CHAPTER 3

“Olketa Kasem Holy Spirit”

Gud samting wea happen bihaen olketa disaepol kasem holy spirit long Pentecost

1. Wanem nao gohed long day bilong Pentecost?

STAKA pipol kam long Jerusalem and olketa hapi tumas.a Olketa kam from olketa farawe ples olsem Elam, Mesopotamia, Cappadocia, Pontus, Egypt, and Rome.b Long temple, olketa Levite singim Hallel (hem nao Psalm 113 go kasem 118). Wanfala grup singsing and nara grup singsing go bak. Smoke tu go ap long skae from altar. Wanem nao gohed? Hem day bilong Pentecost, wea olketa kolem tu long “day blo first harvest.” (Num. 28:26) Olketa Jew celebratem diswan wanfala taem evri year for markem end bilong barley harvest and start bilong wheat harvest. Evriwan barava enjoyim datfala day.

Wanfala map wea showim ples bilong olketa wea herem gud nius long Pentecost 33 C.E, olketa kam from. 1. Olketa kantri: Libya, Egypt, Ethiopia, Bithynia, Pontus, Cappadocia, Judea, Mesopotamia, Babylonia, Elam, Media, and Parthia. 2. Olketa city: Rome, Alexandria, Memphis, Antioch (bilong Syria), Jerusalem, and Babylon. 3. Olketa ples wea wata stap: Mediterranean Sea, Black Sea, Red Sea, Caspian Sea, and Persian Gulf.

JERUSALEM HEM MAIN PLES BILONG OLKETA JEW FOR WORSHIP

Olketa firstfala chapter long buk bilong Acts storyim plande samting wea happen long Jerusalem. Jerusalem stap long olketa hill long Judea, samting olsem 55 kilometer east long Mediterranean Sea. Long 1070 B.C.E., King David tekovarem strongfala taon long Maunt Zion and long there nao David buildim taon bilong hem wea gogo hem kamap kapitol taon bilong Israel.

Maunt Moriah stap klosap long Maunt Zion. Olketa Jew sei Maunt Moriah hem ples wea Abraham laek sakrifaesim Isaac. Datwan happen samting olsem 1,900 year bifor long taem bilong olketa aposol. Taem Solomon buildim firstfala temple long Maunt Moriah, datfala area kamap part bilong Jerusalem. Olketa Jew worship long temple and duim plande nara samting long there.

Olketa Jew wea stap long olketa nara ples savve kam long temple bilong Jehovah for worshipim hem, givim olketa sakrifaes, and celebratem olketa bigfala hipap. Olketa obeyim law bilong God wea sei: “Diswan nao thrifala taem evri year, wea evri male blo iufala mas kam front lo Jehovah, God blo iufala, lo ples wea hem chusim.” (Deut. 16:16) Hae Kot bilong olketa Jew hem stap long Jerusalem tu. Datfala kot garem paoa saed long community, gavman, and religion.

2. Wanem nao happen long Pentecost 33 C.E. wea mekem pipol sapraes?

² Long samting olsem 9 klok long datfala morning long 33 C.E., samting wea happen mekem pipol sapraes. Kam kasem distaem pipol tingim yet datfala samting. Bible sei: “Seknomoa olketa [disaepol] herem wanfala noise wea start kam long skae. Hem here olsem bigfala wind.” (Acts 2:2) Samting olsem 120 disaepol bilong Jesus hipap tugeta long wanfala haos and datfala noise hem mek noise long full haos. Then nomoa, wanfala sapraesing samting happen. Olketa lukim samting olsem olketa smolfala fire wea laet. Olketa fire hia stap antap long evri disaepol and olketa “kasem holy spirit” and start for toktok long olketa difren languis! Then olketa go aot long haos and story long pipol wea kam long Jerusalem. Pipol hia sapraes tumas bikos “olketa herem languis bilong olketa nao olketa disaepol toktok long hem”!—Acts 2:1-6.

3. (a) Why nao samting wea happen long Pentecost 33 C.E. hem important samting long history bilong olketa tru Christian? (b) Taem Peter story long pipol wea hipap, hao nao datwan join witim “olketa key bilong Kingdom”?

³ Samting wea happen long Pentecost 33 C.E. hem important samting long history bilong olketa tru Christian. Long datfala day, olketa disaepol kamap part bilong wanfala niu nation, datfala “Israel bilong God.” (Gal. 6:16) Bat nara samting tu happen. Taem Peter story long pipol wea hipap long Jerusalem, hem iusim first wan long thrifala “key bilong Kingdom” wea Jesus givim long hem. Thrifala key bae givim chance long thrifala difren grup for kasem olketa spesol privilege. (Matt. 16:18, 19) Firstfala key givim chance long olketa Jew and pipol wea followim religion bilong olketa Jew for acceptim gud nius and for God givim holy spirit long olketa.c Datwan bae mekem olketa kamap part bilong “Israel bilong God” and garem hope for kamap king and priest long Kingdom bilong Messiah. (Rev. 5:9, 10) Gogo olketa long Samaria and bihaen olketa wea no Jew bae kasem datfala privilege. Wanem nao iumi lanem from big samting wea happen long Pentecost 33 C.E.?

“Olketa Brata and Sista Hipap Tugeta Long Wanfala Ples” (Acts 2:1-4)

4. Hao nao Christian kongregeson wea start long 33 C.E. gohed for kamap big?

⁴ Samting olsem 120 disaepol nao olketa first wan wea insaed long Christian kongregeson. Olketa kasem holy spirit taem olketa “hipap tugeta” long rum antap long wanfala haos. (Acts 2:1) Bat go kasem evening long datfala day, staka thousand nao baptaes and joinim datfala kongregeson. Start long datfala taem plande pipol gohed for kam insaed long organization bilong Jehovah! Tru tumas, Jehovah iusim olketa Christian distaem for gohed talemaot “gud nius abaotem Kingdom.” Olketa preach “long evri ples long world mekem pipol long evri kantri mas herem” gud nius bifor end hem kam.—Matt. 24:14.

5. Wei for hipap witim kongregeson bae helpem olketa Christian long wanem wei?

⁵ Wei for hipap witim Christian kongregeson bae strongim olketa anointed Christian and gogo “olketa nara sheepsheep” tu. (John 10:16) Samting wea Paul talem long olketa Christian long Rome showimaot hem barava tinghae long wanem olketa duim for helpem each other. Hem sei: “Mi laekem tumas for lukim iufala. Mi laek storyim samting for helpem iufala fren witim God. Wanem mi minim nao hem olsem: Mi laekem iumi evriwan strongim narawan. Faith bilong iufala bae strongim mi, and faith bilong mi bae strongim iufala tu.”—Rom. 1:11, 12.

ROME HEM KAPITOL TAON TAEM ROME RULIM WORLD

Long taem bilong olketa aposol, Rome rulim olketa kantri start long Britain go kasem North Africa and from Atlantic Ocean go kasem Persian Gulf. Rome nao kapitol taon and hem big winim evri nara taon. Hem barava important taon saed long politik.

Pipol wea garem difren kastom, kala skin, languis, and biliv stap long Rome. Olketa long Rome wakem olketa gudfala road, so pipol from nara ples wea Rome rulim kam visit and tekem kam olketa samting for salem. Olketa ship tekem kam kaikai and olketa expensive samting for salem long Rome. Olketa daonem long wharf long Ostia wea klosap long Rome.

Long first century C.E., winim 1 million pipol stap long Rome. Maet samting olsem 500 thousand pipol hia slave. Samfala hem olketa criminal, pikinini wea dadi and mami salem or les long olketa, and pipol wea army bilong Rome tekem for kamap prisoner. Taem Pompey, komanda bilong army tekovarem Jerusalem long 63 B.C.E., hem tekem samfala Jew from Jerusalem for kamap slave long Rome.

Staka long Rome wea no slave, olketa poor and depend long selen wea gavman givim. Olketa stap long olketa hae story building wea fulap long staka pipol. Bat olketa King bilong Rome wakem olketa bigfala building wea luk naes tumas. Olketa wakem olketa stadium for pipol kam lukim olketa man act or dance, resis long chariot, or faetem each other and faetem olketa animal. Hem free nomoa for pipol kam lukluk.

6, 7. Wanem nao Christian kongregeson distaem duim for preach long pipol long evri kantri?

⁶ Christian kongregeson distaem duim sem samting olsem Christian kongregeson long first century. Jesus givim nambawan waka long olketa disaepol nomata samfala taem hem no isi for olketa duim datwan. Hem sei: “Teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim.”—Matt. 28:19, 20.

⁷ Distaem Jehovah iusim Christian kongregeson bilong Olketa Jehovah’s Witness for gohed duim datfala waka. Nomata hem no isi for preach long pipol wea garem difren languis, Olketa Jehovah’s Witness wakem olketa Bible pablikeson long winim 1,000 languis for helpem olketa. Sapos iu evritaem go long meeting, preach abaotem Kingdom, and teachim pipol for kamap disaepol, iu bae hapi tumas. Iu wanfala long samfala nomoa wea garem disfala privilege for story long pipol abaotem Jehovah!

8. Wanem gud samting nao iumi wanwan kasem taem iumi hipap witim kongregeson?

⁸ Nomata world distaem hem nogud, Jehovah God givim iu olketa brata and sista evriwea long world for helpem iu gohed strong and hapi. Paul sei long olketa Hebrew Christian: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.” (Heb. 10:24, 25) Christian kongregeson hem wanfala present wea Jehovah givim mekem iu savve encouragem narawan and olketa tu encouragem iu. So fren gud witim olketa brata and sista and no misstim wei for hipap tugeta long olketa meeting!

“Olketa Herem Languis Bilong Olketa” (Acts 2:5-13)

Olketa disaepol bilong Jesus preach long olketa Jew and pipol wea kam from difren ples long street wea busy. — “Iumi herem olketa story long languis bilong iumi abaotem olketa nambawan samting wea God duim.”—Acts 2:11

9, 10. Wanem nao samfala duim for preach long pipol wea story long difren languis?

⁹ Olketa Jew and pipol wea followim religion bilong olketa Jew wea kam from olketa difren ples hapi tumas long day bilong Pentecost 33 C.E. Nomata staka long olketa maet savve long Greek or Hebrew languis, olketa sapraes bikos “olketa herem languis bilong olketa nao olketa disaepol toktok long hem.” (Acts 2:6) Masbi olketa hapi tumas for herem gud nius long languis bilong olketa. Hem tru, Jehovah no duim mirakol for mekem olketa Christian distaem savve story long olketa difren languis. Nomata olsem, staka duim samting mekem olketa savve preach long pipol wea story long difren languis. Wanem nao olketa duim? Samfala lanem nara languis mekem olketa savve helpem kongregeson wea iusim datfala languis or go long kantri wea pipol story long datfala languis. Pipol savve tinghae long olketa wea lanem languis bilong olketa.

¹⁰ Tingim Christine. Hem and 7-fala nara Witness duim course for lanem Gujarati languis. Taem Christine meetim wanfala young woman long waka ples wea story long Gujarati languis, Christine hem hello long languis bilong datfala woman. Woman hia sapraes and laek savve why nao Christine laek lanem languis bilong hem Gujarati wea hem hard tumas. Christine garem chance for preach long hem and datfala young woman sei long Christine: “Ating samting wea iu laek talem hem important tumas ia.”

11. Hao nao iumi savve prepare for preachim message bilong Kingdom long pipol wea story long difren languis?

¹¹ Hem tru, no evriwan long iumi savve lanem nara languis. Nomata olsem, iumi savve prepare for preachim gud nius long pipol wea story long difren languis. Hao nao iumi savve duim datwan? Wanfala wei hem for iusim JW Language^® app for lanem olketa simpol toktok long languis wea staka pipol story long hem long ples wea iu stap. Iu savve lanem tu samfala toktok lo datfala languis wea bae mekem pipol interest for herem message long Bible. Talem olketa for go long jw.org and sapos fitim, showim olketa difren video and pablikeson wea stap long languis bilong olketa. Taem iumi iusim olketa tul hia long ministry, iumi savve kasem sem hapi wea olketa brata and sista long first-century kasem, taem pipol wea kam from olketa difren ples herem gud nius long “languis bilong olketa.”

OLKETA JEW STAP LONG MESOPOTAMIA AND EGYPT

Disfala buk The History of the Jewish People in the Age of Jesus Christ (175 B.C.–A.D. 135) sei: “Olketa Jew wea kam from laen bilong ten tribe kingdom [bilong Israel] and from kingdom bilong Judah, olketa stap long Mesopotamia, Media, and Babylonia. Olketa long Assyria and Babylon nao forcem olketa for go stap long there.” Ezra 2:64 sei 42,360 Israelite nao go bak long Jerusalem taem olketa kamap free from Babylon. Datwan happen long 537 B.C.E. Flavius Josephus storyim hao long first century C.E., staka thousand Jew nao “stap long Babylonia.” Start long mek-thri century go kasem mek-faev century C.E., olketa Jew wea stap long olketa ples hia raetem Babylonian Talmud.

Olketa raeting long bifor tu pruvim olketa Jew stap long Egypt long samting olsem mek-6 century B.C.E. Long datfala taem, Jeremiah talem message for olketa Jew wea stap long olketa difren ples long Egypt and long Memphis. (Jer. 44:1, footnote) Luk olsem plande Jew go stap long Egypt taem pipol long staka kantri followim kastom bilong olketa long Greece. Flavius Josephus sei samfala first wan for go stap long Alexandria hem olketa Jew. Gogo, olketa bigman markem big area bilong datfala taon for olketa stap long hem. Long first century C.E., Philo wea raet abaotem olketa Jew, sei 1 million Jew stap long olketa difren ples long Egypt. Olketa stap long “border bilong Libya go kasem border bilong Ethiopia.”

“Peter Standap” (Acts 2:14-37)

12. (a) Wanem nao profet Joel talem wea kamap tru long Pentecost 33 C.E.? (b) Why nao olketa disaepol long first century savve datwan bae happen?

¹² “Peter standap” and story long olketa difren kaen pipol wea hipap. (Acts 2:14) Hem explainim God nao mekem olketa savve story long olketa difren languis. Hem sei datwan mekem profesi bilong Joel kamap tru, wea sei: “Mi bae pourimaot spirit bilong mi long evri difren kaen pipol.” (Joel 2:28) Bifor Jesus go bak long heven, hem sei long olketa disaepol: “Bae mi askem Dadi long heven and bae hem sendem kam wanfala moa for helpem iufala . . . Diswan nao hem holy spirit.”—John 14:16, 17.

13, 14. Hao nao Peter trae for kasem heart bilong pipol, and hao nao iumi savve followim wei bilong hem?

¹³ Long end bilong story bilong Peter, hem tok stret long olketa wea hipap: “Pipol long Israel mas savve God mekem disfala man Jesus, wea iufala nilam long post, for hem Lord and Christ.” (Acts 2:36) Nomata staka long olketa no stap taem olketa soldia nilam Jesus long post, full nation bilong Israel nao guilty long datwan. Bat tingim, nomata Peter tok stret, hem duim long wei wea showimaot respect and for kasem heart bilong olketa. Peter no judgem olketa bat hem laekem olketa for repent. Waswe, pipol hia feel nogud long hem? Nomoa, olketa “sorre tumas” and sei long Peter: “Wanem nao mifala mas duim?” Luk olsem wei wea Peter story hem kasem heart bilong staka and datwan mekem olketa for repent.—Acts 2:37.

¹⁴ Iumi tu savve followim wei bilong Peter for story. Sapos pipol wea iumi preach long olketa talem olketa samting wea no followim Bible, iumi no need for story abaotem evri samting wea olketa talem. Hem gud for iumi storyim samting wea olketa agree long hem, then iumi savve iusim Bible for story gud witim olketa. Taem iumi storyim samting long Bible wea olketa agree long hem, plande taem datwan savve mekem pipol wea hambol for interest long truth.

OLKETA CHRISTIAN STAP LONG PONTUS

Pontus hem wanfala province long north part long Asia Minor. Olketa Jew from Pontus tu herem wanem Peter talem long Pentecost 33 C.E. (Acts 2:9) Luk olsem samfala go bak long hom and storyim datfala gud nius long olketa narawan bikos first leta wea Peter raetem, hem raet go long olketa Christian wea “stap olsem stranger” long Pontus tu.f (1 Pet. 1:1) Samting wea Peter talem showimaot olketa Christian hia safa long “enikaen hard taem” bikos long biliv bilong olketa. (1 Pet. 1:6) Luk olsem pipol againstim and spoelem olketa.

Pliny hem bigman long Bithynia and Pontus, tufala province bilong Rome. Samting wea Pliny raetem long Emperor Trajan taem Pliny stap long Pontus showimaot olketa Christian long there kasem olketa nara test tu. Long samting olsem 112 C.E., Pliny sei staka man, woman, young wan, olketa olo, and olketa wea garem hae position kamap Christian. Hem wari nogud evriwan bae kamap Christian. Pliny talem olketa Christian sapos olketa denyim Christ or talem wanfala prea for olketa god or image bilong Trajan, olketa savve go free. Bat sapos olketa no duim datwan bae hem killim olketa dae. Pliny luksavve hem hard for olketa tru Christian duim samting wea hem laekem.

f Greek word wea iumi transleitim “stap olsem stranger” hem minim olketa Jew wea no stap long Palestine. Datwan showimaot staka long olketa first wan wea kamap Christian hem olketa Jew wea go stap long olketa difren ples.

Iufala Mas “Baptaes” (Acts 2:38-47)

15. (a) Wanem nao Peter talem, and wanem nao happen bihaen? (b) Why nao staka thousand pipol wea herem gud nius long day bilong Pentecost fit for baptaes long sem day?

¹⁵ Long Pentecost 33 C.E., Peter sei long olketa Jew and pipol wea followim religion bilong olketa Jew: “Iufala mas repent and baptaes.” (Acts 2:38) So samting olsem 3,000 nao baptaes long datfala day. Luk olsem olketa baptaes long olketa pool long Jerusalem or klosap long there.d Waswe, olketa kwiktaem nomoa disaed for duim datwan? Waswe, diswan minim olketa Bible study and pikinini bilong iumi shud baptaes nomata olketa no minim gud olketa main teaching long Bible? Nomoa. Olketa wea baptaes long Pentecost 33 C.E. savve gud long olketa Holy Raeting and olketa part bilong nation bilong Israel wea dedicate finis long Jehovah. Olketa showimaot olketa strong for worshipim Jehovah tu bikos olketa travel from olketa farawe ples for kam long Jerusalem for celebratem day bilong Pentecost. Olketa luksavve God iusim Jesus Christ for mekem plan bilong hem kamap tru, so olketa laek for baptaes and kamap olketa follower bilong Christ mekem olketa savve gohed worshipim God.

HU NAO PIPOL WEA FOLLOWIM RELIGION BILONG OLKETA JEW?

Long Pentecost 33 C.E., “olketa Jew and olketa wea followim religion bilong olketa Jew” herem Peter taem hem preach.—Acts 2:10.

Nicolaus hem wanfala long 7-fala man wea olketa aposol markem for duim “waka” for sharem kaikai. Hem “man bilong Antioch wea followim religion bilong olketa Jew.” (Acts 6:3-5) Pipol from olketa nara kantri nao followim religion bilong olketa Jew. Pipol ting long olketa olsem really Jew bikos olketa worshipim nomoa God bilong olketa Israelite, followim Law bilong Moses, circumcise, and joinim nation bilong Israel.

Bihaen olketa Jew kamap free from Babylon long 537 B.C.E., staka go stap long olketa ples wea farawe from Israel bat olketa gohed for followim religion bilong olketa. From datwan, pipol wea stap long east saed long Mediterranean Sea and long olketa nara ples savve long religion bilong olketa Jew. Olketa man for raet bifor olsem Horace and Seneca, sei staka pipol from olketa difren kantri wea interest long olketa Jew and biliv bilong olketa stap witim olketa and followim religion bilong olketa.

16. Wanem nao olketa Christian long first century duim wea showimaot olketa tingim narawan?

¹⁶ Jehovah blessim olketa wea baptaes. Bible sei: “Olketa wea biliv long Jesus stap tugeta and sharem evri samting wea olketa garem. Olketa salem pis land bilong olketa and evri samting wea olketa ownim and sharem selen wea olketa kasem long eniwan wea needim samting.”e (Acts 2:44, 45) Hem gud for evri tru Christian followim example bilong olketa for showimaot love and tingim need bilong narawan.

17. Wanem nao man mas duim bifor hem savve baptaes?

¹⁷ Bifor man savve dedicate and baptaes, Bible sei hem mas duim samfala samting firstaem. Hem mas lanem wanem Bible talem. (John 17:3) Hem mas showimaot faith and repent from olketa nogud samting wea hem duim bifor and showimaot hem sorre long datwan. (Acts 3:19) Then hem mas changem wei bilong hem and duim stretfala samting wea God laekem. (Rom. 12:2; Eph. 4:23, 24) Bihaen datwan, hem prea long God for dedicatem laef bilong hem and hem fit nao for baptaes.—Matt. 16:24; 1 Pet. 3:21.

18. Wanem privilege nao olketa wea baptaes finis kasem?

¹⁸ Waswe, iu dedicate and baptaes finis? Sapos olsem, tinghae long privilege wea iu kasem. Olketa disaepol long first century wea kasem holy spirit barava storyim gud Kingdom bilong God and duim olketa samting wea Jehovah laekem. Jehovah savve iusim iu tu for duim sem samting olsem olketa!

a Lukim box, “Jerusalem Hem Main Ples Bilong Olketa Jew for Worship.”

b Lukim thrifala box, “Rome Hem Kapitol Taon Taem Rome Rulim World,” “Olketa Jew Stap Long Mesopotamia and Egypt,” and “Olketa Christian Stap Long Pontus.”

c Lukim box, “Hu Nao Pipol wea Followim Religion Bilong Olketa Jew?”

d Semkaen samting tu happen long international convention bilong Olketa Jehovah’s Witness long Kiev, Ukraine, long August 7, 1993. Long datfala convention 7,402 baptaes long 6-fala pool. Hem tekem 2 hour and 15 minute for evriwan baptaes.

e Datfala arrangement gohed for lelebet taem nomoa. Selen wea olketa sharem hem helpem olketa wea kam long Jerusalem for gohed stap long there and lanem samfala samting moa abaotem niu biliv bilong olketa.—Acts 5:1-4.