Waka wea Mary Duim Fitim Plan Bilong God

LONG taem wea Jesus duim waka bilong hem, wanfala woman singaot big and sei olsem: “Woman wea bornem iu and susum iu nao hem hapi!” Sapos Jesus laekem iumi for worshipim mami bilong hem, datwan hem chance nao for mekhae long mami bilong hem. Bat hem tok olsem: “Nomoa ia, Olketa wea herem toktok bilong God and obeyim datwan nao olketa hapi!”​—⁠Luke 11:​27, 28.

Jesus no minim for mami bilong hem for garem eni spesol title, and hem no talem olketa wea followim hem tu for duim olsem. Hao nao diswan fitim feeling wea staka pipol garem for mekhae long Mary? Iumi bae lukim olketa teaching wea staka pipol bilivim abaotem mami bilong Jesus and markem witim wanem Bible talem.

“Mifala Tinghae Long Iu,” “God Blessim Iu Winim Olketa Nara Woman”

Angel Gabriel talem Mary abaotem plan bilong God for hem. Long datfala taem, angel tok olsem long Mary: “Jehovah hem barava hapi long iu Mary, and hem blessim iu.” (Luke 1:​28) Narafala wei for transleitim datfala toktok tu hem olsem: “Hello, mifala tinghae long iu, Lord stap witim iu.” No longtaem bihaen, Elizabeth tu talem sem toktok long Mary: “God blessim iu winim olketa nara woman, and hem blessim tu baby long bele bilong iu!” (Luke 1:​42) Waswe, olketa toktok hia showimaot pipol mas worshipim Mary?

For tok stret, nomoa nao. Nomata olketa Catholic iusim olketa toktok hia taem olketa prea long Mary, Bible no talem for iumi prea long Mary. Gabriel and Elizabeth luksavve long bigfala waka wea Mary bae duim for bornem Messiah, bat Bible no talem tufala hia for prea long hem. Taem olketa disaepol bilong Jesus askem hem for teachim olketa hao for prea, hem no talem olketa for prea long Mary bat olketa mas prea nomoa long Dadi bilong hem. Tru nao, prea wea Jesus talem wea evriwan savve long hem start witim olketa toktok hia: “Dadi bilong mifala long heven.”​—⁠Matthew 6:⁠9.

Hem Tu Bae Rul

Nara teaching tu olketa sei Mary hem “Queen bilong heven” distaem. Bible nating talem olsem. Bat Bible storyim nomoa hao Mary garem wanfala spesol waka insaed organization bilong God long heven. Wanem nao datfala waka?

Jesus talem hao olketa disaepol bilong hem wea faithful bae rul witim hem long Kingdom bilong hem. (Luke 22:​28-​30) Jesus bae givim paoa long olketa wea hem chusim for waka olsem “olketa priest for God bilong iumi, and olketa bae rul olsem olketa king ovarem earth.” (Revelation 5:​10) Bible talem hao Mary tu hem wanfala long olketa wea bae duim datfala spesol waka. Why nao iumi fit for sei olsem?

Maet iu tingim hao bihaen Jesus hem dae, Mary and olketa disaepol and olketa brata bilong Jesus “gohed for prea tugeta.” “Samfala woman” tu stap witim datfala 120 pipol wea hipap. (Acts 1:​12-​15) Bible storyim hao, taem day bilong “festival bilong Pentecost hem gohed, evriwan hipap tugeta long sem ples” and holy spirit bilong God wea stap long evriwan mekem olketa for story long olketa difren languis.​—⁠Acts 2:​1-4.

From Mary hem wanfala long olketa hia wea kasem blessing, diswan showimaot hem and olketa nara woman wea kasem holy spirit, olketa kamap part long Kingdom bilong Jesus long heven. Datwan showimaot iumi fit for bilivim hao distaem Mary hem sidaon witim Jesus long heven. (Romans 8:​14-​17) Tingim samfala important waka wea Mary and olketa narawan garem for waka witim Jesus long heven for duim wanem God hem promisim.

Givimaot Olketa Nambawan Blessing

Bible buk Revelation storyim hao 144,000 bae go ap long heven for waka witim Jesus olsem olketa priest, judge, and king. (Revelation 14:​1, 4; 20:​4, 6) Olketa bae waka olsem priest witim Jesus, mekem olketa man kamap perfect long spiritual wei, garem olketa gudfala wei, and kamap perfect long body. (Revelation 21:​1-4) Hem wanfala spesol samting for evriwan wea worshipim Jehovah for stap long datfala taem!a

Mary duim staka samting finis, and hem gohed yet for duim waka for mekem plan bilong Jehovah kamap tru. From hem hambol, faithful, obey, gudfala mami, and nating givap nomata hem kasem hard taem, datwan showimaot gudfala wei for iumi followim. From hem nao bornem Messiah and mekem wei for iumi savve kasem gudfala samting, datwan shud mekem iumi for respectim hem.

Bat important samting wea iumi savve lanem from Mary witim olketa nara faithful wakaman bilong God nao, hem wei wea olketa worshipim Jehovah and no eni nara god. Mary witim olketa narawan wea bae rul witim Jesus long heven, singaot big and tok olsem: “Long Datwan wea sidaon long throne [Jehovah God] and long disfala Lamb [Jesus Christ] letem blessing and honor and glory and paoa for olowe and olowe.”​—⁠Revelation 5:​13; 19:⁠10.

[Footnote]

[Blurb long page 10]

Iumi fit for followim Mary long wei for hambol, faithful, and for obey