Holy Spirit Leadim Olketa Christian Long First Century and Distaem Tu
“Spirit nao duim evri samting hia.”—1 COR. 12:11.
1. Wanem nao bae iumi lanem long disfala study?
LONG Pentecost 33 C.E., spesol samting hem happen. Long datfala taem, God givim holy spirit for leadim pipol bilong hem long nara difren wei moa. (Acts 2:1-4) Long study bifor, iumi lanem wei wea holy spirit helpem olketa wea faithful bifor for duim samfala assignment wea God givim nomata hem no isi. Bat, hao nao wei wea holy spirit helpem olketa long first century hem difren from olketa wea faithful bifor? Long wanem wei nao holy spirit helpem olketa Christian distaem? Bae iumi storyim olketa kwestin hia.
‘Mi Wakaman Bilong Jehovah!’
2. Mary luksavve holy spirit savve duim wanem?
2 Mary tu stap taem Jehovah givim holy spirit long olketa wea hipap long rum antap long wanfala haos long Jerusalem. (Acts 1:13, 14) Bat bifor datwan, Mary savve finis Jehovah iusim holy spirit for duim staka nambawan samting. Winim 30 year go finis, Jehovah iusim holy spirit for tekem laef bilong Son bilong hem long heven for kam long earth taem hem mekem Mary, wanfala young gele for babule.—Matt. 1:20.
3, 4. Wanem gud example nao Mary showimaot, and wanem nao iumi lanem?
3 Why nao Jehovah chusim Mary? Bihaen angel talem Mary bae hem bornem Son bilong God, Mary sei: “Mi wanfala wakaman bilong Jehovah! Samting wea iu talem for mi mas olsem nao.” (Luke 1:38) Datwan showimaot Mary willing for duim wanem Jehovah laekem. Hem no kwestinim angel abaotem wanem nao pipol bae tingim sapos hem babule, and sapos Joseph bae maritim hem or nomoa. Taem Mary sei hem wakaman bilong Jehovah, datwan showimaot hem barava trustim Jehovah.
4 Waswe, samfala taem iu tingse iu no fit for duim olketa assignment wea iu kasem long organization bilong Jehovah? Tingim diswan: Waswe, mi barava trustim Jehovah bae duim samting followim wanem hem laekem? Waswe, mi willing for duim wanem God laekem? God bae givim holy spirit long olketa wea trustim and obeyim hem.—Acts 5:32.
Holy Spirit Helpem Peter
5. Long wanem wei nao holy spirit helpem Peter bifor Pentecost 33 C.E.?
5 Bifor Pentecost 33 C.E., holy spirit helpem Peter tu olsem hem helpem Mary. Jesus markem Peter witim olketa nara aposol for raosem olketa demon. (Mark 3:14-16) Bible no storyim staka samting abaotem datwan, bat luk olsem Peter iusim paoa wea Jesus givim hem. Taem Jesus askem Peter for wakabaot go long hem antap long Sea bilong Galilee, holy spirit helpem Peter. (Readim Matthew 14:25-29.) Peter duim olketa samting hia bikos hem trustim holy spirit bae helpem hem. Holy spirit helpem Peter and samfala disaepol for duim olketa nara samting tu.
6. (a) Wanem nao holy spirit helpem Peter for duim long Pentecost 33 C.E.? (b) Wanem nao holy spirit helpem hem for duim bihaen?
6 Long Pentecost 33 C.E., holy spirit mekem Peter and olketa nara disaepol for story long olketa difren languis bilong pipol wea visit kam long Jerusalem. Then Peter standap and story long olketa wea hipap. (Acts 2:14-36) Samfala taem Peter savve fraet and no tingting gud firstaem bifor hem duim samting. Bat holy spirit strongim Peter for preach nomata pipol persecutim hem and talem hem for no preach. (Acts 4:18-20, 31) God iusim holy spirit for helpem Peter minim samfala samting. (Acts 5:8, 9) Holy spirit helpem Peter tu for mekem man wea dae for laef bak.—Acts 9:40.
7. Wanem nao Peter minim bihaen hem baptaes long holy spirit long Pentecost 33 C.E.?
7 Peter savve long staka samting wea Jesus teachim bifor Pentecost 33 C.E. (Matt. 16:16, 17; John 6:68) Bat samfala samting hem no minim. Olsem example, Peter no minim hao Christ bae laef bak olsem wanfala spirit bihaen thrifala day. Hem no minim tu Kingdom bilong Christ bae rul long heven. (John 20:6-10; Acts 1:6) Peter no minim wei wea olketa man bae kamap spirit for rul long Kingdom bilong God long heven. Peter start for minim olketa samting hia bihaen hem baptaes long holy spirit long Pentecost 33 C.E. and hem luksavve hem garem hope for go long heven.
8. Wanem nao olketa anointed Christian and nara sheepsheep savve lanem long Bible?
8 Bihaen olketa disaepol kasem holy spirit, datwan helpem olketa for minim samfala teaching wea olketa no minim bifor. Holy spirit helpem olketa wea raetem Christian Greek Scripture for explainim olketa nambawan samting abaotem plan bilong Jehovah. (Eph. 3:8-11, 18) Olketa anointed Christian and nara sheepsheep tu studyim and minim olketa nambawan samting hia. (John 10:16) Iumi shud tinghae long wei wea holy spirit helpem iumi for minim Word bilong God.
“God Givim Holy Spirit” Long Paul
9. Wanem nao holy spirit helpem Paul for duim?
9 Samting olsem wanfala year bihaen Pentecost 33 C.E., God givim holy spirit long Saul, wea bihaen nem bilong hem Paul. Holy spirit helpem Paul for duim olketa samting wea helpem iumi distaem. Olsem example, hem helpem Paul for raetem 14 buk long Bible. Long sem wei wea holy spirit helpem Peter, hem helpem Paul tu for minim and raet abaotem hope for go long heven and garem body wea no savve rotten and wea no savve dae. Holy spirit helpem Paul for raosem olketa demon, healim olketa wea sik, and for mekem samfala wea dae for laef bak! Bat hem helpem Paul for duim wanfala samting wea important winim olketa samting hia. Nomata holy spirit no mekem iumi for duim olketa mirakol, hem helpem iumi distaem for duim wanfala important samting olsem Paul.
10. Long wanem wei nao holy spirit helpem Paul for no fraet for story?
10 God “givim holy spirit” long Paul and hem tok strong long wanfala man for duim magic. Long semtaem, bigman bilong Cyprus hem lisin long wanem Paul talem. Datfala bigman tinghae long wanem Paul talem and hem biliv nao bikos hem “barava sapraes long olketa samting wea hem lanem abaotem Jehovah.” (Acts 13:8-12) Paul luksavve holy spirit nomoa savve helpem hem no fraet for preach and for savve long wanem for talem. (Matt. 10:20) Bihaen datwan, Paul askem olketa brata and sista long Ephesus for prea for hem mekem God helpem hem “no fraet for story.”—Eph. 6:18-20.
11. Hao nao holy spirit leadim Paul?
11 Holy spirit helpem Paul for story, bat samfala taem hem stopem hem for no go long samfala ples tu. Taem Paul duim missionary waka, holy spirit nao helpem hem. (Acts 13:2; readim Acts 16:6-10.) Jehovah gohed for iusim holy spirit for leadim preaching waka distaem tu. Olsem Paul, evriwan wea worshipim Jehovah traem best for no fraet and gohed strong for preach. Wei wea God iusim holy spirit for leadim iumi hem difren from wei wea hem leadim Paul. Nomata olsem, iumi savve God iusim holy spirit for leadim kam olketa wea interest long truth.—John 6:44.
Spirit Helpem Man for “Duim Plande Difren Kaen Samting”
12-14. Waswe, holy spirit helpem each wan long kongregeson long sem wei? Minim kam.
12 Taem iumi readim Bible and lane abaotem wei wea Jehovah blessim olketa anointed Christian long first century, datwan barava encouragem iumi. Holy spirit helpem olketa Christian long datfala taem for duim olketa “difren kaen waka.” Paul storyim olketa difren kaen waka hia long olketa Christian long Corinth. Hem sei: “Olketa difren kaen waka hem stap wea God givim paoa long man for duim, bat wanfala spirit nomoa hem stap. Olketa difren kaen waka hem stap for helpem narawan, bat wanfala Lord nomoa hem stap. Plande difren wei nao holy spirit hem waka long olketa man for olketa duim plande difren kaen samting, bat wanfala God nomoa hem mekem evri man fit for duim evri samting hia.” (1 Cor. 12:4-6, 11) Tru tumas, holy spirit savve helpem olketa wea worshipim God for duim olketa difren kaen waka followim plan bilong God. Holy spirit leadim “smol sekson bilong olketa sheepsheep” wea hem minim olketa anointed Christian, and “olketa nara sheepsheep” tu. (Luke 12:32; John 10:16) Nomata olsem, holy spirit savve helpem each wan long kongregeson long difren wei.
13 Tingim diswan, holy spirit nao markem olketa elder long kongregeson. (Acts 20:28) Bat no evri anointed Christian kamap elder. Datwan showimaot holy spirit savve helpem each wan long kongregeson long difren wei.
14 Sem holy spirit wea Jehovah iusim for mekem Jesus laef bak long heven, hem tu mekem olketa anointed Christian for savve God adoptim olketa olsem olketa son bilong hem. (Readim Romans 8:11, 15.) Jehovah iusim sem spirit tu for wakem evri samting. (Gen. 1:1-3) Hem iusim sem spirit for helpem Bezalel for savve hao for wakem olketa spesol samting long tabernacle. Sem spirit tu strongim Samson for duim olketa samting wea no eni man fit for duim and hem helpem Peter tu for wakabaot antap long wata. So iumi shud no tingse wei wea holy spirit leadim man hem semsem witim wei wea holy spirit mekem man for kamap anointed Christian. Taem holy spirit mekem man for kamap anointed Christian datwan hem wanfala spesol wei wea God iusim holy spirit. God nao chusim olketa wea kamap anointed Christian.
15. Waswe, wei for markem man for kamap anointed Christian bae gohed for olowe? Minim kam.
15 Long plande thousand year wea go pas, God iusim holy spirit long olketa difren wei for helpem olketa wea faithful. Jehovah duim datwan bifor hem markem olketa man for kamap anointed Christian start long Pentecost 33 C.E. Bat wei for markem olketa anointed Christian bae finis. Nomata olsem, Jehovah bae gohed for iusim holy spirit for helpem olketa wea worshipim hem duim wanem hem laekem.
16. Wanem nao pipol bilong Jehovah duim distaem wea showimaot holy spirit helpem olketa?
16 Wanem nao olketa wea worshipim Jehovah duim distaem wea showimaot holy spirit helpem olketa? Revelation 22:17 sei: “Holy spirit and datfala gele wea bae marit gohed for sei: ‘Kam!’ And eniwan wea herem diswan mas sei: ‘Kam!’ Eniwan wea laek drink mas kam and eniwan wea laekem datfala wata wea savve mekem man laef hem mas kam and tekem free.” Holy spirit helpem olketa Christian for talem “eniwan wea laekem” for kam tekem wata wea savve mekem man laef. Olketa anointed Christian nao leadim disfala waka and olketa nara sheepsheep waka tugeta witim olketa. Holy spirit nao helpem evriwan. Olketa anointed Christian and nara sheepsheep showimaot olketa dedicate long Jehovah taem olketa baptaes “long nem bilong Dadi and bilong Son and bilong holy spirit.” (Matt. 28:19) Evriwan hia showimaot olketa wei wea spirit mekem man for garem. (Gal. 5:22, 23) Holy spirit helpem olketa for traem best for duim olketa samting wea mekem God hapi.—2 Cor. 7:1; Rev. 7:9, 14.
Gohed Ask for Holy Spirit
17. Wanem nao iu savve duim for showimaot holy spirit leadim iu?
17 Nomata iu garem hope for go long heven or laef olowe long earth, Jehovah savve givim iu “strong wea winim strong bilong man” mekem iu savve gohed faithful go kasem end. (2 Cor. 4:7) Maet pipol tok spoelem or mekfani long iu bikos iu duim preaching waka. Bat tingim wanem Bible talem. Hem sei: “Sapos pipol tok spoelem iufala bikos long nem bilong Christ, iufala hapi nomoa, bikos datwan showimaot spirit bilong glory, wea hem nao spirit bilong God, hem stap long iufala.”—1 Pet. 4:14.
18, 19. (a) Long wanem wei nao Jehovah savve iusim holy spirit for helpem iu? (b) Wanem nao iu shud gohed for duim?
18 God savve givim holy spirit long olketa wea askem hem. Holy spirit bae helpem iumi for duim gud eni assignment, and for laek duim best bilong iumi for worshipim Jehovah. Bible sei: “Samting wea mekem God hapi nao hem for givim paoa long iufala mekem iufala savve laek duim samting and for iufala duim datwan.” Holy spirit and wei wea iumi traem best for “hol strong long toktok bilong laef” bae helpem iumi for ‘fraet and seksek taem iumi gohed traem best bilong iumi for kasem laef.’—Phil. 2:12, 13, 16.
19 Iumi mas trustim holy spirit and gohed traem best for duim wanem Jehovah laekem, duim gud eni assignment, and askem Jehovah for helpem iumi. (Jas. 1:5) Jehovah bae helpem iumi for minim wanem Bible talem, for gohed strong nomata iumi kasem problem, and for preachim gud nius. Jesus promis olsem: “Gohed for ask and iufala bae kasem samting wea iufala ask for hem. Gohed for lukaotem samting and iufala bae faendem datwan. Gohed for noknok long door and bae hem open for iufala.” Iumi savve askem God tu for holy spirit. (Luke 11:9, 13) So gohed askem Jehovah for letem holy spirit leadim iu olsem hem duim for olketa wea faithful bifor.
Waswe, Iu Savve Minim Kam?
• Wanem nao iumi lanem from example bilong Mary?
• Hao nao holy spirit leadim Paul?
• Long wanem wei nao holy spirit leadim pipol bilong God distaem?
[Piksa long page 24]
Holy spirit helpem Paul for tok strong long man wea duim magic
[Piksa long page 26]
God iusim holy spirit for leadim olketa anointed Christian and nara sheepsheep