Hao Nao Iumi Savve Iusim Laef Bilong Iumi Long Wei wea Jehovah Appruvim?
“Lus, yesterday, samwea midolwan taem sun kamap and sun hem go daon, tufala gold hour, and each wan garem sixti diamond minute long hem. Man no savve kasem reward sapos hem faendem olketa, bikos olketa lus for olowe.”—Lydia H. Sigourney, woman for raet long America (1791-1865).
HEM feel olsem namba bilong olketa day bilong laef bilong iumi smol and finis kwiktaem nomoa. David wea raetem olketa psalm ting raonem hao laef hem short tumas and diswan muvim hem for prea olsem: “Mekem mi savve, O Jehovah, long end bilong mi, and haomas nao olketa day wea mi bae laef, mekem mi savve hao mi stap for lelebet taem nomoa. Lukim! Iu mekem olketa day bilong mi tu-thri nomoa; and haomas day mi bae laef hem barava smol front long iu.” David laek for garem living wea mekem God hapi, saed long toktok bilong hem and samting hem duim. Hem talem hao hem depend long God taem hem sei: “Mi hope long iu.” (Psalm 39:4, 5, 7) Jehovah hem lisin. Hem lukim samting David duim and givim reward wea fitim datwan.
Hem isi tumas for busy evri minute bilong day and for garem living wea fast tumas and fulap witim staka samting. Diswan savve mekem iumi for wari lelebet, especially bikos iumi garem staka samting for duim and for experiencem, bat no garem inaf taem. Waswe, goal bilong iumi hem olsem goal bilong David—for iusim laef bilong iumi long wei wea God appruvim? For sure, Jehovah hem lukluk gud long iumi evriwan. Klosap 3,600 year bifor, Job, wanfala man wea fraet long God, luksavve hao Jehovah lukim olketa wei bilong hem and lukluk gud long evri samting hem duim. Job hem ask: “Taem hem askem mi for givim ansa, wanem nao mi savve sei long hem?” (Job 31:4-6, 14) Iumi savve iusim laef bilong iumi long wei wea Jehovah appruvim taem iumi markem olketa samting wea moa important saed long spiritual samting, obeyim olketa komandment bilong hem, and iusim taem bilong iumi long wisefala wei. Bae iumi lukluk gud go moa long olketa samting hia.
Mekem Olketa Spiritual Samting Olsem Main Samting
Bible encouragem iumi for markem olketa samting wea moa important saed long spiritual samting taem hem sei: “Mek sure long olketa samting wea moa important.” Wanem nao olketa important samting hia? Wanfala samting hem “stretfala savve and fasin for luksavve evribit.” (Philippians 1:9, 10) For kasem savve abaotem purpose bilong Jehovah minim iumi mas iusim taem bilong iumi long wisefala wei. Bat, wei for markem olketa spiritual samting olsem main important samting bae mekem iumi garem living wea mekem man satisfae.
Aposol Paul remindim iumi for “go ahed for mek sure long samting wea Lord hem acceptim.” Insaed wei for mek sure hem mas wei wea iumi lukluk gud long olketa reason why iumi duim samting and wanem nao heart hem wantem. Datfala aposol go ahed for sei: “Go ahed for luksavve wanem nao will bilong Jehovah.” (Ephesians 5:10, 17) So, wanem nao Jehovah acceptim? Wanfala wisefala toktok long Bible hem sei: “Wisdom hem main samting. Kasem wisdom, and witim evri samting wea iu kasem, kasem wei for minim samting. Barava tinghae long hem, and hem bae apim iu.” (Proverbs 4:7, 8) Jehovah hem barava hapi taem wanfala man hem kasem and iusim wisdom bilong God. (Proverbs 23:15) Barava gud samting abaotem kaen wisdom olsem hem hao no eniwan savve tekem or distroem. Tru nao, hem kamap samting for protectim iumi ‘from nogud wei and from man wea tok abaotem rabis samting.’—Proverbs 2:10-15.
So, hem barava wise for againstim eni feeling for hafhaf saed long olketa spiritual samting! Iumi need for mekem grow feeling for tinghae long olketa samting Jehovah talem and for garem gudfala wei for fraet long hem. (Proverbs 23:17, 18) Iumi savve kasem gudfala wei for tingting olsem nomata wanem age nao iumi, bat hem moabeta for garem disfala wei for tinghae and for barava mekem hem wei bilong iumi for followim olketa Bible principle taem iumi young. King Solomon wea wise tumas hem sei: “So, rememberim Nambawan Creator bilong iu taem iu young yet.”—Ecclesiastes 12:1.
Barava klos wei for mekem grow fasin for tinghae long Jehovah hem for iumiseleva prea long hem evriday. David luksavve long wei wea hem important for story long Jehovah, from hem ask witim strong: “Herem prea bilong mi, O Jehovah, and lisin long singaot bilong mi for help. Tingim krae bilong mi.” (Psalm 39:12) Waswe, naesfala feeling wea kamaot from klos wei wea iumi fren witim Jehovah muvim iumi for krae? Tru nao, taem iumi story evritaem long Jehovah abaotem olketa private samting bilong heart and ting raonem Word bilong hem, hem kam moa klosap long iumi.—James 4:8.
Lanem Wei for Obey
Moses hem narafala man bilong faith wea luksavve hao hem need for depend long God. Olsem David, Moses savve laef hem fulap witim trabol. Dastawe hem barava askem God for showim hem ‘hao for iusim laef bilong hem long wei wea mekem hem garem wisefala heart.’ (Psalm 90:10-12) Only wei for kasem wisefala heart hem for lanem and live followim olketa law and principle bilong Jehovah. Moses savve long diswan, so hem trae for strongim datfala barava important truth long nation bilong Israel long wei for talem moa olketa law bilong God bifor olketa go insaed long Promis Land. Eni king wea Jehovah bae chusim bihaen for rulim Israel mas raetem for hemseleva wanfala copy bilong Law and readim evriday for full laef bilong hem. Why nao olsem? Mekem hem savve lane for fraet long God. Diswan bae testim fasin bilong king for obey. Hem bae protectim hem from wei for apim heart bilong hem ovarem olketa brata bilong hem and bae mekem hem stap olsem king for longfala taem. (Deuteronomy 17:18-20) Jehovah talem disfala promis moa taem hem sei long Solomon, son bilong David: “Sapos iu bae wakabaot long olketa wei bilong mi long wei for keepim olketa law bilong mi and olketa komandment bilong mi, olsem dadi bilong iu David duim, bae mi mekem iu laef for longfala taem.”—1 Kings 3:10-14.
Wei for obey hem serious samting long God. Sapos iumi ting long samfala part bilong olketa mark and law bilong Jehovah olsem samting wea no important, bae hem luksavve long diswan. (Proverbs 15:3) Wei for savve long diswan shud muvim iumi for keepim wei for barava respectim evri law bilong Jehovah, nomata maet samfala taem hem no isi for duim. Satan barava duim best bilong hem for “blokem” iumi taem iumi trae hard for followim olketa law and komandment bilong God.—1 Thessalonians 2:18.
Hem barava important for followim kaonsel long Bible for hipap for worship and kaban tugeta. (Deuteronomy 31:12, 13; Hebrews 10:24, 25) So iumi shud askem iumiseleva: ‘Waswe, mi garem fasin for no givap and disaed strong wea mi needim mekem mi savve duim samting wea barava fitim and gud?’ Sapos iumi missim wei for kaban tugeta and instruction long olketa Christian meeting from iumi busy long waka for selen, diswan bae spoelem wei wea iumi fren witim Jehovah. Aposol Paul hem raet: “Living bilong iufala mas kamap free from wei for lovem selen, taem iufala satisfae long samting wea stap distaem. From [Jehovah] talem finis: ‘Mi bae nating lusim iu and bae nating forgetim iu.’ ” (Hebrews 13:5) Wei wea iumi willing for obeyim olketa komandment bilong Jehovah showimaot iumi trustim hao hem bae kea for iumi.
Jesus lanem fasin for obey and hem kasem gud samting. Iumi savve duim tu. (Hebrews 5:8) Taem iumi trae hard for mekem grow fasin for obey, gogo bae hem moa isi for obey nomata long olketa smol samting. Hem tru, from iumi faithful, maet iumi need for deal witim nogud samting wea olketa narawan duim long iumi. Bae diswan hem olsem especially long wakples, long skul, or taem olketa famili member garem difren religion. Nomata olsem, samting wea savve comfortim iumi nao hem datfala promis for olketa Israelite, hao sapos olketa ‘lovem Jehovah long wei for lisin long voice bilong hem and for stap klosap long hem, hem bae kamap laef bilong olketa and long bilong olketa day bilong olketa.’ (Deuteronomy 30:20) Disfala sem promis stap for iumi tu.
Iusim Taem Long Wisefala Wei
Wisefala wei for iusim taem bae helpem iumi for iusim laef bilong iumi long wei wea Jehovah appruvim. No olsem selen wea man savve keepim, sapos man no iusim taem wea hem garem, datfala chance bae lus nao. Evri hour wea go pas hem lus for olowe. From iumi olowe garem staka samting for duim, waswe, iumi iusim taem bilong iumi long wei wea savve helpem iumi for kasem olketa goal bilong iumi? Wanfala main goal bilong evri Christian hem shud for share evritaem long waka for preachim Kingdom and for mek disaepol.—Matthew 24:14; 28:19, 20.
Sapos iumi luksavve wei wea taem hem important, bae iumi iusim taem bilong iumi long wisefala wei. Ephesians 5:16 encouragem iumi for ‘baem taem for iumiseleva,’ wea minim iumi “baem” taem from olketa samting wea no important tumas. Hem minim for katdaon long olketa samting wea savve weistem taem nomoa. Wei for spendem tumas taem for lukluk long television or Internet, readim olketa buk, or ova tumas for aftarem hapitaem savve mekem iumi taed tumas. And tu, wei for laekem staka material samting savve weistem taem wea iumi needim for mekem grow wisefala heart.
Pipol wea iusim taem long wisefala wei sei: “Iu no savve iusim taem long wisefala wei sapos iu no markem olketa kliafala goal.” Olketa talem faevfala mark for olketa goal: goal mas klia, mas showaot wei wea iu muv ahed, fit for kasem, fitim really samting, and garem schedule.
Wanfala gudfala goal hem for kamap moabeta long Bible reading bilong iumi. First step hem for garem kliafala goal—readim full Bible. Next step hem for disfala goal mas showaot wei wea iu muv ahed. Olketa goal shud encouragem iumi for trae hard and for grow. Olketa goal mas fitim really samting, and iumi mas fit for kasem. Iumi mas tingim savve and taem wea iumi garem. Samfala bae needim moa taem for kasem goal bilong olketa. Last samting, goal mas followim schedule. Wei for markem date for kasem wanfala goal savve muvim iumi for trae hard for kasem.
Evri member bilong Bethel famili raonem full world, wea serve long world headquarters bilong Olketa Jehovah’s Witness or long wanfala branch office bilong hem, garem goal for readim full Bible insaed first year wea olketa serve long Bethel. Olketa luksavve hao wei for readim Bible hem helpem olketa for grow long spiritual wei and for feel moa klos long Jehovah, wea teachim olketa for kasem gud samting for olketa seleva. (Isaiah 48:17) Waswe, iumi savve markem wei for readim Bible evritaem olsem goal bilong iumi tu?
Gud Samting wea Kamaot From Wisefala Wei for Iusim Laef
Bae iumi kasem staka spiritual blessing taem iumi markem olketa spiritual samting olsem main important samting. Diswan helpem iumi for feel olsem iumi duim gud samting and garem purpose long laef bilong iumi. Wei for story long Jehovah evritaem from heart bilong iumi mekem iumi barava feel klos long hem. Wei wea iumi prea hem showimaot iumi trust long hem. Wei for readim Bible and olketa Bible pablikeson wea “faithful and wise slave” provaedem, showimaot hao iumi willing for lisin long God taem hem story long iumi. (Matthew 24:45-47) Diswan helpem iumi for kasem wisefala heart, mekem iumi savve chusim and disaedem olketa stretfala samting long laef.—Psalm 1:1-3.
Iumi hapi for obeyim olketa komandment bilong Jehovah, bikos wei for duim olsem hem no wanfala hevi. (1 John 5:3) Taem iumi iusim each day long wei wea Jehovah appruvim, iumi strongim wei wea iumi fren witim hem. Iumi savve barava saportim tu olketa brata bilong iumi long spiritual wei. Evri samting hia mekem Jehovah God hapi. (Proverbs 27:11) And wei wea Jehovah appruvim iumi distaem and for olowe hem best reward wea iumi savve kasem!
[Piksa long page 21]
Olketa Christian ting serious long olketa spiritual samting
[Olketa Piksa long page 22]
Waswe, iu iusim taem bilong iu long wisefala wei?
[Piksa long page 23]
Iumi strongim wei wea iumi fren witim Jehovah taem iumi iusim each day long wei wea hem appruvim