Waswe, Iu Remember?
Waswe, iu tingting raonem olketa issue bilong Wastaoa wea kamap no longtaem go nomoa? Lukim sapos iu savve ansarem olketa kwestin long daon:
• Wanem nao barava important samting long wei for stretem wanfala problem witim samwan?
Firstaem iumi mas luksavve hao iumi evriwan savve garem olketa rong tingting and fasin. Then iumi shud tingting strong sapos iumi nao startim problem and no narawan.—8/15, page 23.
• Wanem taem nao “taem for mekem evri samting kamap gud moa,” wea olketa storyim long Acts 3:21 bae kamap?
Disfala profesi for evri samting kamap gud moa bae happen long tufala wei. Firstaem, wei wea evri samting bae kamap gud moa long spiritual paradaes hem go ahed start long 1914. Narafala wei for kamap gud moa bae kamap taem earth bilong iumi hem kamap paradaes moa long physical wei.—9/1, page 17, 18.
• Hao nao olketa ants no garem komanda, olsem Proverbs 6:6-8 hem talem, wea nomata olsem olketa showimaot example for iumi?
Insaed wanfala grup bilong olketa ants, wanfala queen ants hem stap, bat hem queen nomoa long wei wea hem leim egg and hem nao mami bilong datfala grup. Olketa ants barava waka hard, and iumi shud olsem tu, trae hard for kamap moabeta long waka bilong iumi, nomata no eniwan lukluk long iumi.—9/15, page 26.
• Waswe, profesi bilong Huldah long 2 Kings 22:20, wea sei Josiah bae dae “long peace” hem tru, from Josiah hem dae long faet?
Yes, hem dae long peace long wei wea hem dae bifor datfala bigfala trabol long 609-607 B.C.E., taem olketa bilong Babylon raonem and distroem Jerusalem.—9/15, page 30.
• Hao nao wei wea Solomon hem story abaotem waef olsem “wanfala mere deer wea iu savve lovem and wanfala naes maunten goat” hem naesfala toktok? (Proverbs 5:18, 19)
Wanfala mere ibex, or maunten goat, hem garem kwaet fasin and hem luk naes. Nomata olsem, hem savve laef and bornem pikinini long olketa bigfala ston, long olketa rok, ples wea hard for man kasem wea no staka kaikai stap.—10/1, page 30, 31.
• Hu nao Henry Grew and George Storrs?
Tufala man hia stap long olketa year bilong 1800 and tufala barava studyim gud Bible. Grew faendem hao Trinity hem no kam from Bible, sem olsem wei wea soul kanduit dae and hellfire teaching. Storrs luksavve hao samfala man bae kasem laef olowe long earth. Tufala evriwan duim firstaem waka wea Charles Taze Russell, man wea start for raetem disfala magasin long 1879, hem duim bihaen.—10/15, page 26-30.
• Wanem nao tingting bilong Olketa Jehovah’s Witness abaotem olketa difren wei wea medical savve iusim blood bilong man seleva?
From Bible hem faondeson long biliv bilong olketa, olketa no keepim blood bilong olketa seleva and acceptim moa olsem wanfala transfusion. Evri Christian wanwan mas disaed for hemseleva hao nao olketa bae iusim blood bilong hem long taem bilong wanfala operation, medical test, or treatment. Hem shud tingim wanem Bible talem abaotem blood and rememberim hao hem dedicate evribit long God.—10/15, page 30, 31.
• Wanem important need midolwan Olketa Jehovah’s Witness evriwea long world nao wanfala survey wea olketa duim early long disfala year hem showimaot?
Olketa needim winim 11,000 Kingdom Hall long olketa poor kantri, wea selen hem short. Olketa iusim contribution from olketa Christian long planti kantri for help for wakem inaf ples for meeting.—11/1, page 30.
• Wanem nao samfala toktok long languis bifor wea olketa iusim long Bible long saed bilong worship?
Wanfala hem lei·tour·giʹa, wea olketa transleitim “pablik service.” Narawan hem la·treiʹa, wea olketa transleitim “holy service.” (Hebrews 10:11; Luke 2:36, 37)—11/15, page 11, 12.
• Wanem important leson nao iumi savve lanem from story bilong Bible abaotem Adam and Eve?
Eni tingting wea showimaot fasin for independent from Jehovah hem iusles and hem krangge samting.—11/15, page 24-7.
• Wanem pruv from Bible nao showimaot hao God givim paoa long olketa servant bilong hem?
David, Habakkuk, and aposol Paul givim pruv hao Jehovah God hem strongim, or givim paoa long olketa. (Psalm 60:12; Habakkuk 3:19; Philippians 4:13) Dastawe, iumi savve feel sure hao God hem willing and fit for strongim iumi.—12/1, page 10, 11.