Waswe, Olketa Jehovah’s Witness Biliv Long Jesus?

MAN MAS BILIV LONG JESUS FOR SEV

Anthony: Hello Tim. Mi kam bak for lukim iu.

Tim: Hello, naes for lukim iu moa.

Anthony: Mi tekem kam olketa niu Wastaoa and Awake! magasin. Olketa magasin garem olketa naes article insaed.

Tim: Thankiu. Hem gud iu kam bikos mi laek askem iu wanfala kwestin.

Anthony: Ia?

Tim: Mi talem wanfala man wea mi waka witim hao mi savve kasem olketa buk bilong iufala. Hem talem mi for no readim olketa buk hia bikos iufala Jehovah’s Witness no biliv long Jesus. Hem tru ia?

Anthony: Hem gud iu askem mi wanem mifala bilivim. Wei for duim olsem bae helpem iu for savve long tru samting abaotem mifala.

Tim: Hem nao mi tingim.

Anthony: Iu savve, samting wea iu herem hem no tru. Mifala Olketa Jehovah’s Witness biliv long Jesus. Mifala bilivim man mas showimaot faith long Jesus for hem sev.

Tim: Mi tingse iumi story abaotem Jesus bifor, bat taem wakfren bilong mi sei iufala no biliv long Jesus, mi laek for savve sapos datwan hem tru.

Anthony: Hao sapos iumi lukim samfala scripture long Bible wea storyim why hem barava important for showimaot faith long Jesus? Mifala savve iusim olketa scripture hia taem mifala preach long pipol.

Tim: OK, iumi savve lukim.

Anthony: Firstaem, iumi lukim wanem Jesus talem long John 14:6. Hem talem diswan taem hem story witim wanfala aposol bilong hem. “Jesus sei long hem: ‘Mi nao road, mi nao truth, and mi nao laef. Mi nomoa road for man go long Dadi long heven.’” Olsem disfala verse talem, hu nomoa road for go long Dadi long heven?

Tim: Jesus.

Anthony: Hem stret, and mifala barava bilivim datwan. And Tim, sapos iumi laekem God for herem prea bilong iumi, iumi mas prea long nem bilong hu?

Tim: Long nem bilong Jesus.

Anthony: Ia. Dastawe, taem mi prea mi evritaem prea long nem bilong Jesus. Evri Jehovah’s Witness duim olsem.

Tim: Oh ia?

Anthony: Iumi savve lukim nara scripture long John 3:16. Disfala scripture hem barava important and olketa sei disfala verse showimaot klia why Jesus hem kam long earth and duim ministry bilong hem. Plis iu readim kam.

Tim: OK, hem sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”

Anthony: Thankiu. Iu readim datfala scripture bifor?

Tim: Ia, mi readim.

Anthony: Staka pipol savve long scripture hia. Lukluk moa long wanem Jesus talem. Hem sei: From God lovem iumi olketa man, iumi savve kasem laef olowe. Bat wanem nao iumi mas duim?

Tim: Iumi mas showimaot faith.

Anthony: Ia, iumi mas showimaot faith long datfala spesol Son bilong God, Jesus Christ. Long page 2 long Wastaoa magasin wea mi givim long iu hem mekhae long disfala point. Hem sei Wastaoa magasin hem for “helpem man for garem faith long Jesus Christ wea distaem hem King insaed Kingdom bilong God. Jesus hem dae for iumi mekem iumi savve laef olowe.”

Tim: Iaman, magasin bilong iufala showimaot klia iufala biliv long Jesus.

Anthony: Iu tok tru.

Tim: So why nao pipol sei iufala no biliv long Jesus?

Anthony: Maet staka reason stap. Bat samfala ting olsem bikos olketa herem datwan from olketa narawan. Or maet bigman long church bilong olketa talem datwan long olketa.

Tim: Long tingting bilong mi, maet samfala pipol sei iufala no biliv long Jesus bikos iufala sei iufala Olketa Jehovah’s Witness, and no olketa Witness bilong Jesus.

Anthony: Ia, maet datwan hem wanfala reason tu.

Tim: So why nao staka taem iufala story abaotem Jehovah?

“MI TALEMAOT NEM BILONG IU”

Anthony: Hem bikos mifala luksavve hem important for iusim nem bilong God, Jehovah, olsem Son bilong hem Jesus hem duim. Bae iumi readim John 17:26. Hem samting wea Jesus talem taem hem prea long Dadi bilong hem. Iu savve readim kam for iumi?

Tim: Hem sei: “Mi talemaot nem bilong iu long olketa and bae mi gohed for duim olsem, mekem olketa savve showimaot love long nara pipol olsem iu tu showimaot love long mi and mekem mi savve wan mind witim olketa.”

Anthony: Thankiu. Long verse hia hem sei Jesus talemaot nem bilong God. Iu savve why nao Jesus ting hem important for duim datwan?

Tim: Ahhh, mi no savve.

Anthony: Bae iumi lukim nara scripture wea bae ansarem datwan. Hem long Acts 2:21 and hem sei: “Eniwan wea prea long Jehovah for helpem hem, bae hem sev.” Disfala verse sei for iumi iusim nem bilong Jehovah taem iumi prea. Iu tingse Jesus hem savve Jehovah laekem olketa man for iusim nem bilong hem for olketa sev?

Tim: Ia.

Anthony: So wanfala reason why hem important long Jesus for olketa follower bilong hem savve long nem bilong God and iusim datfala nem hem bikos datwan savve sevem olketa. And hem nao why hem important for mifala story abaotem Jehovah. Mifala luksavve hem important for pipol savve long nem bilong God and helpem olketa for iusim datfala nem.

Tim: Bat nomata sapos pipol no savve long nem bilong God or no iusim datfala nem, long tingting bilong olketa, God hem God nao.

Anthony: Hem tru. Bat God talem iumi nem bilong hem mekem hem isi for iumi savve fren witim hem.

Tim: Wat nao iu minim?

Anthony: Tingim diswan. Taem iumi storyim olketa long Bible olsem Moses, Noah, and Jesus, iumi savve sei nomoa man wea divaedem Red Sea and wea God givim Ten Komandment long hem. Or iumi savve sei man wea buildim ark for sevem famili bilong hem and olketa animal. Or iumi savve sei datfala man wea kam from heven for dae for olketa sin bilong iumi. Iumi no need for savve long nem bilong olketa, iaman?

Tim: Ia.

Anthony: Bat God laekem iumi for savve long nem bilong olketa, dastawe nem bilong olketa stap long Bible. Nomata iumi no meetim Moses, Noah, or Jesus, taem iumi savve long nem bilong olketa, hem olsem iumi savve gud long olketa.

Tim: OK, so dastawe God laekem iumi for savve long nem bilong hem!

Anthony: Ia. Mifala laekem pipol for luksavve Jehovah God hem samwan wea olketa savve fren witim hem and hem nao nara reason why mifala evritaem iusim nem bilong God. Bat mifala mekhae tu long wanem Jesus duim for sevem iumi. Bae iumi readim nara scripture wea strongim disfala point.

Tim: OK.

Anthony: Iumi readim finis John 14:6, wea Jesus hem sei “mi nao road, mi nao truth, and mi nao laef.” Distaem bae iumi readim toktok bilong Jesus long John 14:1. Plis iu savve readim last part long disfala verse?

Tim: Ia. Hem sei: “Showimaot faith long God, and showimaot faith long mi tu.”

Anthony: Gud. So iu tingse diswan minim iumi mas chus for biliv long God nomoa and no long Jesus, or biliv long Jesus nomoa and no long God?

Tim: Nomoa. Jesus sei iumi mas showimaot faith long tufala evriwan.

Anthony: Hem stret. And iumi mas duim samting for pruvim datwan and no talem nomoa iumi garem faith long God and Jesus, iaman?

Tim: Ia.

Anthony: Bat wanem nao iumi mas duim for showimaot faith long God and Jesus? Bae iumi storyim datwan narataem nao.a

Tim: OK.