“Olketa Wei Bilong Jehovah Hem Stret”
“Olketa wei bilong Jehovah hem stret, and olketa wea raeteous nao bae wakabaot followim olketa.”—HOSEA 14:9.
1, 2. Taem nation bilong Israel hem start, Jehovah mekem olketa Israelite for hao, bat wanem nao happen long olketa?
TAEM nation bilong Israel hem just start long taem bilong profet Moses, Jehovah mekem olketa Israelite for followim raeteous wei. Bat kasem start bilong mek-eit century B.C.E., evriting hem kamap nogud tumas and God lukim hao olketa duim barava rabis samting. Diswan showaot klia long Hosea chapter 10 go kasem 14.
2 Heart bilong Israel hem hypocrite. Pipol long datfala ten-tribe kingdom “houm wicked fasin” and harvestim samting wea no raeteous. (Hosea 10:1, 13) Jehovah hem sei: “Taem Israel hem young olsem boy mi lovem hem, and mi kolem kamaot son bilong mi from Egypt.” (Hosea 11:1) Nomata God sevem olketa Israelite from wei for slave long Egypt, olketa gohed for giaman and laea long hem. (Hosea 11:12) Dastawe Jehovah talem olketa disfala kaonsel: “Iu mas go bak long God bilong iu, and showimaot loving-kaeness and justice.”—Hosea 12:6.
3. Wanem nao Hosea hem sei bae happen long bighed Samaria, bat hao nao olketa Israelite fit for kasem mercy?
3 Bighed Samaria and king bilong hem finis long barava nogud wei. (Hosea 13:11, 16) Bat lastfala chapter bilong profesi bilong Hosea hem start witim disfala toktok: “Israel, plis kam bak long Jehovah, God bilong iufala.” Sapos olketa Israelite repent and lukaotem forgiveness from God, bae hem showimaot mercy long olketa. Bat, olketa mas luksavve hao “olketa wei bilong Jehovah hem stret” and olketa mas wakabaot followim.—Hosea 14:1-6, 9.
4. Wanem nao samfala principle wea iumi bae ting raonem long profesi bilong Hosea?
4 Disfala part bilong profesi bilong Hosea hem garem staka principle wea savve helpem iumi for wakabaot witim God. Iumi bae story raonem olketa hia: (1) Jehovah laekem worship wea no hypocrite, (2) God showimaot loyal love long pipol bilong hem, (3) iumi need for hope long Jehovah evritaem, (4) olketa wei bilong Jehovah olketa stret evritaem, and (5) olketa wea sin savve fren bak witim Jehovah.
Jehovah Laekem Worship wea No Hypocrite
5. Hao nao God expectim iumi for servem hem?
5 Jehovah expectim iumi for servem hem long wei wea klin and no hypocrite. Bat, olketa long Israel kamap olsem wanfala “grape tree wea no garem frut and wea gogo for rotten.” Pipol long Israel wakem ‘staka altar’ for iusim long false worship. Olketa apostate hia wakem tu olketa post—maet olketa post hia hem for iusim insaed worship wea no klin. Jehovah hem sei bae hem brekem olketa altar and distroem olketa post hia.—Hosea 10:1, 2.
6. For wakabaot witim God, iumi mas lusim wanem kaen fasin?
6 Olketa servant bilong Jehovah mas no hypocrite. Bat wanem nao happen long olketa Israelite? ‘Heart bilong olketa kamap hypocrite nao’! Nomata olketa garem wanfala covenant witim Jehovah and olketa dedicate long hem, Jehovah lukim hao olketa garem hypocrite fasin. Wanem nao iumi lanem from diswan? Sapos iumi dedicate long God, iumi mas no hypocrite. Proverbs 3:32 hem talem disfala warning: “Jehovah barava heitim man wea giaman, bat Hem fren klos witim olketa wea raeteous.” For wakabaot witim God, iumi mas showimaot love “wea kamaot from klinfala heart and from gudfala conscience and from faith wea no hypocrite.”—1 Timothy 1:5.
God Showimaot Loyal Love Long Pipol Bilong Hem
7, 8. (a) Hao nao iumi savve kasem loyal love bilong God? (b) Wanem nao iumi shud duim sapos iumi duim wanfala big sin?
7 Sapos iumi worshipim Jehovah long wei wea no hypocrite and long stretfala wei, bae iumi kasem loving-kaeness, wea minim loyal love bilong hem. Hosea sei olsem long olketa Israelite wea bighed: “Plantim seed for iufala seleva long raeteous fasin; harvestim loving-kaeness. Houm gudfala graon for iufala seleva, taem iufala garem taem for lukaotem Jehovah go kasem taem hem kam for givim instruction long raeteous fasin for iufala.”—Hosea 10:12.
8 Sapos olketa Israelite repent and lukaotem Jehovah, evri samting bae barava gud! Bae hem hapi for ‘givim olketa instruction long raeteous fasin.’ Sapos iumi duim eni bigfala sin, iumi shud lukaotem Jehovah, prea long hem for kasem forgiveness and lukaotem spiritual help from olketa Christian elder. (James 5:13-16) Iumi shud lukaotem help tu from holy spirit bilong God, from “man wea plantim samting saed long body bae kasem wei for rotten from body, bat man wea plantim samting saed long spirit bae harvestim laef olowe from spirit.” (Galatians 6:8) Sapos iumi “plantim samting saed long spirit,” bae iumi gohed for kasem loyal love bilong God.
9, 10. Hao nao Hosea 11:1-4 hem fitim Israel?
9 Iumi savve trustim hao Jehovah hem evritaem deal witim pipol bilong hem long loving wei. Iumi savve lukim diswan long Hosea 11:1-4, wea hem sei olsem: “Taem Israel hem young olsem boy mi lovem hem, and mi kolem kamaot son bilong mi from Egypt. . . . Olketa start for givim sakrifaes long olketa image bilong Baal, and olketa start for mekem smoke from sakrifaes for olketa image wea olketa karvem. Bat mi, mi teachim Ephraim [olketa Israelite] for wakabaot, mi holem olketa; and olketa no luksavve mi healim olketa finis. Witim rope bilong olketa man long earth mi gohed for pullim olketa kam, witim rope bilong love, mekem mi kamap olsem olketa wea liftimap yoke from mouth bilong olketa, and mi isisi givim kaikai for each wan.”
10 Jehovah markem Israel witim wanfala smol pikinini. Long loving wei Jehovah teachim olketa Israelite for wakabaot taem hem givim go hand bilong hem for holem olketa. And hem gohed for pullim kam olketa witim “rope bilong love.” Datwan hem barava muvim heart bilong iumi! Tingim sapos iu wanfala mami or dadi wea trae for helpem pikinini bilong iu for start wakabaot. Iu givim go hand bilong iu. Maet iu iusim olketa rope for smol pikinini bilong iu for holem mekem hem no foldaon. Jehovah lovem iu long sem wei olsem. Hem hapi tumas for leadim iu witim olketa “rope bilong love.”
11. Hao nao God hem ‘kamap olsem man for liftimap yoke’?
11 Taem Jehovah deal witim olketa Israelite, hem “kamap olsem [man] wea liftimap yoke from mouth bilong olketa, and [hem] isisi givim kaikai for each wan.” Samting God duim, hem olsem hem liftimap or muvim bak yoke mekem animal fit for kaikai gud. Taem olketa Israelite nating willing for stap anda long yoke bilong God, olketa kam anda long hevi yoke bilong enemy bilong olketa. (Deuteronomy 28:45, 48; Jeremiah 28:14) Iumi mas no letem main enemy bilong iumi, Satan, kontrolem iumi and safa anda long hevi yoke bilong hem. Winim datwan, iumi laek for gohed loyal for wakabaot witim loving God bilong iumi.
Hope Long Jehovah Evritaem
12. Olsem Hosea 12:6 talem, wanem nao iumi mas duim mekem iumi gohed for wakabaot witim God?
12 For gohed wakabaot witim God, iumi mas hope long hem evritaem. Hosea sei olsem long olketa Israelite: “For saed bilong iu, iu mas go bak long God bilong iu, and showimaot loving-kaeness and justice; and evritaem hope long God bilong iu.” (Hosea 12:6) Pipol bilong Israel savve pruvim olketa repent and fren bak witim Jehovah taem olketa showimaot loving-kaeness, justice, and ‘hope long God evritaem.’ Nomata sapos iumi faithful for wakabaot witim God for longfala taem or shortfala taem, iumi mas gohed for showimaot loving-kaeness, duim samting followim justice, and hope long God evritaem.—Psalm 27:14.
13, 14. Hao nao Paul explainim Hosea 13:14, and diswan mekem iumi garem wanem hope long Jehovah?
13 Profesi bilong Hosea for olketa Israelite hem mekem iumi garem spesol reason for hope long God. Jehovah hem sei olsem: “From hand bilong Sheol mi bae sevem olketa; mi bae mekem olketa kam bak from dae. Wea nao trabol wea lead go for iu, O Dae? Wea nao wei bilong iu for finisim evri samting, O Sheol?” (Hosea 13:14) Jehovah hem no plan for sevem olketa Israelite from dae long datfala taem, bat long future bae hem finisim dae for olowe and finisim wei wea dae win ovarem iumi.
14 Taem Paul raet long olketa anointed Christian brata bilong hem, hem talem disfala toktok from profesi bilong Hosea: “Bat taem samting wea savve rotten hem kasem wei for no savve rotten and samting wea savve dae hem kasem wei for kanduit dae, then toktok wea olketa raetem finis bae happen: ‘Dae hem finis for olowe.’ ‘Dae, wea nao paoa bilong iu for win? Dae, wea nao samting wea lead go for iu?’ Samting wea lead go long dae nao hem sin, bat paoa bilong sin hem Law. Bat thankiu long God, bikos hem mekem iumi win thru long Lord bilong iumi, Jesus Christ!” (1 Corinthians 15:54-57) Wei wea Jehovah mekem Jesus laef bak from dae hem barava comfortim iumi from hem olsem wanfala promis wea showimaot hao pipol wea God rememberim bae kasem resurrection. (John 5:28, 29) Datwan hem wanfala nambawan reason for hope long Jehovah! Bat, nara samting moa hem stap wea muvim iumi for wakabaot witim God.
Olketa Wei Bilong Jehovah Olketa Stret Evritaem
15, 16. Wanem nao Hosea sei bae kasem Samaria, and hao nao datfala profesi hem fulfill?
15 Wei wea iumi biliv strong hao “olketa wei bilong Jehovah olketa stret” hem helpem iumi for gohed for wakabaot witim God. Pipol long Samaria nating wakabaot long olketa raeteous wei bilong God. From datwan, olketa mas safa from samting wea kamap from sin bilong olketa and wei wea olketa no garem faith long Jehovah. Hosea hem sei olsem: “Bae Samaria hem kasem blame from hem againstim God bilong hem. Bae olketa dae from sword. Pipol bae pisisim olketa pikinini bilong olketa, and bae busarem olketa babule woman bilong olketa.” (Hosea 13:16) History showimaot hao olketa bilong Assyria, wea olketa nao tekovarem Samaria, olketa savve duim olketa barava rabis samting olsem.
16 Samaria hem kapitol bilong ten-tribe kingdom bilong Israel. Bat maet long disfala verse, datfala nem Samaria hem minim full area wea datfala kingdom rulim. (1 Kings 21:1) King Shalmaneser V bilong Assyria hem attakim taon bilong Samaria long 742 B.C.E. Taem olketa tekovarem Samaria evribit long 740 B.C.E., plande long olketa hae class pipol from datfala taon kamap prisoner long Mesopotamia and Media. No eniwan sure sapos Shalmaneser V win for tekovarem Samaria, or Sargon ll nao duim datwan. (2 Kings 17:1-6, 22, 23; 18:9-12) Nomata olsem, record bilong Sargon talem hao olketa forcem 27,290 Israelite for go long olketa ples long Upper Euphrates and long Media.
17. Winim wei for ting daonem olketa standard bilong God, wanem nao iumi shud duim?
17 Pipol bilong Samaria barava safa from wei wea olketa fail for followim olketa stretfala wei bilong Jehovah. Iumi olketa Christian wea dedicate long hem bae kasem nogud samting tu sapos iumi kamap pipol for duim sin and ting daonem olketa raeteous standard bilong God. Iumi mas no kamap olsem! Winim datwan, iumi laek for followim disfala toktok bilong aposol Peter: “Nogud eniwan long iufala safa from hem man wea min for killim dae samwan or hem man for steal or man wea duim nogud samting or man wea poke nose long bisnis bilong nara pipol. Bat sapos man safa from hem wanfala Christian, hem mas no feel shame, bat hem mas gohed for givim glory long God long disfala nem.”—1 Peter 4:15, 16.
18. Hao nao iumi savve “gohed for givim glory long God”?
18 Iumi “gohed for givim glory long God” taem iumi wakabaot followim olketa stretfala wei bilong hem winim wei for independent. Cain killim dae brata bilong hem from hem followim mind bilong hemseleva and no obeyim warning bilong Jehovah hao sin hem redi for winim hem. (Genesis 4:1-8) Balaam acceptim selen from king bilong Moab for cursim Israel, bat nomata hem trae for duim datwan hem fail. (Numbers 24:10) And God killim dae datfala Levite Korah and samfala moa from olketa bighed againstim position bilong Moses and Aaron. (Numbers 16:1-3, 31-33) Tru nao, iumi barava no laek “followim wei bilong Cain” for killim dae narawan, kwiktaem followim “rong wei bilong Balaam,” or finis evribit long kaen ‘bighed toktok olsem Korah’ wea praod! (Jude 11) Nomata olsem, sapos iumi sin, profesi bilong Hosea hem comfortim iumi.
Olketa wea Sin Savve Kam Bak Long Jehovah
19, 20. Olketa Israelite wea repent fit for givim wanem kaen sakrifaes?
19 Nomata olketa wea foldaon and duim bigfala sin savve kam bak long Jehovah. Long Hosea 14:1, 2, hem sei olsem: “Israel, plis kam bak long Jehovah, God bilong iufala, from iufala foldaon long sin bilong iufala. Tekem witim iuseleva olketa toktok and kam bak long Jehovah. Sei olsem long hem, iufala evriwan, ‘Plis forgivim sin; and acceptim samting wea gud, and mifala bae sakrifaesim long iu olketa young buluka bilong mouth bilong mifala.’ ”
20 Olketa Israelite wea repent savve sakrifaesim long God ‘olketa young buluka bilong mouth bilong olketa.’ Diswan hem olketa sakrifaes bilong trufala praise. Paul hem iusim disfala profesi taem hem encouragem olketa Christian for “givim wanfala sakrifaes bilong praise long God, hem nao, frut bilong mouth wea talemaot nem bilong hem long pablik.” (Hebrews 13:15) Hem wanfala nambawan privilege for wakabaot witim God and givim olketa sakrifaes olsem distaem!
21, 22. Olketa Israelite wea repent bae kamap gud moa long wanem wei?
21 Olketa Israelite wea lusim nogud wei bilong olketa and kam long God, olketa givim hem ‘olketa young buluka bilong mouth bilong olketa.’ From diswan, olketa kamap gud moa long spiritual wei, olsem Jehovah hem promisim olketa. Hosea 14:4-7 hem sei olsem: “Mi [Jehovah] bae healim wei wea olketa no faithful. Mi bae lovem olketa from mi laek for duim datwan, bikos mi tekem bak kros bilong mi from olketa. Bae mi kamap olsem dew long Israel. Bae hem grow gud olsem wanfala lily, and olketa rut bilong hem grow olsem Lebanon. Olketa smol branch bilong hem bae grow, and bae hem kasem honor olsem wanfala olive tree, and bae hem smel olsem Lebanon. Olketa bae stap moa anda long shadow bilong hem. Bae olketa grow olsem grain, and bae olketa grow olsem vine. Bae pipol rememberim hem olsem wine bilong Lebanon.”
22 Olketa Israelite wea repent bae kasem spiritual healing and God bae lovem olketa moa. Jehovah bae kamap olsem fresh dew long wei wea hem bae givim staka blessing long olketa. Pipol bilong hem wea kamap gud moa bae garem honor “olsem wanfala olive tree,” and olketa bae wakabaot followim olketa wei bilong God. From iumi tu disaed strong for wakabaot witim Jehovah God, wanem nao iumi need for duim?
Gohed for Wakabaot Followim Olketa Stretfala Wei Bilong Jehovah
23, 24. Buk bilong Hosea end witim wanem profesi wea encouragem iumi, and hao nao diswan affectim iumi?
23 Sapos iumi laek gohed for wakabaot witim God, iumi mas showimaot “wisdom from antap” and evritaem duim samting followim olketa stretfala wei bilong hem. (James 3:17, 18) Last verse long profesi bilong Hosea hem sei: “Hu nao wise, mekem hem minim olketa samting hia? Hu nao wise, mekem hem savve long olketa? From olketa wei bilong Jehovah hem stret, and olketa wea raeteous nao bae wakabaot followim olketa; bat olketa wea duim rong bae stambol long olketa.”—Hosea 14:9.
24 Winim wei for followim wisdom and standard bilong disfala world, iumi shud disaed strong for wakabaot followim olketa stretfala wei bilong God. (Deuteronomy 32:4) Hosea duim datwan for 59 year or winim. Hem faithful for talemaot message bilong God from hem savve hao olketa wea wise bae minim toktok wea hem talem. Waswe long iumi? Go kasem taem wea Jehovah laekem iumi for stop for witness, iumi bae gohed lukaotem olketa wea wise for acceptim kaeness wea man no fit for kasem. And iumi hapi for barava sapotim “datfala faithful and wise slave” long disfala waka.—Matthew 24:45-47.
25. Wei wea iumi story raonem profesi bilong Hosea shud helpem iumi for duim wanem?
25 Wei wea iumi story raonem profesi bilong Hosea shud helpem iumi for gohed wakabaot witim God and garem hope for laef olowe long niu world bilong hem. (2 Peter 3:13; Jude 20, 21) Datwan hem wanfala nambawan hope! And bae iumi wanwan savve kasem datwan sapos toktok and samting iumi duim hem showimaot iumi tok from heart taem iumi sei, “Olketa wei bilong Jehovah hem stret.”
Wanem Nao Ansa Bilong Iu?
• Sapos iumi worshipim God long klinfala wei, hao nao bae hem deal witim iumi?
• Why nao iumi shud hope long Jehovah evritaem?
• Why nao iu barava bilivim hao olketa wei bilong Jehovah hem stret?
• Hao nao iumi savve gohed for wakabaot followim olketa stretfala wei bilong Jehovah?
[Piksa long page 28]
Acceptim spiritual help from olketa Christian elder
[Piksa long page 29]
Profesi bilong Hosea givim iumi reason for hope long olketa promis bilong Jehovah saed long resurrection
[Olketa Piksa long page 31]
Gohed for wakabaot witim God and garem hope for kasem laef olowe