Waswe, Iu Sapotim Rul Bilong Jehovah?
“Sei olsem long pipol long olketa kantri: ‘Jehovah hem kamap king.’”—PSALM 96:10.
1, 2. (a) Wanem nao barava important samting wea happen long samting olsem October 29 C.E.? (b) Datwan mekem Jesus luksavve long wanem samting?
LONG samting olsem October 29 C.E., wanfala barava important samting wea no eniwan lukim bifor hem happen long earth. Matthew, wea raetem wanfala Gospel hem sei olsem: “Bihaen hem baptaes Jesus hem kamaot from wata; and semtaem nomoa, skae hem open, and [John Baptaesa] lukim spirit bilong God wea olsem wanfala kurukuru hem kam daon long [Jesus]. And tu, wanfala voice from heven hem sei: ‘Diswan nao Son bilong mi, wea mi lovem, and wea mi hapi tumas long hem.’” Evri Gospel garem story abaotem datfala samting wea happen.—Matthew 3:16, 17; Mark 1:9-11; Luke 3:21, 22; John 1:32-34.
2 Wei wea aposol John lukim holy spirit kam daon long Jesus showimaot Jesus nao Datwan wea God anointim, wea minim Messiah, or Christ. (John 1:33) Hem taem nao for datfala promis “seed” hem showaot! Man wea standap witim John Baptaesa hia hem man wea Satan datfala main enemy bilong Jehovah and rul bilong hem bae killim leg bilong hem and wea hem bae killim hed bilong Satan. (Genesis 3:15) Start long datfala taem Jesus luksavve hao hem mas waka hard for fulfillim plan bilong Jehovah abaotem rul bilong Hem and datfala Kingdom.
3. Wanem nao Jesus duim for hem redi for datfala waka wea hem kasem for sapotim rul bilong Jehovah?
3 For hem redi for datfala waka wea hem kasem, “Jesus wea fulap witim holy spirit hem lusim Jordan, and spirit leadim hem go insaed long wilderness.” (Luke 4:1; Mark 1:12) Long there, Jesus stap for 40 day mekem hem barava ting raonem wei wea Satan kwestinim sapos Jehovah garem right for rul or nomoa, and tu, for ting raonem datfala waka wea hem kasem for sapotim rul bilong Jehovah. Wei wea Satan kwestinim rul bilong Jehovah hem affectim evriwan long heven and earth. So iumi shud tingting gud raonem faithful fasin bilong Jesus and tingim wanem iumi mas duim for showimaot iumi tu barava laek for sapotim rul bilong Jehovah.—Job 1:6-12; 2:2-6.
Satan Kwestinim Rul Bilong Jehovah
4. Wanem nao Satan duim wea join witim datfala kwestin abaotem hu nao garem right for rul?
4 Satan hem lukim evri samting hia wea happen long Jesus. Stretawe Satan hem trae for mekem datfala main “seed” bilong “woman” bilong God for no faithful. (Genesis 3:15) Satan testim Jesus thrifala taem, and encouragem Jesus for duim samting wea hemseleva bae kasem gud samting from datwan and no samting wea Dadi bilong hem laekem hem for duim. Mek-thri test hem barava join witim datfala kwestin abaotem hu nao garem right for rul. Taem Satan showim Jesus “evri kingdom bilong world and glory bilong olketa,” hem sei olsem long Jesus: “Evri samting hia bae mi givim long iu sapos iu baodaon and worshipim mi.” From Jesus hem barava luksavve Devil hem kontrolem “evri kingdom bilong world,” hem showimaot hem sapotim rul bilong Jehovah taem hem sei long Satan: “Satan, iu go nao! From olketa scripture talem finis, ‘Iu mas worshipim God bilong iu, Jehovah, and iu mas servem hem nomoa.’”—Matthew 4:8-10.
5. Wanem hard assignment nao Jesus mas fulfillim?
5 Evri samting wea Jesus duim hem showimaot klia hao wei for sapotim rul bilong Jehovah nao hem barava important samting long hem. Olsem profesi hem showimaot, Satan bae killim leg bilong datfala “seed.” Jesus savve hem mas gohed for faithful go kasem datfala taem wea hem bae dae mekem hem pruvim hao God nomoa garem right for rul. (Matthew 16:21; 17:12) Hem mas explainim tu hao Jehovah givim paoa long datfala Kingdom for aotem Satan, wea hem againstim Jehovah, and for mekem evri creation garem peace moa. (Matthew 6:9, 10) Wanem nao Jesus duim for fulfillim disfala hard assignment?
“Kingdom Bilong God Hem Klosap Nao”
6. Wanem nao Jesus duim wea showimaot God bae iusim Kingdom for “finisim olketa samting wea Devil duim”?
6 First samting wea Jesus duim, hem “go long Galilee, and preach abaotem disfala gud nius bilong God, and hem sei: ‘Taem wea God markem hem kam nao, and kingdom bilong God hem kam klosap.’ ” (Mark 1:14, 15) Tru nao, hem sei: “Mi mas talemaot gud nius abaotem kingdom bilong God, bikos hem nao why hem sendem mi kam.” (Luke 4:18-21, 43) Jesus hem go long evri ples long datfala kantri, and hem “preach and talemaot gud nius abaotem kingdom bilong God.” (Luke 8:1) Jesus hem duim olketa nambawan mirakol tu. Hem feedim staka pipol, stopem big wind and raf sea, healim olketa wea sik, and mekem olketa wea dae finis for laef bak moa. Wei wea Jesus duim olketa mirakol hia, hem pruvim God savve stretem evri nogud samting and wei for safa wea kam from wei wea olketa bighed and againstim God long Eden, and for “finisim olketa samting wea Devil duim.”—1 John 3:8.
7. Wanem nao Jesus talem olketa follower bilong hem for duim, and wanem nao kamaot from datwan?
7 For mekem gud nius abaotem Kingdom hem go kasem evri ples, Jesus hipimap samfala wea faithful for followim hem and trainim olketa for duim datfala waka. Firstaem hem markem 12-fala aposol bilong hem and “sendem olketa for preach abaotem kingdom bilong God.” (Luke 9:1, 2) Then hem sendem 70 moa for talemaot disfala message: “Kingdom bilong God hem kam klosap long iufala.” (Luke 10:1, 8, 9) Taem olketa disaepol hia kam bak and talem Jesus abaotem olketa gud samting wea kamaot from waka wea olketa duim for preach abaotem Kingdom, hem sei long olketa: “Mi lukim Satan hem foldaon finis olsem laetning from heven.”—Luke 10:17, 18.
8. Evri samting wea Jesus duim long laef bilong hem showimaot wanem samting?
8 Jesus hem iusim evri strong and chance wea hem garem for talemaot message abaotem Kingdom. Hem no wari for garem olketa material samting wea nara pipol garem, bat hem gohed waka day and naet. Hem sei: “Olketa fox garem ples for sleep and olketa bird garem ples for sleep tu, bat Son bilong man no garem eni ples for putim hed bilong hem for sleep.” (Luke 9:58; Mark 6:31; John 4:31-34) No longtaem bifor hem dae, Jesus talem stret long Pontius Pilate olsem: “Why mi born long disfala world hem for witness abaotem truth.” (John 18:37) Evri samting wea Jesus duim long laef bilong hem showimaot hem kam, no for just kamap wanfala nambawan teacher nomoa or man for duim mirakol or man wea willing for kam givim laef bilong hem for olketa man, bat hem kam for sapotim will bilong Jehovah, and for showimaot hao God savve iusim Kingdom bilong hem for duim will bilong hem.—John 14:6.
“Mi Finisim Nao Datfala Waka!”
9. Hao nao Satan win for killim leg bilong “seed” bilong woman bilong God?
9 Datfala Enemy, Satan, hem nating hapi long olketa samting wea Jesus duim for sapotim datfala Kingdom. Plande taem hem iusim olketa sekson long earth wea part long “seed” bilong hem, wea hem nao olketa gavman and religion, for trae killim dae “seed” bilong woman bilong God. Start long taem Jesus hem born go kasem taem hem dae, Satan and olketa wea sapotim hem trae for killim hem dae. Gogo, long 33 C.E., hem taem for datfala Enemy killim leg bilong Son bilong man. (Matthew 20:18, 19; Luke 18:31-33) Olketa Gospel showimaot klia hao Satan nao mekem Judas Iscariot, olketa chief priest, olketa scribe, olketa Pharisee, and olketa bilong Rome for judgem Jesus and mekem hem kasem bigfala pain long post wea hem dae long hem.—Acts 2:22, 23.
10. Wanem important samting nao kamaot from wei wea Jesus dae long post?
10 Taem iu tingim hao olketa hangem Jesus long datfala post and hem safa gogo hem dae, datwan mekem iu tingim wanem samting? Maet iu tingim ransom sakrifaes wea Jesus barava willing for givim for sin bilong olketa man. (Matthew 20:28; John 15:13) Maet iu barava sapraes long bigfala love wea Jehovah showim long iumi taem hem provaedem datfala sakrifaes. (John 3:16) Maet iu garem sem tingting olsem datfala bigman long army bilong Rome wea sei: “Tru nao, diswan hem Son bilong God.” (Matthew 27:54) Hem stret for tingim evri samting olsem. Long narasaed, tingim last toktok bilong Jesus taem hem hange long post: “Mi finisim nao datfala waka!” (John 19:30) Wanem waka nao Jesus hem finisim? Hem tru, olketa samting wea Jesus hem duim taem hem laef, and tu, dae bilong hem, hem fulfillim plande samting, bat main reason why Jesus kam long earth hem for showimaot hao Jehovah nomoa garem right for rul. Profesi hem talem finis hao from hem nao datfala “seed,” hem bae kasem bigfala test from Satan wea datwan bae mekhae long nem bilong Jehovah. (Isaiah 53:3-7) Nomata olketa responsibility hia barava big, Jesus fulfillim evribit. Barava nambawan samting nao hem duim!
11. Wanem nao bae Jesus duim for fulfillim evribit datfala profesi wea Jehovah talemaot long Eden?
11 From faithful fasin bilong Jesus, God resurrectim hem olsem “spirit wea givim laef” no olsem wanfala man. (1 Corinthians 15:45; 1 Peter 3:18) Diswan nao promis bilong Jehovah for Son bilong hem wea kasem glory: “Sidaon long raet saed bilong mi go kasem taem mi putim olketa enemy bilong iu olsem stul for putim leg bilong iu.” (Psalm 110:1) “Olketa enemy” hia, hem Satan and evriwan wea part long “seed” bilong hem. From Jesus Christ hem King bilong Messiah Kingdom bilong Jehovah, hem bae lead for finisim evriwan long heven and earth wea againstim Jehovah. (Revelation 12:7-9; 19:11-16; 20:1-3, 10) Long datfala taem nao tufala samting bae fulfill evribit, hem nao profesi long Genesis 3:15 and datfala prea wea Jesus teachim long olketa follower bilong hem, wea sei: “Mekem kingdom bilong iu kam. Mekem will bilong iu kamap long heven and long earth.”—Matthew 6:10; Philippians 2:8-11.
Wanfala Example for Followim
12, 13. (a) Wanem nao tingting bilong pipol distaem abaotem datfala gud nius? (b) Sapos iumi laek for followim example bilong Christ, wanem nao iumi shud askem iumiseleva?
12 Distaem, olsem Jesus hem profesi abaotem finis, olketa disaepol bilong Jesus gohed for preachim gud nius abaotem Kingdom long plande kantri. (Matthew 24:14) From datwan, plande million pipol dedicatem laef bilong olketa long God. Olketa barava hapi taem olketa tingim olketa blessing wea bae olketa kasem from datfala Kingdom. Olketa luk forward for stap sef long wanfala paradaes wea garem peace, and olketa hapi for talem nara pipol abaotem hope bilong olketa. (Psalm 37:11; 2 Peter 3:13) Waswe, iu wanfala long olketa hia wea talemaot Kingdom? Sapos olsem, iu duim barava gud samting. Bat iumi need for ting raonem nara samting tu.
13 Aposol Peter hem sei olsem: “Christ hem safa for iufala, and showimaot example for iufala barava followim.” (1 Peter 2:21) Tingim hao long disfala scripture, Peter no storyim strong wea Jesus garem for preach or savve wea hem garem for teach, bat hem storyim wei wea hem safa. From Peter hem lukim evri samting wea happen long Jesus, hem barava savve hao Jesus hem willing for safa mekem hem stap anda long rul bilong Jehovah and for pruvim Satan hem laea. So, wanem nao iumi savve duim for followim example bilong Jesus? Iumi mas askem iumiseleva: ‘Waswe mi willing for safa for sapotim and honorim rul bilong Jehovah? Waswe, mi showimaot long olketa samting mi duim and wei wea mi strong for duim ministry, hao samting wea barava important long mi nao hem for sapotim rul bilong Jehovah?’—Colossians 3:17.
14, 15. (a) Taem samfala offerim samting or talem advaes wea no stret long Jesus, wanem nao hem duim and why nao hem duim olsem? (b) Wanem samting wea Satan kwestinim nao iumi mas tingim evritaem? (Talem samfala koment from box “Sapotim Rul Bilong Jehovah.”)
14 Iumi feisim olketa smol and bigfala test evriday, and tu, wei for disaedem olketa smol and bigfala samting. Wanem samting nao iumi shud tingim and duim long taem olsem? Olsem example, taem iumi feisim test wea bae spoelem wei wea iumi fren witim God, wanem nao iumi duim? Wanem nao Jesus duim taem Peter talem hem for tingim hemseleva? Jesus tok strong and sei long hem: “Go from mi Satan! . . . Tingting bilong iu no olsem tingting bilong God, bat olsem tingting bilong olketa man.” (Matthew 16:21-23) Or sapos iumi kasem chance for garem hae position long company for kasem bigfala pei, wea datwan bae affectim wei wea iumi fren witim God, waswe, iumi bae duim sem samting wea Jesus duim? Taem Jesus hem savve olketa wea lukim olketa mirakol wea hem duim “olketa bae kam holem hem for mekem hem kamap king,” hem go from olketa.—John 6:15.
15 Why nao Jesus hem strong for againstim samting wea olketa narawan talem and laek for duim long olketa taem hia and long olketa narataem? Bikos hem lukim hao diswan hem join witim samting wea barava important winim wei for hemseleva stap gud. Samting wea hem laek for duim nao hem will bilong Dadi bilong hem and for sapotim rul bilong Jehovah, nomata sapos wei for duim datwan bae mekem hem kasem nogud samting. (Matthew 26:50-54) So sapos iumi no tingim evritaem wei wea Satan kwestinim rul bilong Jehovah olsem Jesus hem duim, maet iumi savve foldaon long eni test or brekem faith bilong iumi. Why nao olsem? Bikos hem isi tumas for Satan trikim iumi. Satan hem savve tumas hao for mekem samting wea no stret hem luk olsem samting wea bae mekem man hapi, wea hem nao hem duim taem hem switim Eve.—2 Corinthians 11:14; 1 Timothy 2:14.
16. Taem iumi helpem olketa narawan, wanem nao main goal wea iumi shud garem?
16 Long ministry bilong iumi, iumi trae for story long pipol abaotem olketa samting wea olketa wari abaotem and showim olketa wanem Bible hem sei abaotem olketa samting hia. Diswan hem gudfala wei for mekem olketa interest for studyim Bible. Iumi laek helpem pipol savve abaotem samting wea Bible talem and olketa blessing wea iumi bae kasem from Kingdom bilong God. Bat, main goal bilong iumi hem for helpem pipol minim samting wea Satan kwestinim abaotem rul bilong Jehovah and hao datwan hem affectim olketa. Waswe, olketa willing for kamap tru Christian and karem ‘post bilong olketa for safa long hem’ and safa for saed bilong Kingdom? (Mark 8:34) Waswe, olketa redi for joinim sekson wea sapotim rul bilong Jehovah, and long wei olsem, pruvim hao Satan hem man for laea and man for talem nogud samting for spoelem narawan? (Proverbs 27:11) Hem wanfala privilege for iumi helpem olketa narawan and iumiseleva for sapotim rul bilong Jehovah.—1 Timothy 4:16.
Taem God Kamap “Evri Samting Long Evriwan”
17, 18. Sapos iumi showimaot iumi sapotim rul bilong Jehovah, wanem nambawan taem nao iumi savve luk forward for hem?
17 From iumi duim best bilong iumi distaem for showimaot long ministry and long fasin bilong iumi hao iumi sapotim rul bilong Jehovah, iumi savve luk forward long taem wea Jesus Christ hem “givim go kingdom long God and Dadi bilong hem.” Wanem taem nao bae hem duim datwan? Aposol Paul hem sei: “Taem hem finisim evri gavman and evri rul and paoa. From hem mas rul olsem king go kasem taem wea God putim olketa enemy anda long leg bilong hem. . . . Then Son bae putim hemseleva anda long Datwan wea putim evri samting anda long hem, for mekem God mas kamap evri samting long evriwan.”—1 Corinthians 15:24, 25, 28.
18 Taem God hem kamap “evri samting long evriwan”—datwan bae hem barava nambawan taem! Long datfala taem Kingdom duim finis evri samting wea God markem for hem duim. Hem distroem finis evriwan wea againstim rul bilong Jehovah. Full universe hem kasem peace finis. Man wea raetem psalm talem hao evri creation bae singsing olsem: “Givim Jehovah glory wea fitim nem bilong hem . . . Sei olsem long pipol long olketa kantri: ‘Jehovah hem kamap king.’”—Psalm 96:8, 10.
Waswe, Iu Savve Ansa?
• Long wanem wei nao Jesus hem evritaem showimaot God nomoa garem right for rul?
• Wanem samting nao dae and ministry bilong Jesus hem duim?
• Long wanem wei nao iumi savve followim example bilong Jesus long wei for showimaot iumi sapotim rul bilong Jehovah?
[Box/Piksa long page 29]
SAPOTIM RUL BILONG JEHOVAH
Olsem plande brata long Korea and long nara ples savve, taem olketa Christian deal witim olketa barava hardfala test, samting wea bae helpem olketa hem for tingim evritaem why olketa kasem olketa test olsem.
Wanfala Jehovah’s Witness wea olketa putim hem long prison taem datfala raf Soviet gavman hem rul bifor, hem sei: “Samting wea helpem mifala for no givap nao, hem wei wea mifala minim klia samting wea Satan hem kwestinim long garden bilong Eden, wea datwan nao hem sapos God hem garem right for rul or nomoa. . . . Mifala savve mifala garem chance for sapotim rul bilong Jehovah. . . . Diswan mekem mifala strong and mekem mifala fit for gohed faithful.”
Nara Witness hem storyim samting wea helpem hem and olketa nara Witness wea olketa stap insaed long wanfala raf prison. Hem sei: “Jehovah nao sapotim mifala. Nomata olketa samting wea mifala mas deal witim hem barava hard, mifala evritaem keepim wei wea mifala fren witim Jehovah strong. Mifala evritaem encouragem each other long wei for storyim hao mifala evriwan sapotim rul bilong Jehovah.”
[Piksa long page 27]
Wanem nao Jesus duim for sapotim rul bilong Jehovah taem Satan testim hem?
[Piksa long page 29]
Wanem samting nao dae bilong Jesus hem duim?