfill.
12. Wei wea olketa transleitim finis Bible long evri main languis long earth hem pruvim wanem samting?
12 Olsem example, full Bible stap kam kasem taem bilong iumi wea olketa transleitim long evri main languis distaem. Staka taem pipol wea transleitim Bible duim diswan anda long hard living and danger for dae from sekson bilong Satan. For sure, for transleitim Bible go long winim 2,000 languis no savve kamap sapos hem no will bilong nambawan God wea man no savve minim evribit!
13. Start long 1914, hao nao wei wea Jehovah hem nambawan hem showaot saed long olketa Kingdom purpose bilong hem?
13 Wei wea Jehovah hem nambawan hem showaot saed long olketa Kingdom purpose bilong hem tu. Olsem example, long year 1914, hem mekem Son bilong hem, Jesus Christ, kamap King long heven. No longtaem bihaen, Jesus tek akson againstim Satan and olketa demon bilong hem. Olketa torowem Satan and olketa demon bilong hem aot from heven and putim olketa long earth, wea distaem olketa weitim taem olketa bae go insaed long hol wea deep tumas. (Revelation 12:9-12; 20:1-3) Start from datfala taem, olketa anointed follower bilong Jesus kasem bigfala persecution. Nomata olsem, Jehovah strongim olketa long disfala taem wea Christ hem stap moa.—Matthew 24:3; Revelation 12:17.
14. Wanem nambawan waka nao Jehovah duim long 1919, and wanem nao diswan fulfillim?
14 Long year 1919, Jehovah duim nara gudfala samting wea showimaot wei wea hem nambawan. Olketa anointed follower bilong Jesus, wea gogo for dae long spiritual wei, olketa laef bak moa. (Revelation 11:3-11) Insaed olketa year bihaen datwan, olketa anointed wan strong for preachim gud nius abaotem datfala Kingdom long heven wea start for rul. Olketa hipimap olketa nara anointed wan wea stap yet bilong 144,000. (Revelation 14:1-3) And thru long olketa anointed follower bilong Christ, Jehovah leim faondeson bilong “wanfala niu earth,” wanfala raeteous community. (Revelation 21:1) Bat wanem nao bae happen long “niufala earth” hia bihaen evri faithful anointed wan go long heven?
15. Wanem waka nao olketa anointed Christian go ahed for leadim, and wanem nao kamaot from diswan?
15 Long 1935, olketa important article kamap insaed August 1 and August 15 Watchtower magasin, wea explainim datfala “big crowd,” bilong Revelation chapter 7. Olketa anointed Christian strong for start for luk aotem and kaban witim olketa hia wea worship witim olketa from evri kantri, tribe, pipol, and languis. Disfala “big crowd” bae stap laef bihaen datfala “bigfala trabol” wea klosap for happen, witim hope for laef olowe long Paradaes olsem olketa member bilong datfala “niu earth” for olowe. (Revelation 7:9-14) From olketa anointed Christian nao leadim waka for preachim Kingdom and for mek disaepol, winim six million pipol distaem garem hope for laef olowe long wanfala paradaes earth. Hu nao shud kasem praise for disfala big increase wea kamap midolwan bigfala persecutim from Satan and nogud world bilong hem? (1 John 5:19) Jehovah nomoa savve duim evriting hia, thru long holy spirit bilong hem.—Isaiah 60:22; Zechariah 4:6.
Glory and Haefala Position Bilong Jehovah
16. Why nao olketa man no really savve lukim ‘glory bilong haefala position bilong Jehovah’?
16 Nomata wanem kaen “nambawan waka” and “maeti samting” Jehovah duim, pipol nating savve forgetim. David hem raet: “Evri genereson bae praisem olketa waka bilong iu, and olketa bae talemaot olketa maeti samting wea iu duim. Glory bilong haefala position bilong iu and olketa samting abaotem olketa nambawan waka bilong iu bae mi mekem hem interest bilong mi. And olketa bae storyim hao strong nao olketa samting bilong iu wea kosim fraet; and saed long nambawan wei bilong iu, mi bae talemaot.” (Psalm 145:4-6) Bat, hao big nao savve bilong David abaotem glory bilong Jehovah, from “God hem wanfala Spirit” and from diswan man no savve lukim hem?—John 1:18; 4:24.
17, 18. Hao nao David fit for mekem grow wei for tinghae long ‘glory bilong haefala position bilong Jehovah’?
17 Nomata hem no savve lukim God, olketa wei stap for David savve mekem grow wei wea hem tinghae long haefala position bilong Jehovah. Olsem example, hem savve read abaotem olketa maeti waka bilong God insaed olketa Scripture, olsem taem wicked world hem distroe long wanfala flood wea kasem full world. Luk olsem David savve long wei wea olketa false god bilong Egypt luk krangge taem God sevem olketa Israelite from wei for slave long Egypt. Olketa kaen samting wea happen olsem pruvim wei wea God hem nambawan and garem honor.
18 David grow long wei for tinghae long haefala position bilong God no just thru long wei for readim olketa Scripture bat tu thru long wei for ting raonem olketa. Olsem example, maet hem ting raonem samting wea happen taem Jehovah givim datfala Law long Israel. Long datfala taem olketa thunder, laetning, wanfala hevi cloud, and wanfala saond bilong horn wea barava laod kamap. Maunt Sinai seksek and smoke kamaot from hem. Long botom bilong maunten, olketa Israelite herem tu “datfala Tenfala Toktok” from midolwan datfala fire and datfala cloud taem Jehovah story long olketa thru long wanfala angel. (Deuteronomy 4:32-36; 5:22-24; 10:4; Exodus 19:16-20; Acts 7:38, 53) Olketa samting hia barava showimaot nambawan position bilong Jehovah! Pipol wea lovem Word bilong God wea ting raonem olketa story hia mas fulap witim wei for tinghae long ‘glory bilong haefala position bilong Jehovah.’ Hem tru, distaem iumi garem full Bible, wea garem olketa difren kaen nambawan vision bilong glory bilong God wea strongim long iumi hao Jehovah hem nambawan.—Ezekiel 1:26-28; Daniel 7:9, 10; Revelation, chapter 4.
19. Wanem nao bae mekem big wei wea iumi tinghae long haefala position bilong Jehovah?
19 Narafala wei wea David fit for kasem moa savve abaotem haefala position bilong God hem thru long wei for studyim olketa law bilong God for olketa Israelite. (Deuteronomy 17:18-20; Psalm 19:7-11) Wei for obeyim olketa law bilong Jehovah hem givim honor long nation bilong Israel and mekem olketa difren from evri nara pipol. (Deuteronomy 4:6-8) Olsem hem tru for David, wei for readim olketa Scripture evritaem, tingting strong raonem, and for studyim olketa gud bae mekem big wei wea iumi tinghae long haefala position bilong Jehovah.
Olketa Fasin Bilong Jehovah Strongim Wei wea Hem Nambawan!
20, 21. (a) Psalm 145:7-9 mekhae long wei wea Jehovah hem nambawan saed long olketa wanem fasin? (b) Hao nao tufala fasin hia bilong God affectim evriwan wea lovem hem?
20 Olsem iumi storyim finis, first sixfala verse bilong Psalm 145 givim iumi olketa strongfala reason for praisem Jehovah for olketa samting wea join witim olketa wei wea hem nambawan wea iumi no savve minim evribit. Verse 7 go kasem 9 mekhae long wei wea God hem nambawan taem hem storyim olketa fasin bilong hem. David hem sing: “Olketa bae hapi narawe abaotem gudfala fasin bilong iu wea big tumas, and from raeteous fasin bilong iu nao olketa bae singaot witim hapi. Jehovah hem kaenfala and garem mercy, slow for kros and nambawan long loving-kaeness. Jehovah hem showaot gudfala fasin long evriwan, and olketa mercy bilong hem stap long evriting wea hem wakem.”
21 Long hia David firstaem mekhae long gudfala and raeteous fasin bilong Jehovah—tufala fasin wea Devil Satan kwestinim. Hao nao tufala fasin hia affectim evriwan wea lovem God and wea stap anda long rul bilong hem? Tru nao, gudfala and raeteous fasin bilong Jehovah givim hapi long olketa worshiper bilong hem wea muvim olketa for praisem hem. And tu, Jehovah showim gudfala fasin long “evriwan.” Iumi hope diswan bae helpem staka moa for repent and kamap olketa worshiper bilong trufala God bifor hem tu leit.—Acts 14:15-17.
22. Hao nao Jehovah hem deal witim olketa servant bilong hem?
22 David tinghae tu long olketa fasin wea God seleva mekhae long hem taem Hem “go front long feis bilong [Moses] and sei: ‘Jehovah, Jehovah, God wea garem mercy and kaenfala fasin, slow for kros and wea fulap witim loving-kaeness and truth.’ ” (Exodus 34:6) Dastawe, David savve sei: “Jehovah hem kaenfala and garem mercy, slow for kros and nambawan long loving-kaeness.” Nomata man no savve minim evribit wei wea Jehovah hem nambawan, hem honorim olketa servant bilong hem taem hem deal long kaenfala wei witim olketa. Hem fulap witim mercy, willing for forgivim olketa sinner wea repent long faondeson bilong ransom sakrifaes bilong Jesus. Jehovah hem slow for kros tu, from hem givim olketa servant bilong hem olketa chance for winim olketa wik point wea maet stopem olketa for kasem niu world bilong raeteous fasin bilong hem.—2 Peter 3:9, 13, 14.
23. Wanem spesol fasin nao bae iumi story raonem long next article?
23 David mekhae long loving-kaeness, or loyal love bilong God. Tru nao, olketa nara verse bilong Psalm 145 showim olketa wei wea Jehovah showim disfala fasin and feeling bilong olketa loyal servant bilong hem abaotem loving-kaeness bilong hem. Diswan nao bae iumi story raonem long next article.
Hao Nao Bae Iu Ansa?
• Olketa wanem chance nao stap for praisem Jehovah long “full day”?
• Olketa wanem example nao showim wei wea Jehovah hem nambawan hem samting man no savve minim evribit?
• Hao nao iumi savve grow long wei for tinghae long haefala glory bilong Jehovah?
[Piksa long page 10]
Olketa galaxy bilong universe pruvim wei wea Jehovah hem nambawan
[Credit Line]
Courtesy of Anglo-Australian Observatory, photograph by David Malin
[Piksa long page 12]
Hao nao wei wea Jehovah hem nambawan hem showaot saed long Jesus Christ?
[Piksa long page 13]
Taem olketa Israelite kasem datfala Law long Maunt Sinai, olketa garem pruv bilong haefala glory bilong Jehovah