Go Ahed for Wekap, Muv Ahed Strong!

Report Abaotem Olketa Spesol Meeting

NO ENIWAN savve denyim hao iumi stap long “nogud taem wea hard for deal witim.” Iumi Olketa Jehovah’s Witness no free from hevi bilong living long “olketa last day.” (2 Timothy 3:1-5) Bat iumi luksavve hao pipol needim help. Olketa no luksavve long mining bilong samting wea happen long world. Olketa needim comfort and hope. Wanem nao main wei wea iumi savve helpem narafala pipol?

Iumi garem komand from God for sharem gud nius bilong Kingdom bilong God wea start finis for rul. (Matthew 24:14) Pipol need for savve hao disfala Kingdom long heven hem only hope for olketa man. Bat, no evritaem pipol hapi for lisin long message bilong iumi. Long samfala ples olketa tambuim waka bilong iumi and olketa brata bilong iumi kasem persecution. Nomata olsem, iumi no givap. Witim full trust long Jehovah, iumi disaed strong for stap wekap and go ahed strong, and no slakdaon for talemaot gud nius.—Acts 5:42.

Datfala wei for disaed strong hem showaot klia long olketa spesol meeting wea kamap long October 2001. Long Saturday, October 6, annual meeting bilong Watch Tower Bible and Tract Society of Pennsylvania hem kamap long Jersey City, New Jersey, Assembly Hall bilong Olketa Jehovah’s Witness long United States.a Long nextfala day, olketa holem nara meeting long fofala ples, thrifala long United States and wanfala long Canada.b

Long firstfala toktok bilong hem long datfala annual meeting, chairman, Samuel F. Herd, member bilong Governing Body bilong Olketa Jehovah’s Witness, storyim Psalm 92:1, 4 then hem sei: “Iumi want for showimaot thankiu.” Tru nao, olketa reason for thankiu hem insaed olketa report from raonem world.

Olketa Report From Planti Difren Ples

Brata Alfred Kwakye givim report abaotem wei wea preaching waka hem go ahed long Ghana, wea olketa kolem Gold Coast bifor. Olketa tambuim waka bilong iumi long datfala kantri for planti year. Pipol savve ask: “Why nao olketa tambuim? Wanem nao iufala duim?” Brata Kwakye hem sei hao diswan openem wei for givim witness. Long 1991 taem olketa aotem datfala tambu, 34,421 Witness bilong Jehovah stap long Ghana. Long August 2001, total hem 68,152—hem 98-percent increase. Plan for buildim Assembly Hall wea savve fitim 10,000 pipol hem go ahed. Tru nao, olketa spiritual brata bilong iumi long Ghana barava iusim freedom bilong olketa long gudfala wei.

Nomata trabol saed long politik hem go ahed, olketa brata bilong iumi long Ireland barava strong for duim ministry, and olketa kasem respect from wei wea olketa no teksaed. Branch Komiti coordinator Peter Andrews hem sei Ireland garem 115 kongregeson insaed 6-fala circuit. Brata Andrews talem wanfala experience abaotem Liam, wanfala boy wea hem 10 year wea nating fraet for givim witness long skul. Liam givimaot Bible Story Buk bilong Mi, wea Olketa Jehovah’s Witness pablisim, long 25-fala skulfren bilong hem and long teacher bilong hem. Liam hem want for baptaes, bat samwan askem hem sapos hem young tumas. Liam ansa olsem: “No age bat love bilong mi for Jehovah nao hem main samting. Baptism bilong mi bae showimaot hao mi lovem hem tumas.” Goal bilong Liam hem for kamap wanfala missionary.

Long 1968, 5,400 pablisa bilong gud nius nao stap long Venezuela. Bat distaem hem winim 88,000, Stefan Johansson, Branch Komiti coordinator hem sei. And chance for bigfala increase hem stap bikos winim 296,000 nao attendim Memorial long 2001. Long December 1999, hevi rain kosim mud slide wea killim samting olsem 50,000 pipol, planti Witness tu insaed diswan. Wanfala Kingdom Hall hem fulap witim mud klosap kasem ceiling. Taem samwan sei for olketa lusim datfala building, olketa brata ansa olsem: “Nomoa nao! Diswan hem Kingdom Hall bilong mifala, and mifala no want for lusim distaem.” Olketa go ahed for waka long hem, and aotem staka ton bilong mud, olketa ston, and narakaen rabis. Olketa wakem gud moa datfala building, and olketa brata sei hem luk naes winim bifor!

Long Philippines, 87 languis nao stap, coordinator bilong Branch Komiti, Brata Denton Hopkinson, hem sei. Insaed service year wea go pas, olketa releasem full New World Translation of the Holy Scriptures long thrifala main languis bilong datfala kantri—Cebuano, Iloko, and Tagalog. Brata Hopkinson hem story abaotem experience bilong wanfala boy wea hem naen year wea readim Good News—To Make You Happy, wea Olketa Jehovah’s Witness nao pablisim. Hem kasem narafala buk from branch, wea hem readim tu, bat famili bilong hem againstim hem. Planti year bihaen taem hem long medical skul, hem story witim branch and ask for wanfala Bible study. Hem baptaes long 1996 and kwiktaem joinim full-taem ministry. Distaem hem serve witim waef bilong hem long branch office.

Branch Komiti coordinator Ronald Parkin hem sei ‘Puerto Rico hem olsem hem insaed bisnis for “exportim planti Witness.”’ Samting olsem 25,000 pablisa nao stap long datfala island, and datfala namba hem stap semsem for staka year. Why nao olsem? Olketa tingse Puerto Rico “sendem” samting olsem 1,000 pablisa long United States evri year, planti long olketa go for stap long there bikos long saed long selen. Brata Parkin storyim samting wea kot disaedem abaotem Luis, wanfala Witness wea hem 17 year wea garem sik leukemia. From Luis hem no willing for acceptim blood, olketa tekem case bilong hem long kot. Datfala judge want for story long Luis seleva, so hem visitim hem long hospital. Luis askem hem: “Why nao sapos mi duim wanfala criminal fasin, iu bae judgem mi olsem full-grown man, bat taem mi want for obeyim God, iu ting long mi olsem wanfala pikinini?” Diswan mekem judge hia for bilivim hao hem wanfala mature pikinini and hem fit for disaed seleva.

Bihaen long datfala report from olketa farawe kantri, Harold Corkern, bilong U.S. Branch Komiti, conductim interview witim fofala wea servem Jehovah for longfala taem finis. Arthur Bonno hem spendem 51 year insaed full-taem service and distaem hem serve long Ecuador Branch Komiti. Angelo Catanzaro hem spendem 59 year long full-taem service, planti long olketa year hia hem spendem olsem traveling overseer. Richard Abrahamson hem graduate from Gilead Skul long 1953, and hem garem privilege for lukaftarem waka long Denmark for 26 year bifor hem go bak long Brooklyn Bethel. Then, evriwan hapi tumas for lisin long Carey W. Barber, wea hem 96 year, baptaes long 1921 and spendem 78 year insaed full-taem ministry and hem member bilong Governing Body start from 1978.

Olketa Tok wea Muvim Man

Datfala annual meeting garem olketa tok for muvim tingting. Brata Robert W. Wallen hem story long disfala subject “Pipol for Nem Bilong Hem.” Iumi nao pipol for nem bilong God, and iumi stap long winim 230 kantri. Jehovah givim iumi “wanfala future and hope.” (Jeremiah 29:11) Iumi mas go ahed for mekem staka pipol for savve abaotem Kingdom bilong God, and sharem nambawan message bilong comfort. (Isaiah 61:1) Brata Wallen finisim tok bilong hem olsem: “Letem iumi go ahed evri day for live followim datfala nem wea pipol kolem long iumi, Olketa Jehovah’s Witness.”—Isaiah 43:10.

Lastfala part bilong datfala program hem tok wea garem thrifala part wea thrifala member bilong Governing Body nao givim. Hem garem title “Distaem Nao Hem Taem for Go Ahed for Wekap, Stand Strong, and Grow Maeti.”—1 Corinthians 16:13.

First samting, Brata Stephen Lett hem story long subject “Go Ahed for Wekap long Disfala Lastfala Hour.” Wei for sleep long physical wei hem wanfala present, Brata Lett hem sei. Hem strongim iumi. Bat wei for sleep long spiritual wei, hem no enitaem gud. (1 Thessalonians 5:6) So hao nao iumi savve stap wekap long spiritual wei? Brata Lett talem thrifala “samting for keepim man wekap” long spiritual wei: (1) Garem planti samting for duim long waka bilong Lord. (1 Corinthians 15:58) (2) Luksavve long spiritual need bilong iu. (Matthew 5:3) (3) Lisin long kaonsel wea kam from Bible mekem iumi duim samting long wisefala wei.—Proverbs 13:20.

Brata Theodore Jaracz givim wanfala tok for muvim man wea garem title “Stand Strong Anda Long Test.” Taem hem storyim Revelation 3:10, Brata Jaracz hem ask: “Wanem nao datfala ‘hour bilong test’?” Datfala test hem kam “long day bilong Lord,” wea iumi insaed long hem. (Revelation 1:10) Test hia hem kam saed long datfala main kwestin—waswe, iumi saed witim Kingdom bilong God wea start for rul finis or iumi saed witim wicked system bilong Satan? Go kasem datfala hour bilong test hem finis, iumi bae go ahed for feisim olketa test or hard taem. Waswe, bae iumi go ahed for loyal long Jehovah and organization bilong hem? Brata Jaracz hem sei, ‘Iumi olsem man wanwan bae mas showimaot loyal fasin.’

Last samting, Brata John E. Barr hem story long theme “Grow Maeti Olsem Wanfala Spiritual Man.” Taem hem storyim Luke 13:23-25, hem sei hao iumi mas trae hard for “for go insaed long smolfala door.” Planti fail bikos olketa no really trae hard for grow maeti. For kamap olketa full-grown Christian, iumi mas lane for followim olketa Bible principle long evri part long laef bilong iumi. Brata Barr encouragem olketa olsem: “Mi sure iufala bae agree hao distaem nao hem taem for (1) keepim Jehovah olsem first wan and main wan; (2) grow maeti; and (3) trae hard for duim will bilong Jehovah. Long disfala wei nao iumi bae fit for go insaed smolfala door wea lead for nambawan laef wea no garem end.”

Taem datfala annual meeting hem gogo for finis, wanfala kwestin hem stap wea no kasem ansa yet: Wanem nao yeartext for 2002 service year? Datfala kwestin kasem ansa long nextfala day.

Narafala Meeting

Evriwan barava luk forward long Sunday morning taem program for narafala meeting hem start. Hem start witim main point bilong Wastaoa leson bilong datfala week, and bihaen wanfala shortfala tok abaotem samfala main point bilong datfala annual meeting. Next samting, evriwan barava hapi for herem wanfala tok long yeartext for 2002: “Kam long mi, . . . and mi bae strongim iu.” (Matthew 11:28) Datfala tok hem kam from olketa study article wea iumi kasem taem olketa pablisim long Wastaoa bilong December 15, 2001.

Bihaen datwan, samfala wea olsem delegate long datfala spesol “Pipol wea Teachim Word Bilong God” Convention long France and Italy long August 2001 sharem samfala memory bilong olketa.c Last samting, olsem main part bilong program bilong datfala day, tufala visiting speaker from Brooklyn Bethel givim tufala lastfala tok.

First wan garem title “Garem Strongfala Trust Long Jehovah Insaed Olketa Hardfala Taem Hia.” Datfala speaker storyim olketa main point hia: (1) Wei for garem strongfala trust long Jehovah hem evritaem important for pipol bilong God. Bible garem planti example bilong olketa wea showimaot strong and faith taem pipol againstim olketa. (Hebrews 11:1–12:3) (2) Jehovah provaedem gudfala faondeson for trustim hem evribit. Olketa waka and Word bilong hem promisim hao hem kea for olketa servant bilong hem and hao hem bae nating forgetim olketa. (Hebrews 6:10) (3) Wei for trust and no fraet hem samting wea iumi barava needim distaem. Iumi nao olketa wea “nation bae heitim,” olsem Jesus talem finis. (Matthew 24:9) For no givap, iumi need for depend long Word bilong God, and trustim wei wea spirit bilong hem stap witim iumi, and go ahed strong for talemaot gud nius. (4) Staka example showimaot hao iumi feisim wei wea pipol againstim iumi distaem. Hem encouragem evriwan taem speaker storyim olketa test wea olketa brata go thru long hem long Armenia, France, Georgia, Kazakhstan, Russia, and Turkmenistan. Tru nao, distaem nao hem taem for showimaot strong and trust long Jehovah!

Lastfala speaker hem storyim disfala theme “Muv Ahed Long Wan Mind Witim Organization bilong Jehovah.” Disfala tok storyim staka point wea kam long barava taem. (1) Planti pipol lukim wei wea pipol bilong Jehovah muv ahed. Preaching waka and olketa convention bilong iumi pullim pablik for luk long iumi. (2) Jehovah hem startim wanfala organization wea garem wan mind. Long 29 C.E., holy spirit anointim Jesus mekem hem bringim “evri samting”—olketa wea bae go long heven witim olketa wea bae stap long earth—insaed famili bilong God wea garem wan mind. (Ephesians 1:8-10) (3) Olketa convention hem barava spesol samting wea showimaot wei for garem wan mind evriwea long world. Diswan hem showaot klia long olketa spesol convention wea kamap long France and Italy last August. (4) Olketa acceptim wanfala resolution wea garem paoa long France and Italy. Speaker sharem tu-thri part from datfala interesting resolution wea muvim man. Full toktok bilong datfala resolution hem stap long daon.

Long end bilong lastfala tok, datfala visiting speaker readim announcement wea Governing Body redyim, wea muvim olketa. Part long hem sei olsem: “Distaem nao hem taem for go ahed for wekap and go ahed for lukaot, for luksavve hao olketa samting long world hem kamap. . . . Mifala want for talem iufala loving kea wea Governing Body garem for iufala and for evri pipol bilong God. Letem hem blessim iufala long bigfala wei taem iufala duim will bilong hem witim full soul.” Pipol bilong Jehovah evriwea disaed strong for go ahed for wekap long olketa hard taem hia and muv ahed strong witim organization bilong Jehovah wea garem wan mind.

[Olketa Footnote]

[Box/Olketa Piksa long page 29-31]

Resolution

Long August 2001, olketa spesol “Pipol wea Teachim Word Bilong God” Convention hem kamap long France and Italy. Long olketa convention hia wanfala resolution kamap wea savve muvim man. Olketa toktok insaed datfala resolution hem stap long daon.

“OLSEM OLKETA JEHOVAH’S WITNESS, evriwan long iumi wea hipap long disfala ‘Pipol wea Teachim Word Bilong God’ Convention kasem teaching wea savve barava helpem man. Olketa showimaot klia wea nao disfala teaching hem kam from. Disfala teaching hem no kam from eni man. Hem kam from Datwan wea profet Isaiah bilong bifor storyim olsem ‘Barava Nambawan Teacher’ bilong iumi. (Isaiah 30:20) Tingim reminder bilong Jehovah wea stap long Isaiah 48:17: ‘Mi, Jehovah, mi nao God bilong iufala, Datwan wea teachim iufala for helpem iufala seleva, Datwan wea mekem iufala followim road wea iufala mas wakabaot long hem.’ Hao nao hem duim diswan? Main wei nao hem thru long buk wea olketa transleitim evriwea and wea kasem staka pipol long world, Bible. Hem talem iumi long kliafala wei: ‘Evri Scripture hem kam from God and hem gud.’—2 Timothy 3:16.

“Distaem, olketa man barava needim diskaen gudfala teaching. Why nao iumi tok olsem? Taem olketa tingim disfala world wea go ahed for change, and wea konfiusim man, wanem nao pipol wea ting raonem olketa samting hia luksavve long hem? Disfala simpol samting: Nomata planti million pipol kasem education bilong disfala world, olketa no garem eni gudfala mark saed long stretfala fasin and olketa fail for luksavve long wanem hem stret and wanem hem rong. (Isaiah 5:20, 21) Wei for no minim Bible hem big tumas. Nomata technology givim staka information thru long wei for iusim olketa computer, wea nao ansa for olketa important kwestin olsem, Wanem nao purpose bilong laef? Hao nao iumi savve minim olketa samting wea happen long taem bilong iumi? Waswe, wanfala strongfala hope for future stap? Waswe, peace and security savve kamap long future? Narafala samting tu, olketa library fulap witim planti million buk wea story abaotem klosap evri samting wea olketa man waka hard for hem. Nomata olsem, olketa man go ahed for duim sem mistek wea olketa duim bifor. Raf fasin kamap big. Olketa sik wea olketa tingse olketa finisim hem kam bak moa, and olketa nara sik, olsem AIDS, hem spread kwiktaem. Wei wea famili laef brekdaon hem big tumas. Pollution spoelem environment. Terrorism and olketa samting for faet wea savve killim dae staka pipol wantaem hem spoelem peace and security. Namba bilong olketa problem wea man no savve stretem hem go ahed for kamap moa big. Wanem waka nao iumi garem for helpem nara pipol insaed olketa hardfala taem hia? Waswe, eni teaching stap wea explainim samting wea kosim hard living distaem, wea no just showim wei for kasem laef wea moabeta distaem bat hem givim tu wanfala nambawan, sure hope for future?

“Komand wea iumi kasem from Bible hem for ‘go and mek-disaepol long pipol bilong evri nation, teachim olketa for duim evri samting wea Christ komandim.’ (Matthew 28:19, 20) Jesus Christ givim disfala komand bihaen long dae and resurrection bilong hem, taem hem kasem evri paoa long heven and long earth. Hem winim evri waka wea olketa man mekhae long hem. Long tingting bilong God, waka wea iumi kasem, wea mekhae long spiritual need bilong olketa wea hangre for raeteous fasin, hem first important samting. Iumi garem olketa gudfala reason from Bible for tinghae long disfala waka.

“Iumi need for keepim diskaen waka olsem main samting long laef bilong iumi. Witim blessing and help bilong God, iumi bae finisim disfala waka, nomata staka samting stap for pullim iumi, hard samting, and wei wea religion and politik againstim iumi, wea olketa duim for stopem disfala teaching program evriwea long world. Iumi feel sure and garem faith hao disfala waka bae go ahed for win and kasem end bilong hem. Why nao iumi fit for barava sure? Bikos Lord Jesus Christ promisim hao hem bae stap witim iumi taem iumi duim disfala ministry wea God givim go kasem end bilong disfala system.

“Taem wea still stap for olketa man wea safa hem gogo for kasem end. Iumi mas fulfillim waka bilong iumi bifor end hem kam. Dastawe, iumi, olsem Olketa Jehovah’s Witness, disaedem hao:

“First wan: Olsem olketa minister wea dedicate, iumi disaed strong for keepim Kingdom interest olsem first samting long laef bilong iumi and go ahed for grow long spiritual wei. For kasem diswan, prea bilong iumi hem fitim toktok bilong Psalm 143:10: ‘Teachim mi for duim will bilong iu, from iu nao God bilong mi.’ Diswan minim iumi mas kamap gudfala student, wea trae hard for readim Bible evriday, duim study seleva and research. For showimaot klia long evriwan wei wea iumi muv ahed, iumi bae duim wanem iumi fit for duim for prepare for and kasem evri gud samting from theocratic education wea iumi kasem long olketa kongregeson meeting, circuit assembly, and long olketa distrik, national, and international convention.—1 Timothy 4:15; Hebrews 10:23-25.

“Mek-tu: For God teachim iumi, iumi bae kaikai nomoa long tebol bilong hem and barava careful for followim warning bilong Bible abaotem olketa giaman teaching bilong olketa demon. (1 Corinthians 10:21; 1 Timothy 4:1) Iumi bae careful for stap klia long olketa samting wea savve spoelem iumi, insaed diswan hem olketa giaman teaching bilong religion, olketa iusles idea, nogud fasin saed long sex, pornography, nogud hapitaem, and evri samting wea no ‘agree witim healthy teaching.’ (Romans 1:26, 27; 1 Corinthians 3:20; 1 Timothy 6:3; 2 Timothy 1:13) For honorim ‘olketa present olsem man,’ wea fit for teachim olketa gudfala samting, iumi bae respectim hard waka bilong olketa and waka tugeta witim full heart for saportim olketa klin and raeteous fasin and spiritual mark bilong Word bilong God.—Ephesians 4:7, 8, 11, 12; 1 Thessalonians 5:12, 13; Titus 1:9.

“Mek-thri: Olsem olketa Christian parents, iumi bae waka hard witim full heart for teachim olketa pikinini bilong iumi no long toktok nomoa bat thru long example tu. Main interest bilong iumi hem for helpem olketa taem olketa baby yet for ‘savve long olketa holy raeting, wea fit for mekem iumi wise for salvation.’ (2 Timothy 3:15) Iumi bae tingim evritaem hao wei wea iumi trainim olketa long discipline and wei for stretem tingting wea kam from Jehovah bae givim best chance long olketa for kasem promis bilong God hao ‘evri samting bae go ahed gud witim olketa and olketa savve stap longtaem long disfala earth.’—Ephesians 6:1-4.

“Mek-foa: Taem iumi feisim olketa wari or olketa bigfala problem, first samting iumi bae duim nao hem for ‘talem evri samting long God,’ from iumi savve hao ‘peace bilong God wea winim evri tingting bilong man’ bae protectim iumi. (Philippians 4:6, 7) From iumi kam anda long yoke bilong Christ finis, iumi bae kasem strong. From iumi savve hao God hem kea for iumi, iumi bae no hol bak for torowem olketa hevi bilong iumi long hem.—Matthew 11:28-30; 1 Peter 5:6, 7.

“Mek-faev: For showimaot thankiu long Jehovah for disfala privilege for kamap pipol wea teachim Word bilong hem, iumi bae waka hard moa for ‘iusim word bilong truth long stretfala wei’ and ‘duim evribit ministry bilong iumi.’ (2 Timothy 2:15; 4:5) Bikos iumi barava savve long wanem nao insaed diswan, samting wea iumi barava wantem from heart bilong iumi hem for lukaotem olketa wea fit and mekem grow seed wea iumi plantim. Nara samting tu, iumi bae mekem teaching bilong iumi kamap moabeta taem iumi conductim moa hom Bible study long gudfala wei. Diswan bae mekem iumi wan mind witim will bilong God hao ‘evri difren kaen man mas sev and kasem stretfala savve bilong truth.’—1 Timothy 2:3, 4.

“Mek-six: Insaed century wea go pas finis and disfala century tu, Olketa Jehovah’s Witness long planti kantri kasem difren kaen persecution and wei wea pipol againstim olketa. Bat Jehovah hem stap witim iumi. (Romans 8:31) Word bilong hem wea tru evribit promisim iumi hao ‘no eni samting for faet againstim iumi’ bae win for slowim, or stopem Kingdom preaching and teaching waka bilong iumi. (Isaiah 54:17) Nomata long gudfala or long hardfala taem, iumi hard for stop for story abaotem truth. Iumi disaed strong for hariap for duim preaching and teaching waka bilong iumi. (2 Timothy 4:1, 2) Goal bilong iumi hem for sharem evribit disfala gud nius bilong Kingdom bilong God witim pipol bilong evri nation. Long wei olsem, olketa bae go ahed for garem chance for lane abaotem samting wea God provaedem for kasem laef olowe insaed wanfala raeteous niu world. Olsem pipol wea teachim Word bilong God witim wan mind, iumi disaed strong for go ahed for followim example bilong Nambawan Teacher, Jesus Christ, and showimaot olketa fasin bilong hem. Iumi bae duim evri samting hia for givim honor and praise long Barava Nambawan Teacher and Man wea Givim Laef, Jehovah God.

“Evri wan wea attend long disfala convention wea agree witim disfala resolution, plis sei YES!”

Taem speaker talem lastfala kwestin bilong datfala resolution long 160,000 wea hipap long thrifala convention long France and 289,000 long naenfala ples long Italy, wanfala bigfala singaot for sei “Yes” kamap long olketa difren kaen languis bilong olketa wea hipap.